Karpatendüütsche Partei
De Karpatendüütsche Partei (hoochdüütsch Karpatendeutsche Partei) weer ene Partei för de karpatendüütsche Volksgrupp in’e Tschechoslowakei un’n slowaakschen Staat 1928 bet 1945.
De Partei is in’n Juli 1928 ünner Leid vun ünner annern Roland Steinacker, Karl Manouschek, Sigmund Keil un Franz Karmasin grünnt worrn. De Partei schull de Saak vun de Karpatendüütschen polietsch un kulturell vertreden (vun bi dree Millionen Slowaken weren üm un bi 125.000 Düütsche). Bi de Wahl 1929 kunn de Partei nich in’t Parlament intehn. För de Wahl an’n 19. Mai 1935 hebbt se mit de Sudentendüütsche Partei vun Konrad Henlein en Wahlbündnis slaten un in’n November sogor ene Union billt un sik disse Partei ok organisatoorsch angliekt. Vörsitter weer Henlein un Karmasin weer sien Viez för de Slowakei. Bi de Wahl harr de Partei 84 % vun de Stimmen ut de düütsche Volksgrupp kregen. Sigmund Keil weer nu Senator in’t Parlament un Karmasin Afordnter.
1938 is de Partei mit twee Afornte, Karmasin un Josef Steinhübl, in’t Parlament intagen. De Partei harr vun Oktober 1938 af an den Naam Düütsche Partei. In’n unafhängigen slowaakschen Staat vun 1939 af an stell de Partei en Staatssekretär, de toglieks Schoolminister för de düütsche Volksgrupp weer. Nadem de Partei sik na de Unafhängigkeit vun de Sudentendüütsche Partei trennt harr, is Karmasin Vörsitter worrn. Mit dat Enn vun’n Tweten Weltkrieg un de Flucht un dat Verdrieven vun de Düütschen is dat ok mit de Partei toenn gahn.