Johann Vasmer

Vun Wikipedia

Johann Vasmer (* üm un bi 1365; † 20. Juni 1430) weer Börgermeester in Bremen.

Johann Vasmer stamm woll ut Mellinghusen bi Sulingen in de Graafschup Hoya. In dat Jahr 1389 is he Bremer Börger wurrn un hett den Eed afleggt. 1417 keem he in den Root vun de Stadt. 1422 is he Börgermeester wurrn. Vunwegen allerhand Döreenanner mit upsternaatsche Börgers hett Vasmer de Stadt Bremen in’n Mai 1430 verlaten. He slaat sik anner Maaten vun den Rat an, de ok ut de Stadt weggahn weern un nu in Stood seten. As he vun dor ut nah Ollnborg reisen wull, hefft em de Bremers in Rekum an’n 6. Juni 1430 upgrepen, as he just över de Werser gahn wull. In Bremen hefft se em anklaagt vunwegen Hoochverraat. De Rat hett em verordeelt, de Stadtvogt hett sien Ja to düt Ordeel geven un denn hett de Henker em an’n 20. Juni 1430 up enen Möhlenbarg bi dat Osterdoor buten de Stadt den Kopp afneiht. Later hett sien Söhn de Stadt Bremen bi Kaiser un Riek anklaagt. De Stadt möß dat denn wedder gootmaken un een Krüüz upstellen an de Stäe, wo se em to Dode bröcht hefft. Düt Vasmer-Krüüz steiht hüdigendags noch in dat Bremer Osterdoor-Viddel in de Straat „Am Steinernen Kreuz“.