Kim Yong-nam

Vun Wikipedia
Kim Yong-nam (2015)

Kim Yong-nam (koreaansch 김영남; * 4. Februar 1928 in Myŏngch'ŏn) is en noordkoreaanschen Politiker un von 1998 bet 2019 de Vörsitter vun dat Präsidium vun’n Böversten Volkskongress. Noordkorea hett keen richtigen Staatsbaas, na de Opgaven dee Kim aver datsülve as en Staatsbaas, ok wenn he na de Macht blot de Nummer Twee achter Kim Jong-il/Kim Jong-un weer.

Kim hett in de Johren 1950 in de Sowjetunion studeert un weer Viez-Vörsitter vun dat Komitee för Kulturelle Utlandsbeziehungen un vun dat Natschonale Komitee för den Schutz vun’n Freden. Vun 1956 af an hett he in dat Afdeel för Butenpolitik bi’t Zentralkomitee vun de Arbeidspartei vun Korea arbeidt. 1961 is he Viez-Vörsitter vun de Arbeidspartei in de Provinz Süüd-Hamgyŏng worrn un 1972 Vörsitter vun dat Afdeel Butenpolitik vun dat Zentralkomitee vun de Arbeidspartei. In de Johren 1970, 1980 un 1990 hett he Kim Il-sung op veel vun siene Reisen in dat Utland begleitet.

So bi 1970 is Kim Maat vun dat Zentralkomitee vun de Arbeidspartei worrn un 1980 vun dat Politbüro. Vun 1983 bet 1998 weer he Butenminister vun Noordkorea.

Von’n 5. September 1998 bet 11. April 2019 weer Kim Vörsitter vun’n Böversten Volkskongress, dat Parlament vun Noordkorea. Offiziell is Kim Il-sung, de 1994 doodbleven is, de ewige Präsident vun Noordkorea. Kim Yong-nam weer also nich offiziell de Staatsbaas. Aver he harr de Opgaav Baadschoppers to akkrediteren un Verdrääg to ünnertekenen, harr also desülven Opgaven as en Staatsbaas.

Sien Bröer is Kim Ki-nam.

Weblinks[ännern | Bornkood ännern]

Kim Yŏng-nam. Mehr Biller, Videos oder Audiodateien to’t Thema gifft dat bi Wikimedia Commons.