Pella Sietas

Vun Wikipedia
(wiederwiest vun J.J. Sietas)
De Sietas-Warft
Luftbild von Cranz un de Warft

Pella Sietas is en Schippbo-Unnernehmen in Neefeld. Dat Unnernehmen sitt in Oolland achter den Diek an’e Elv, just dor, wo de Eest in dat Möhlenbarger Lock münnen deit. Up de Sietas-Warft weert blot man nee Scheepe boot. Wenn dor wat wedder up Schick brocht weern mutt, warrt dat up de Norderwarft maakt.

De Warft Pella Sietas hett sik 2014 billt, as de J. J. Sietas KG Schiffswerft GmbH u. Co. von de russ’sche Open JSC Pella Group övernahmen worrn is.

Geschichte[ännern | Bornkood ännern]

Bi de Sietas-Warft hannelt sik dat um de öllste Warft in Hamborg, de hüdigendags noch besteiht. Se is al 1635 vun Carsten Sietasch grünnt wurrn un tellt dor to de öllsten Bedrieve in Hamborg overhoop mit. Vun den eersten Dag af an is dat Unnernehmen jummerlos in Besitt vun de Familie ween un bit Anfang 2009 is dat in de negente Generatschoon bedreven wurrn. In de eersten Johre sund sunnerlich Boote un Kutters ut Holt boot wurrn, later sund dor denn Schoners, Briggs un annere grottere Scheepe tokamen. An’n Anfang vun dat 20. Johrhunnert is de Produktschoon jummers mehr vun Holt up Stahl umstellt wurrn. Vun de 1950er Johre af an weert up de Warft Scheepe in’n Sektschoonsbo feerdig maakt.[1].

Anfang März 2009 is vun den grottsten Geldgever, de HSH Nordbank, en neet Management insett wurrn, nadem de Warft mit de Finanzen nich mehr torecht kamen weer. Vördem weern de Priese for Stahl duchtig kladdert, wieldes de Raten for Containerscheepe slank afsackt sund. Bovenhen sund de Kosten verkehrt intaxeert wurrn. So hett de Warft nu to’n eersten Mol siet 1635 en Baas, de nich ut de Familie kummt.

MS Elysee, dat bither to leste Containerschipp vun de Sietas-Warft

Hüdigendags sund up de Warft um un bi 650 Mitarbeiders togange. Up en Flach vun um un bi 16 Hektar boot se verscheden Schippstypen. In de vergahn Johre sund toeerst mol lüttje bit middelgrote Containerscheepe boot wurrn. In’n Loop vun de Rezeschoon, de sik 2009 over de ganze Welt hen utbreedt hett, is dat sunnerlich mit de Containerfohrt bannig minne wurrn. J.J. Sietas hett dor mit to kriegen harrt, dat tahlrieke Scheepe wedder afbestellt wurrn sund un datt de Bestand an Updräge jummers mehr torüchlopen is. Dor hett sik de Warft denn vun den Containerschippbo losmaakt un will sik in de Tokumst sunnerlich mit den Bo vun Spezialscheepe afgeven. Dor höört Swaarlastscheepe, Fähren un Offshore Scheepe to, man ok enkelte Bodeele for grote Krüüzfohrtscheepe for de Meyer-Warft in Papenborg weert in Hamborg praat maakt. Dat leste Containerschipp bither to is in’n November 2009 feerdig wurrn.[2]. An’n 6. November 2009 is as 393. Containerfrachter en Schipp vun den Typ 178 aflevert wurrn.[3]. De Warft is dor bekannt for, datt se ehre Scheepe Typen-Naams gifft. So hett jede Generatschoon vun Feeders un annere Scheepe, de fökener boot wurrn sund, en Typ-Nummer, as to’n Bispeel de Typen 110 un 137. Hüdigendags boot de Warft mit den Typ 183 Swaarlastscheepe, de to de starksten vun’e Welt tohöörn doot. De Scheepe sund bestellt wurrn vun de Reederee SAL, de bitherto ehre ganzen Scheepe all up de Sietas-Warft boen laten hett. Dat eerste Schipp vun düssen Typ schall „Svenja“ heten un in’n November 2010 in Deenst nahmen weern.[4].

Sietas-Grupp[ännern | Bornkood ännern]

Blangen de Schippswarft höört ok noch düsse Unnernehmen to de Sietas-Grupp[5]:

Belege[ännern | Bornkood ännern]

  1. J.J. Sietas - Geschichte, upropen an’n 25. November 2010
  2. Deutsche Verkehrszeitung DVZ Nr. 103 vun’n 27. August 2009
  3. Sietas-Pressenarichten, upropen an’n 28. November 2010
  4. SAL-Flottenübersicht, upropen an’n 25. November 2010
  5. J.J. Sietas - Partner, upropen an’n 28. November 2010

Weblenken[ännern | Bornkood ännern]

Pella Sietas. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:53° 32′ N, 9° 47′ O