Kayano Shigeru

Vun Wikipedia
Wesseln na: Navigatschoon, Söök

Shigeru Kayano (* 15. Juni 1926 in Nibutani; † 6. Mai 2006 in Sapporo) weer en Politiker in Japan, de sik för de Saak vun de Ainu-Minnerheit insett hett, to de he tohöör.

Kayano is in dat Dörp Nibutani op Hokkaido boren. Sien Familiennaam weer Kaizawa, aver he hett denn den Naam vun siene Tant annahmen. He harr en mehr swore Kindheit un sien Vader hett drunken; dat he wat vun sien Kultur un Spraak as Ainu mitkregen hett, de dor al ünner sworen Druck dör dat Japaansche stünn, dat keem vör allen dör de Grootmoder.

Ok wenn he keen grote Schoolutbillung kregen hett, hett he sik mit de Kultur, Kunst, Spraak un Historie vun de Ainu beschäftigt. He hett mehr as 100 Böker över de Ainu schreven, dorvun alleen 28, in de he Yukars sammelt hett, un hett ok veel bidragen, dat se 1972 in Nibutani dat Museum för de Kultur vun de Ainu opmaakt hebbt. Ok to dat Grünnen vun 15 Ainu-Spraakscholen hett he en groten Deel bidragen.

Kayano weer de eerste Ainu, de en Sitt in’t Japaansche Parlament kregen hett. He weer fief Amtstieden in’t Ünnerhuus un hett denn för de Sozialdemokraatsche Partei en Sitt in’t Huus vun de Rääd kregen, de free worrn weer. Dor weer he denn vun 1994 bet 1998 in. In’t Parlament hett he ok fakener mal Fragen op Ainu stellt. Dat Japan 1997 en Gesett rutgeven hett, dat de Kultur vun de Ainu wohren helpen schull, dor harr he ok groten Verdeenst an.

Kayano hett ok den Protest gegen den Nibutani-Damm anföhrt, de Land överfloten schull, dat de Ainu hillig weer. Ok wenn he keen Spood harr un de Damm boot worrn is, hett dorbi doch tominnst dat eerste Maal en Gericht goodkennt, dat de Ainu de Oorinwahner vun Hokkaido sünd.

2006 is Kayano vun Lungenentzündung doodbleven.