Küssenlava

Vun Wikipedia
Wesseln na: Navigatschoon, Söök
Küssenlava an’n Seebodden

Küssenlava (in de eerdwetenschopplichen Fachspraak faken mit dat engelsche Pillowlava betekent) is Lava mit en sünnere butere Form, de bi’t Utströmen ünner Water tostannen kummt. Dat kummt vör allen in de See vör. Den Naam hett se vun wegen de küssenordige Form un’t Utsehn.

Küssenlava is so’n beten wat glasordig. Dat kummt dorvun, dat de hitte Lava bannig gau afköhlt dör dat Water, wat en düchtig goden Warmsleider is. Dat geiht ünner Water alln’s veel gauer as an de Luft. Wenn de Lave mit dat Seewater in Kontakt kummt, denn billt sik an de afköhlten Böverflach vun de Lava en taachplastische Masse ut Steenglas. Binnen dat Küssen, ünner de Krust köhlt de Lava düüdlich langsomer, wieldat de Steen sülvst de Warms veel slechter leiden deit. Dor entsteiht denn kristallin Steen. Dicht ünner de Krust entsteht dorbi eerstmol radial anordente Kränz vun Gasblasen, de tostannen kamt, wenn de Lava an de Böverflach kamen deit un dorbi druckentlast warrt. Dat föhrt neemlich dorto, dat Gas ut de Smölt rut geiht. Wenn noch mehr Lava naströmen deit, ritt de dünne Glasköst an en swackeSteed apen un wietere Küssens warrt billt. De enkelten Küssens hebbt Grötten vun 0,2 bit 1 m, de tohopen an’n Seebodden Schichten vun bit to 1 km tügen künnt.

Küssenlava is en seker’t Teken för Vulkanismus, de ünner Water stattfunnen hett. Se sünd in’n Wieteren ok en bedüdenden Bestanddeel vun Ophiolithen, de in de Geologie as Henwies op ozeaansche Eerdköst ansehn warrt.