Johanniterorden

Vun Wikipedia
Wesseln na: Navigatschoon, Söök

De Johanniterorden (de ganze Naam heet Balley Brannenborg vun den Ridderorden Sankt Johannis vun dat Spital to Jerusalem, nömmt Johanniterorden) is vun dat Johr 1538 af an en protestantsche Ordensgemeen. Se geiht torüch up den christlichen Ridderorden vun de Johanniters oder ok Hospitaliters, de in de Tiet vun de Krüüztöög in dat Johr 1099 grünnt wurrn is. Düsse Orden hett siene Wuddeln in dat Hospital to'n Hilligen Johannes, dat al en Reeg vun Johren vördem vun italieensche Kooplüde in Jerusalem grünnt wurrn weer. He is de öllste Ridderorden, den dat hüdigendags noch geven deit.

In de Tiet vun de Reformatschoon hett he sik upspleten in den evangeelschen Twieg, wat de hüdige Johanniterorden is un en kathoolschen Twieg, de hüdigendags den Naam Malteserorden dregen deit.

Dat Woort „Balley“ in den vullstännigen Naam geiht torüch up de vörmolige Ballei (Provinz) Brannenborg vun düssen Orden. Hüüttodaag heet bedutt dat ok de böverste Eenheit vun den ganzen Orden.

Deel vun den Johanniterorden sünd de Johanniter-Unfall-Hölp, de in allerhand Länner arbeiden deit (1,4 Mio. Liddmaten in Düütschland), de Johanniter-Hölpsgemeenschoppen, de Johanniter-Süstern un en Reeg vun Krankenhüser un Pleeghüser. De Orden heet sien Seet in Potsdam. Över de ganze Welt hen gifft dat 18 Kommenden (Vereenigungen) mit 3.900 Ridders. De hüdige Baas is de „Herrenmeester“ Oskar Prinz von Preußen. He föhrt den Orden vun 1999 af an.

De Johanniterorden un siene düütschen Gruppen maakt en Deel ut vun de Evangeelschen Karken in Düütschland (EKD). So is dat in den Schutzbreef vun den dormoligen EKD-Vörsitter, Bischop Theophil Wurm an'n 2. Mai 1947 afmaakt wurrn.