Johann Thies

Vun Wikipedia

Johann Thies (* 5. Oktober 1898 in Bremen; † 12. November 1969 in Veern) weer en düütschen Pädagoog un Politiker von de CDU.

Thies is 1898 in Bremen boren. Na Volksschool, Präparandenanstalt un Seminar hett he toeerst as Schoolmeester an de Volksschool arbeidt. In’n Eersten Weltkrieg weer he Soldaat. 1929 hett he de Prüfung as Schoolmeester för de Middelschool maakt. Blangenbi hett he ok Böker över Pädagogik un över Geopolitik schreven. Na de Machtergreifung von de Natschonalsozialisten hett he 1933 sien Arbeid as Schoolmeester in Hemelingen verloren un weer denn in de fre’e Weertschop. Op Inladung von de Regeren von Jugoslawien hett he 1937 en geopolietsche Studienreis maakt. 1939 is he nootdeenstverplicht worrn un weer mit dat Leid över dat Ernährungs- un Weertschopsamt in Veern beopdragt. Thies weer siet 1949 Schoolraad in’n Landkreis Rodenborg un 1956 Bundsvörsitter von’n Düütschen Lehrerbund.

Thies is 1952 Raadsherr in de Stadt Veern worrn un weer in’n Kreisdag von’n Kreis Veern. In’n Düütschen Bundsdag weer he von 30. Mai 1956 bet 1957. He is in’n Bundsdag rinkamen, nadem de Afornte Wilhelm Naegel doodbleven weer.

Thies weer 1945/1946 un wedder von 1961 bet 1964 Börgermeester von de Stadt Veern. En Tied weer he ok Landraad von’n Kreis Veern. Von November 1945 bet 1948 weer he Präsident von’n Regerungsbezirk Stood. In’n Januar 1948 is Thies denn vörhollen worrn, dat he in siene Ämter ole Natschonalsozialisten vörtagen un Antifaschisten to’n Nadeel behannelt hett. He is beurlaubt worrn un Werner Pollack hett dat Amt as Regerungspräsident övernahmen. Thies is later in’t Johr 1948 rehabiliteert worrn, hett dat Amt aver nich trüggkregen.

Thies hett an’n 28. Juni 1924 Margaretha Engel Ropers (26. Juni 1899-2. Juli 1972) freet. He liggt in Veern begraven.