Huus Plantagenet

Vun Wikipedia
Wapen vun Eduard III.

Dat Huus Anjou-Plantagenêt (frz. [[ɑ̃ˈʒu-ˌplɑ̃taʒə'nɛ]], engl. [[ɑːn'ʤuː-plæn'tæʤənɪt]][1]) füng an mit Gottfried V., Graaf von Anjou, de Plantagenêt nömmt wurrn is. He leev vun 1139 bit 1151. Vun 1144 af an weer he Hartog vun de Normandie. Dat Huus Plantagenet stell vun 1154 bit 1399 de Königen vun England.

Gottfried stamm ut dat Huus Château-Landon in Frankriek. He schall sik (bi Ridderturnieren) en Twieg vun'n Braambusch as Teken utsöcht hebben. Düsse Braamtwieg heet up franzöösch genêt un up latiensch genista. Dor hett he sien Binaam vun her.

De eerste Plantagenet, de König vun England wurrn is, weer sien Söhn Hinrich II. (1154). Em folgen denn noch seven annere Königen ut dat Huus Anjou-Plantagenet. Heinrich sien Mudder weer Mathilde vun England, de Dochter vun König Hinrich I. Üm den Throon vun ehren Söhn möss se lang gegen ehren Vedder Stephan vun Blois strieden. Heinrich II. grünn dat Angeviensch Riek, wat sien Naam vun Anjou kregen hett. Dor hören England un ok grote Delen vun Frankriek mit to. Man al sien Söhn Johann ohne Land hett de meisten franzööschen Länner al wedder verloren.

In dat Johr 1399 is König Richard II. ut dat Huus Plantagenet afsett wurrn. Nu sünd noch seven Königen ut annere Twiegen vun dat Huus an'e Reeg kamen. Dat weern de Twiegen vun dat Huus Lancaster un vun dat Huus York. As Richard III. vun York 1485 storven weer, folg dat Huus Tudor as Huus vun de Königen in England.

De leste Plantagenet, vun den de Geschicht wat vertellt, is woll Edward Plantagenet, 17. Earl of Warwick. He is 1499 henricht wurrn. Man dat gifft noch allerhand annere Nakamen mit annere Naams, as de Nakamen vun John of Gaunt mit siene Fründin un latere drüdde Fro Catherine Swynford. De Nakamen ut düsse Eh dreegt den Naam Beaufort, as (John Beaufort, Henry Beaufort, Thomas Beaufort un Joan Beaufort). De eerste König ut dat Huus Tudor, Heinrich VII. keem vunwegen siene Mudder ut de Beaufort-Familie un stamm dor ok mit vun dat Huus Plantagenet af.

Borns[ännern | Bornkood ännern]

  1. Daniel Jones: English Pronouncing Dictionary. Cambridge/New York/Melbourne: Cambridge University Press 1997. ISBN 3-12-539682-4