Ildo Lobo

Vun Wikipedia

Ildo Lobo (* 25. November 1953 in Pedra Lume; † 20. Oktober 2004 in Praia) weer en kapverdischen Singer.

Ildo Lobo kummt ut en Familie vun Muskanten un Singers. Sien Vadder weer Antoninho Lobo, de ok en bedüden Singer ut Kap Verde weer. He gellt as een vun de beropensten Singers vun de lütte Inselrepubliek un sien Musik weer prägt vun klore Spraak un en stark politisch Insetten.

Johrelang weer Lobo Singer vun de Grupp Os Tubarões („De Haifisch“), de to de Tiet vun de marxistische Regeeren lang as de „offizielle“ Musikgrupp vun de Kapverden gellt hett. Dordör is he veel un faken in’t Utland reist, woneem he sien Land oder tomindst de Musik vun sien Land vörstellen schüll. Os Tubarões hebbt dorüm groden Andeel hatt, de kapverdische Musik mit jemher Funana-, Coladera- un Morna-Rhythmen weltwiet bekannt to maken. Dat sünnere an de Grupp weer, dat nümms vun de Muskanten vulle tiet Musiker weer – se all harrn annere Beropen. So ok Lobo, de an sik Tolloffizeer weer.

Sien eerst Album as Solo-Künstler hett Lobo 1996 op’n Markt bröcht, dat he in’n Andenken an sien Vadder opnahmen harr, de en poor Johren vörher doodbleven weer. Dat Album hett den Titel Nós Mornas un bargt ok blots Leder in Morna-Wies. Produzeert weer dat Album vun Mario Lucio, de to de Grupp Simentera höört, un opnahmen worrn is dat in Paris tosamen mit de besten Musikers vun’t Eiland Santiago. Sien tweet Album is 2001 rutkamen, wo ok olle Musikerfrünnen vun Ildo Lobo bedeeligt weern aver ok de Muskanten vun Cesária Évora.

Liekers dat Lobo gesundheitlich nich best toweeg weer, wat em ’n Tiet lang vun de Musik afhollen hett, güng he in’n Sommer 2004 wedder in’t Studio tosamen mit de Muskanten vun Cesária Évora. De Klavierspeler Fernando („Nando“) Andrade hett dat Album produzeert, dat den Titel Incondicional kregen hett. Dat weer ok de Titel vun en Morna-Leed, dat vun den jungen Schriever Constantino Cardos komponeert woorn weer, den he dormit ünnerstütten wull. Dat eerste Leed op dat Album is dat letzte, wat Ildo Lobo schreven hett.

Diskografie (as Solist)[ännern | Bornkood ännern]

  • 1996: Nós Morna
  • 2001: Intelectual
  • 2005: Incondicional

Websteden[ännern | Bornkood ännern]