Joseph Antoine Ferdinand Plateau

Vun Wikipedia
Joseph Antoine Ferdinand Plateau

Joseph Antoine Ferdinand Plateau (* 14. Oktober 1801 in Brüssel; † 15. September 1883 in Gent) weer en belgisch-walloonschen Physiker un Pionier vun de Fototechnik.

Leven[ännern | Bornkood ännern]

Plateau hett fröh sien Öllern verloren. He besöch dorna twüschen 1817 un 1822 dat Atheneum in Brüssel un wessel denn an de Universität Lüttich. Eerst hett he Rechtswetenschoppen un Spraken studeert, later denn aver op de Naturwetenschoppen wesselt. In’t Johr 1827 keem he torüch na’t Atheneum, woneem he Schoolmeester för Mathematik worrn is. Dat glieke Johr hett he ok sien eersten wetenschopplichen Publiaktschonen maakt mit de Titels „Construire un angle équilatéral qui ait ses sommets sur trois circonférences données“ un „Sur les sensations produites dans l'oeil par les différentes couleurs“, in de he sik mit dat visuelle Wohrnehmen vun de Minschen befaat hett.

Een Johr later, 1828, weer Plateau gewohr, wat de engelsche Dokter Peter Marc Roget faststellt harr. De harr neemlich as eerste beschreven, wat vundaag as Stroboskopeffekt bekannt is.[1] To dit Thema hett Plateau en Afhanneln mit den Titel „Dissertation sur quelques propriétés des impressions produites par la lumière sur l'organe de la vue“ schreven, mit de he 1829 sien Dokter maakt hett. Dorbi hannel sik dat togliek ok üm de eerste naturwetenschoppliche Dissertatschoon an de Universität Lüttich, de in franzöösche Spraak verfaat weer an Steed vun Latiensch.

In’t Johr 1932 later harr he den Infall, „dat Stroboskop mit 16 Teknungen vun en Danser to fodern, de gegen’nanner jümmer üm een Bewegungsphaas schaven weern un na sössteihn Phasen wedder in de Utgangsstellung münnen de.“[2]. Disse Reedschop is vundaag as Phenakistiskop bekannt, dat Plateau in twee vun sien Schriften dorstellt hett. De Maler Jean Baptiste Madou hett de Biller för dat Phenakistiskoop maalt, de tosamen mit de Reedschop vun Ackerman in London af 1833 ünner de Beteken Fantascope, as ok vun Alphonse Giroux in Paris as phénakisticope un later as phénakistiscope vermarkt worrn is. Dat Phenakistiskop gellt as Vörlöper vun’n Filmprojekter.

Plateau güng 1835 an de Universität Gent, woneem he toeerst Physik lehren de un sik later op Experimentalphysik un Astronomie spezialiseert hett. Een Johr later hett he dat Anorthoscop vörstellt.

Twüschen 1843 un 1844 hett Plateau sien Ogenlicht verloren. Dat weer en Naklapp vun optische Experimenten to Nabiller op de Netthuut, de he al 1929 maakt harr. Dorbi harr he lang in de Sünn keken. Liekers hett he noch ümfaten Beschrieven vun sien egenen Blindheit publizeert. He geev an, dat he noch Johren, nadem he blind worrn is, „visuelle Sinnindrück“ hatt to hebben. To sien letzten Publikatschonen tellt en Ünnersöken to Kapillarkräft un Böverflachspannung, de 1873 rutkeem. In disse Arbeit stellt he de Beschrieven vun de Struktur vun Sepenblasen in Schuum op, de as Plateau sien Regeln bekantn worrn sünd. Sien Ünnersöken hett noch lang in de mathematischen Theorie vun de Minimalflachen nawirkt. Na em is hier dat Plaetau-Problem nöömt worrn.

Plateau is 1883 in Gent doodbleven un weer op den Karkhoff vun Mariakerke bisett.

Warken[ännern | Bornkood ännern]

  • Joseph Antoine Ferdinand Plateau, Mémoire sur l'irradiation, Brüssel 1839
  • J. A. F. Plateau. Statique experimentale et theorique des liquides soumis aux seules forces moleculaires. (Gauthiers-Villars, Paris, 1873).

Borns[ännern | Bornkood ännern]

  1. Wilhelm Formann: Österreichische Pioniere der Kinematographie. Bergland Verlag, Wien 1966, S. 9
  2. Friedrich Kittler: Optische Medien. S. 205

Weblenken[ännern | Bornkood ännern]

Joseph Antoine Ferdinand Plateau. Mehr Biller, Videos oder Audiodateien to’t Thema gifft dat bi Wikimedia Commons.