Kenny Davern

Vun Wikipedia
Wesseln na: Navigatschoon, Söök
Kenny Davern 1992 im Jazzland, Wien

Kenny Davern (* 7. Januar 1935 in Huntington, Long Island, New York; † 12. Dezember 2006 in Sandia Park in New Mexico) weer en US-amerikanischer Jazz-Klarinettist un Saxophonist (Sopran u.a.) vun den Dixieland Jazz un Swing.

Davern keem ut en zerrütt Öllernhuus un leev in negen Plegefamilien, bit he bi sien Grootmoder in Queens upwassen dee, de en litauische Jödin weer, sien Vader weer dorgegen irisch-kathoolsch. He fung an sück för Jazz to interesseeren, nahdem he Swing-Musikers as Artie Shaw hören dee, vun präägend Infloot weer denn aber de Dixieland-Jazzmusik vun en Pee Wee Russell, den he ok in Eddie Condon sien New Yorker Club hören dee. Davern nehm klassischen Klarinettenünnerricht bi David Weber vun dat Orchester vun de New York City Ballet. 1951 speel he in Gigs mit Red Allen un gung 1953 mit de Big Band vun den Pianisten Ralph Flanagan up Tour. 1954 is he de Band vun Jack Teagarden bitreden. As de in Kalifornien touren wullen, de Musikergewerkschaft dorför aber verlangen, dat se sück dor söss Maand uphollen mussen, is he 1955 to de „Memphis Five“ vun Phil Napoleon wesselt. Mit de speel he in' Nick´s in Greenwich Village in New York, un buterdem mit Pee Wee Erwin un sien eegen Band „Washington Squares“. 1961 speel he mit de Band vun Ted Lewis in' Roseland Ballroom un 1962/3 mit den „Dukes of Dixieland“ (mit de he ünner annern en Gospel Album mit den Clara Ward Singers upnehm). Enn' vun de 1960er Johren speel he völ gemeensam in en Band mit den Pianisten Dick Wellstood in' „The Ferry Boat“ in Brielle, New Jersey (wat hüm so good gefull, dat he en Angebot utslahn hett bi de „Louis Armstrong All Stars“ mittospelen). Bekannt wurr he in de 1970er Johren mit de Band „Soprano Summit“, de he mit Bob Wilber leiten dee – beid sünd sück toeerst up en vun Dick Gibson sien „Colorado Jazz Parties“ begegnet. Nah de Uplöösen vun de Band 1979 hett he meest blots noch Klarinett speelt. He is denn up Festivals uptreden (as dat Newport Jazz Festival, dat vun Nizza, Edinburgh un dat North Sea Jazz Festival), up Jazzpartys un mit de „New York Jazz Repertory Company“ ünner Dick Hyman. 1991 keem dat mit Wilber to en „Summit Reunion“. In den 2000er Johren nehm he eenig Alben up Arbors up, an de ünner annern Ken Peplowski un Tony DeNicola mitwarkt hebbt.

1978 nehm he mit Steve Lacy (de he noch ut de Dixieland Szene vun de 1950er kennen dee), Paul Motian un Steve Swallow dat Free Jazz-Album „Unexpected“ up.

2001 wurr he Ehrendokter vun dat Hamilton College in Clinton in New York. Davern is an en Hartanfall in sien Huus in New Mexico storven.

Weblenken[ännern | Bornkood ännern]