Investmentfonds

Vun Wikipedia
Dat Hamborger Chilehaus höört en apenen Immobilienfonds to.

En Investmentfond, kortweg ok Fonds nömmt, is en Form vun de Geldanlaag. En Investmentsellschop (düütschen Fackbegreep: Kapitalanlagegesellschaft) sammelt dor dat Geld vun de Anleggers för, packt dat tohopen in en Investmentfond un investeert dat in unnerschedliche Anlagen. För dat Vermögen vun en Fond gifft dat keen Grenzen un för de Tahl vun de Andelen (Andeelsschien) ok nich. De Andeelsschiene könnt normolerwiese an jedeen Börsendag hannelt weern. De Pries steiht avers eerst een oder en paar Dage na de Koop- oder Verkooporder fast. Dat is anners, as bi Aktien. För de Aart vun de Geldanlaag sünd vördem al Regeln un Grundlagen upstellt wurrn. Na düsse Regeln warrt denn dat Geld vun de Anleggers utgeven, u. a. för Aktien, för Festverzinsliche Wertpapiere, an den Geldmarkt un/oder för Immobilien. To Grunne mutt bi Investmentfonds de Risikomix liggen. Dat ganze Vermögen vun en Fonds draff nich bloß in een Aktie oder in een Immobilie anleggt weern. Dat Risiko vun de Anlaag warrt lüttjer, je mehr dat Vermögen up verscheden Gegenstänn streiht is.

Jedereen, de Andelen vun en Fonds kopen deit, warrt Miteegner vun dat Fondsvermögen un he hett dor en Recht up, dat he sien Deel vun den Winnst utbetahlt kriggt un dat he sien Andelen wedder verkopen kann för den Pries, de denn gellen deit. Bi en apen Immobilienfonds sütt dat en beten anners ut: Hier höört dat Vermögen vun den Fonds de Investmentsellschop to. Dor warrt se ok üm as Eegner in dat Grundbook inschreven.

De Weert vun de Andelen warrt berekent, wenn een dat ganze Vermögen vun den Fonds dör de Tahl vun de Andelen delen deit. Dat Vermögen vun de Fonds liggt in de Hand vu n Lüde, de dat professionell maken doot. Na dat düütsche Recht hannelt sik dat um Sunnervermögen. Dat bedutt, dat de Anlagen striktemang ut'neen holen weern mütt vun dat Vermögen vun de Sellschop. So kann dat Fondsvermögen bestahn blieven, ok wenn de Sellschop in Insolvenz geiht. Neven de apenen Investmentfonds gifft dat ok slatene Fonds. Bi düsse Fonds könnt nich to jede Tied Andelen hannelt weern.

Kiek ok bi[ännern | Bornkood ännern]