Klärwark Stood
Dat Klärwark Stood is en Klärwark in de Stadt Stood. De Anlaag liggt in’n Noordoosten von Stood an’n Harschenfleter Weg. Dat klärte Afwater flütt in de Swing.
De eersten Plaans för en Klärwark hett dat in Stood 1959 bet 1961 geven. Dor is aver an’t Enn nix von worrn, von wegen de Kösten. Eerst 1970, as dat Industrierebeed op Bützfletersand plaant worrn is, hett dat ok wedder Plaans geven, en Klärwark intorichten. Dat Klärwark schull för 135.000 Inwahners utleggt ween. En Utboreserve gifft dat för 200.000 Inwahners. In’n Sommer 1971 hebbt se anfungen, de Anlaag to boon. Trech weer dat Klärwark denn 1976.
En tweten Utboschridd is 1986 maakt worrn. Dor is ünner annern en Annahmestell för Fäkalslamm boot worrn, dat dat Klärwark den Slamm ut Kleenkläranlagen ut’n ganzen Landkreis Stood annehmen kann.
Von 2003 bet 2014 is dat Klärwark denn in Schreed bilütten saneert worrn. Dat hett bet 2014 13 Milljonen Euro köst.
Bet 31. Dezember 2003 weer de Stadt Stood direkt för dat Klärwark tostännig. Denn hett de Stadt dat an de Stadtwarken Stood afgeven. 28 Lüüd doot dor arbeiden.
Rebeed[ännern | Bornkood ännern]
De Kanalisatschoon in de Binnenstadt von Stood is al in de Johren 1875 bet 1880 anleggt worrn. In de Johren 1930 is denn ok dat Rebeed in’n Süden von Stood bet na de hüdige Bundsstraat 73 mit dorto kamen. To Anfang von de Johren 1950 sünd de Hüüs in dat Rebeed von Hogenwedeler Weg un Bremervörer Straat tokamen un later dat Rebeed in’n Süden von de Sassenstraat un Hahl.
In de Johren 1960 sünd in dat Oollanner Veerdel Röhren verleggt worrn. In de Johren 1970 hebbt se de Rebeden an de Mozartstraat/Wagnerstraat in Hogenwedel un dat Rebeed in’n Süden von de B 73 anslaten un ok de Öörd Wiepenkathen un Schölisch hebbt Kanalisatschoon kregen.
1973 is de Von-Goeben-Kasern anslaten worrn un 1974/1975 de Öörd Haddörp un Hagen.
Dat Afwater ut all disse Rebeden is denn 1976 in dat ne’e Klärwark klärt worrn. De Öörd Bützfleet un Aßel, de en Afwaterverband grünnt harrn, hebbt dat Afwater von 1977 af an na Stood pumpt. De Wahnrebeden an’n Hogenwedel un an’n Pulverweg sünd 1979 anslaten worrn.
Siet 1996 warrt ok dat Afwater ut de Samtgemeen Himmelpoorten mit de Öörd Hammah, Düünbeudel, Himmelpoorten, Grootweurn un Burweg (1996 noch Deel von de Samtgemeen Olendörp) na dat Klärwark in Stood pumpt.
Weblenken[ännern | Bornkood ännern]
- Websteed von de Afwaterentsorgung Stood (hoochdüütsch)
Koordinaten:53° 36′ N, 9° 29′ O