John McCain

Vun Wikipedia
John McCain

John Sidney McCain III (* 29. August 1936 up de Militärbasis Coco Solo in de Panamakanalzoon; † 25. August 2018 in Cornville, Arizona) weer en US-amerikaansch Politiker (Republikaansche Partei). Vun 1987 af an is he US-Senator för den Bundsstaat Arizona. In dat Johr 2000 is he antreden as Kannedat to’n US-Präsidenten, man he hett dormols de Vörwahlen verloren gegen George W. Bush. John McCain is ok bi de US-Präsidentenwahl 2008 de republikaansche Kannedat ween un is gegen Barack Obama vun de Demokraten antreden. Bi de Wahlen an'n 4. November hett he avers düütlich verloren. He hett in’n Vietnamkrieg as Pilot vun US-Navy-Jagdbombers mitmaakt. Vör en Reeg vun Johren is he Kriegsgefangenen ween.

Leven[ännern | Bornkood ännern]

Kinnertied un Jugend[ännern | Bornkood ännern]

He is as Söhn vun John S. McCain, Jr. (1911–1981) un Roberta Wright McCain (* 1912) in de Panamakanalzoon to’e Welt kamen. Dormols hefft de USA dor dat Seggen harrt. He hett twee Geswister: Sandy McCain Morgan un den Schauspeler Joe McCain (*1942). Sien Vadder un ok sien Grootvadder John S. McCain, Sr. sünd Admiral bi de US-Marine ween. Bit he tein Johr oolt ween is, hett he unnerscheedliche Scholen up Militärstützpunkten besöcht. Na dat Enne vun den Tweeten Weltkrieg is de Familie McCain 1946 na Noord-Virgina hentagen. Vun 1949 af an güng dat wedder dör verscheden Militärstützpunkten dör, alltohopen hett John McCain bi 20 verschedene Scholen besöcht.[1] 1951 füng he an un besöch de Privatschool Episcopal High School, de hett he 1954 afslaten. Just so, as Vadder un Opa güng he denn na de US Naval Academy.

Vietnam-Krieg[ännern | Bornkood ännern]

McCain hett as Marinefleger bi den Vietnamkrieg mitmaakt. An’n 29. Juli 1967 seet he just in’t Cockpit vun en A-4E Skyhawk, as de Fleger vun en Zuni-Rakeet drapen wurr, de ut Versehn losgahn weer. De Fleger fung an to brennen, man em is dat slumpt un he konn dor rutkamen. 90 Sekunnen later hett dat en Keddenreaktschoon geven, as Munitschoon un Benzin in’e Luft güngen. 134 Suldaten sünd dor bi ümkamen (kiek bi Forrestal-Katastrooph). An’n 26. Oktober 1967[2] is he mit sien Fleger afschaten wurrn, as he bi Hanoi en Waterkraftwark angriepen dö. He is in Gefangenschup bi de Noordvietnamesen kamen. In dat gruulige Lager Hanoi Hilton is he foltert wurrn un sien Liev hett dor so een bi wegkregen, dat he hüdigendags noch nich wedder ganz gesund is. [3] De Vietnamesen wollen em an un for sik fröher freegeven, wiedat he de Söhn vun en Admiral weer. Man he meen, dor wull de Fiend bloß en goden Indruck mit maken un speel dor nich mit. So is he eerst an’n 14. März 1973 wedder free kamen. 1981 is he denn ut de Navy uttreden. He harr dat bit to’n Käpt’n bröcht. Ok Utteknungen hett he kregen: Den Silver Star, Bronze Star, Legion of Merit, dat Purple Heart un dat Distinguished Flying Cross.

Familie[ännern | Bornkood ännern]

John McCain hett veer egen Kinner un twee Adoptivsöhns ut twee Ehen. Toeerst weer he vun 19651980 mit dat Model Carol Shepp verheiraat’. Dor hett he de Dochter Sidney McCain (*1966, maakt in Musik) un de beiden annahmen Söhns Doug (*1959, Pilot) un Andy McCain (*1962, Viezpräsident vun Hensley & Co.) vun. An’n 17. Mai 1980 hett he to’n tweeten Mol heiraat. Sien Fro weer Cindy Hensley McCain (*1954, Vörsittersche in’n Upsichtsraat vun Hensley & Co.). Mit ehr is he bit up den hüdigen Dag tosamen un de beiden hefft de Kinner Meghan McCain (* 1984; Journalistin), John Sidney „Jack“ McCain IV. (* 1986; Naval Academy), James „Jimmy“ McCain (* 1988; Marine Corps) un Bridget McCain (* 1991), en annahmen Dochter ut Bangladesh. stammen. Midderwielen is John McCain al veer mol Grootvadder wurrn.

Politik[ännern | Bornkood ännern]

1982 is John McCain för Arizona in dat US-Repräsentantenhuus wählt wurrn. 1984 is he dor noch mol för wählt wurrn. 1987 keem denn de Wahl to’n US-Senat för Arizona. Dor is he bit up den hüdigen Dag.

In’n Senat sitt McCain unner annern in den „Strietkräft-Utschuss“ un in den „Utschuss för Hannel, Wetenschop un Verkehr“.

In’n Oktober 2005 hett de US-Senat mit 90:9 Stimmen en Vörslag vun McCain to en Gesett annahmen, wo dat verbaden weern scholl, mit Gefangenen up ene Wiese ümtogahn, de „gruulich (un) unmenschlich (is) un so mit jem ümgeiht, as ob se nix weert weern“. An’n 13. November hett he bi CBS seggt, woll weern Terroristen „dat Böse an sik, man dat geiht nich üm jem, dat geiht üm us. Wi staht in en Striet üm dat, wat för us gellen schall.“ Dor höör nu mol ok to, dat een sik an de Minschenrechten höllt, „ganz egol, wie förchterlich use Fienden ok ween schollen“. Dat Gesett över dat Verboot vun Folter konn avers denn doch nich rutgahn, vunwegen dat George W. Bush dor sien Veto gegen inleggt harr.

Präsidentenwahl 2008[ännern | Bornkood ännern]

John McCain will Präsident weern, 2007

Vör de Vörwahlen is bi en ganze Reeg vun US-amerikaansche Ümfragen rutkamen, dat McCain wedder en mööglichen Kannedaten vun de Republikaners för dat Amt weer. In’n Vörjohr 2007 hett he in en CBS- Interview klaarstellt, dat he antreden warrt. Henry Kissinger, Alexander Haig, Georg Shultz un Lawrence Eagelburger, de al mol US-Butenminister ween sünd, hefft sik achter em stellt.

McCain meent, mit den Irak-Krieg weer dat an sik en richtige Saak, man George W. Bush pack dat verkehrt an. He meen, dor mössen mehr Suldaten hen, denn kunn een de Problemen ok beter unner kriegen. So is dat denn amenne ok kamen. En Bericht vun de US-Strietmacht snackt nu dorvun, dat vunwegen de tosätzlichen Suldaten, de na’n Irak stüert wurrn sünd, de Sake dor nu düütlich beter lopen dö.[4][5].

Bi de eersten Vörwahlen in Iowa is McCain bloß Veerten wurrn. Man denn hett he de Vörwahlen in New Hamsphire, South Carolina un Florida wunnen. Na en Ümfraag vun de Washington Post an’n 14. Januar 2008 weer McCain in de ganzen USA al vör Mike Huckebee un Mitt Romney. Ok de annere Kannedat Ron Paul keem dor nich mit.

De vörmolige Börgermeester vun New York, Ralph Giuliani hett na de Vörwahlen in Florida Bott geven un seggt, he wull sik nu för McCain siene Sake insetten. Ok Arnold Schwarzenegger meen, he stünn achter McCain. Schwarzenegger is Gouverneur vun Kalifornien.

Na den „Super Tuesday“ wurr allgemeen seggt, dat McCain dat Rennen nu maken wörr. An’n 7. Februar 2008 hett Pomney denn Bott geven un bloß Huckebee bleev noch Gegenspeler. An’n 4. März 2008 hett McCain de Vörwahlen in Ohio, Texas un Vermont wunnen. Dor harr he denn siene nödigen 1.191 Afordenten för den Wahlparteidag mit tohopen. Nu geiht he gegen Barack Obama in’t Rennen um dat US-Präsidentenamt. An'n 29. August 2008 hett he bekannt maakt, dat de Gouvernöörin vun de Bundsstaat Alaska, Sarah Palin, sien Viezpräsidentsche weern schall. Dor hett dat ut dat Lager vun Barack Obama allerhand Schandaal üm geven.

Henwies[ännern | Bornkood ännern]

  1. McCain's WMD is a mouth that won’t quit, USA Today, November 2007
  2. http://www.npc.navy.mil/NR/rdonlyres/330F85C7-5982-4B09-A46A-373964430AFB/0/Document.pdf
  3. http://www.welt.de/politik/article740982/McCain_steigt_ins_Rennen_ums_Praesidentenamt_ein.html
  4. US Army: „Security Efforts, Iraqi Government Improvements Spur Economic Growth“ (27. August 2007)
  5. Fox News: „U.S. Mideast Commander: Violence in Iraq Down Dramatically, but Gains Not Irreversible“ (4. März 2008)

Warken[ännern | Bornkood ännern]

Literatur[ännern | Bornkood ännern]

Weblinks[ännern | Bornkood ännern]

John McCain. Mehr Biller, Videos oder Audiodateien to’t Thema gifft dat bi Wikimedia Commons.