Israelsünndag

Vun Wikipedia

Israelsünndag warrt in dat Karkenjohr de 10. Sünndag na Trinitatis nömmt. De liggt tomeist in de Midden vun den Maand August.

De 9. Aw[ännern | Bornkood ännern]

De Israelsönndag is nich wiet af vun den 9. Dag vun den Maand Aw in den jöödschen Klenner. An düssen Dag denkt de jöödschen Gemeenden jummers an den Tempel in Jerusalem un wie de toschannen maakt wurrn is. Dat weer in de Johren 587 v. Chr. un 70 n. Chr. De 9. Aw is en trorigen Dag mit Fasten un Beden. Morgens wascht een sik nich richtig, man een maakt bloß sien Ogen en beten mit Water natt. Wenn Lüde sik up de Straat drepen doot, seggt se nich fründlich „Moin“ oder „Goden Dag“. In’n Goddesdeenst sitt de Lüde up siede Schemels un leest de trorigen Afsnitten ut de Klaagleeder.

Middelöller[ännern | Bornkood ännern]

Vun dat Middelöller af an sünd in den christlichen Goddesdeenst an düssen Dag de Geschichten ut de Bibel vörleest wurrn, de vun den Ünnergang vun Jerusalem vertellt un dorvun, dat de Tempel in Dutt haut wurrn is. De Kark hett dat dormols so verstahn, dat Gott de Jöden straaft hett, vunwegen dat se nich up em höört harrn. Wenn düsse Geschichten in de Karken vörleest wurrn sünd, denn scholl dat ok en Wohrschau ween, dat dat de Christenlüde nich just so geiht, as de Jöden, un dat se beter up Gott sien Woort hören schollen. Martin Luther hett dat just so predigt un he meen, de Jöden mössen jummers noch mehr lieden, wenn se sik nich amenn noch to den Gloven an Jesus Christus bekehren döen.

Hüdigendags[ännern | Bornkood ännern]

Vunwegen de Shoah un al de grulichen Saken, de in Düütschland vunwegen den Natschonalsozialismus gegen de Jöden in Gang sett wurrn sünd, hefft de verscheden Karken dortolehrt. Hüdigendags meent se, de Jöden, dat weern de ölleren Bröder vun de Christen. Dat Arv weer jem gor nich wegnahmen, bloß vunwegen dat nu noch lüttjere Kinner dortokamen weern. Jummers noch, so meent de Karken hüüttodaags, weern de Jöden Gott sien leve Kinner. An’n Israelsönndag scholl dorüm in de Karken över Israel predigt weern un hulpen weern, dat de Christlichen Gemeenden beter verstaht, wat dat mit dat Jödendom up sik hett.