How to Make an American Quilt

Vun Wikipedia
Filmdaten
Plattdüütsch Titel:
Originaltitel: How to Make an American Quilt
Düütsch Titel: Ein amerikanischer Quilt
Produkschoonsland: USA
Johr vun’t Rutkamen: 1995
Läng: 112 Minuten
Originalspraak: Engelsch
Öllersfreegaav in Düütschland: FSK 6
Filmkru
Speelbaas: Jocelyn Moorhouse
Dreihbook: Jane Anderson
Whitney Otto (Roman)
Produkschoon: Laurie MacDonald
Deborah Jelin Newmyer
Walter F. Parks
Sarah Pillsbury
Midge Sanford
Musik: Thomas Newman
Kamera: Janusz Kaminski
Snitt: Jill Bilcock
Dorstellers

How to Make an American Quilt (op Platt so veel as „Woans en amerikaansch Quilt maakt warrt“; dt.: Ein amerikanischer Quilt) is de Titel vun en US-amerikaansch Filmdrama ut dat Johr 1995 mit Winona Ryder in de Hööftrull. De Film baseert op en Roman vun de Schrieversche Whitney Otto.

Inholt[ännern | Bornkood ännern]

Finn Dodd geiht op’t College un will nu endlich ehrn Magister aflsuten. Twee Arbeiten harr se al anfungen un nich to Enn maakt. Ehr Fründ Sam hett jüst üm ehr Hand anhollen, as se beslutt mehr Tiet för sik sülvst to bruken un ehr Semesterferien bi ehr Grootmudder Hy Dodd to verleven. De is na ehr Süster Glady Joe Cleary togen, as ehr Ehmann doodbleven weer. De beiden Fronslüüd sünd jüst dorbi mit jemehr Fründinnen de Arbeit för en ne’en Quilt vörtobereiten, as Finn ankummt. Se warrt wies, dat disse Quilt en Geschenk to ehr Hochtiet warrn schall un he dat Thema Woans de Leev wahnt hebben schall.

In de Delen vun den Quilt wüllt de Fronslüüd all en Deel vun jemehr egen Leevgeschichten inarbeiten, man twüschen jem gifft dat ok Striet un Arger. Wiel den Film warrt Finn na un na de Geschichten vun all de Fronslüüd gewahr, as se mit jem snackt. Un so warrt se wies, dat se dat all nich licht harrn und de Leev nich jümmer so graadut verlöpt, as een dat vermoden schüll. Finn warrt dordör unseker mit ehr egen Ansichten und ehr Plaans för’t Leven. Se glöövt al so nich an de Monogamie, vun wegen dat se dat vun Kind op nich anners kennt hett. Ehr Mudder Sally hett ehr dat sülvst so vörleevt, as se sik al kort ne ehr Geboort vun Finns Vadder scheedt harr.

As Sam ehr besöken kummt un över jemehr Huus snacken will, kamt se ok op en mööglich Kinnerzimmer to snacken. Finn föhlt sik dorbi ünner Druck un so gifft dat Striet twüschen de beiden. Man de Striet mit Sam is ehr tonah gahn un se versöcht em antoropen. An’t Telefon höört se aver de Stimm vun en Fro un glöövt, Sam geiht frömd. An een vun de hitten Soomerdaag gaht de beiden Fronslüüd mit Finn in’t Swemmbad, woneem se den jungen atheletischen Leon över’n Weg löpt. He verdreiht er den Kopp un se lett sik na en wieteret Drapen op en Sietensprung mit Leon in. Op disse Wies versöcht se ruttofinnen, wat se wohrhaftig mit Sam tosamenblieven will oder nich.

Dat fallt ehr nich licht, sik doröver kloor to warrn, wat se doon schall. Wiel se wieter de Levensgeschichten vun de ollen Fronslüüd höört un in ehr Studie verarbeit, kann se den Striet mit Sam to Enn bringen. Dat stellt sik ok rut, dat He gor nich in’n Huus weer, as se em anropen wull, un se woll en verkehrte Nummer wählt harr. As denn ehr Mudder to Besöök kummt, warrt de Saak kumplizeert. De neemlich vertellt, dat se wedder mit Finns Vadder tosamenkamen is un se noch eenmol heiraten wüllt. Dat bringt Finn ganz dörhen un se hett nu ok en slecht Geweten vun wegen ehrn Sietensprung, liekers dat se nu gewohr is, dat meist all Ehn, vun de se höört hett, op de een oder annern Oort mit Sietensprüng un verlaten Familien to kriegen harrn. As Leon ehr noch mol wedder besöken kummt, sütt sik Finn noch mol wedder versöcht, besinnt sik aver denn un lett em fohren.

To’t Enn vun Film sütt Finn een Morgen, as se opwaakt, en Kreih vör ehr Finster sitten. Ehr Quilt is in de Twüschentiet fardig worrn, un een vun de Fronslüüd hett ehr nachts in’n Slaap dormit todeckt. Se mutt an de Geschicht denken, de Anna ehr vertellt hett: Se weer en Kreih nalapen un harr dorbi ehrn Droommann kennen lehrt. Also neiht nu ok Finn mit ehrn Hochtietsquilt üm den Lief na buten un löpt de Kreih na. Dorbi finnt se Sam vör, de in de Nacht ankamen is un in sien Bus slapen hett. Nu warrt ehr sülvst ok kloor, dat se bi em blieven will.

Kritik[ännern | Bornkood ännern]

James Berardinelli hett op ReelViews schreven, dat de Inholt vun’n Film jüst so as’n Quilt weer. De Dorstellen, sünners de vun Winona Ryder, Anne Bancroft, Ellen Burstyn, Maya Angelou, Rip Torn, Claire Danes un Kate Capshaw hett he loovt, man de Tall vun de Figuren in’n Film weer to groot.[1]

Roger Ebert hett in de Chicago Sun-Times vun’n 6. Oktober 1995 schreven, dat em an’n dullsten de Levensgeschichten vun Marianna un Sally mitnahmen harrn. de mehrsten Figuren möken aver den Indruck, as weern se ut’n Gröschenroman noch mol bruukt. De Szeen, in de de Blööd vun Finns Diplomarbeit dör en Storm dör de Gorrns weiht warrt, weer nich wedder goot to maken. De Strom weer nich mehr as’n „plot device“ (En Saak also, de blots in’t Dreihbook steiht, üm de Geschicht vörantobringen).[2]

Utteken[ännern | Bornkood ännern]

De Film hett keen Filmpriesen wunnen, weer 1996 aver vör veer Utteken vörslahn, dorünner tweemol för den Image Award, neemlich Maya Angelou un Alfre Woodard as Beste Nevendorstellersches. De Filmbesetten weer för den Screen Actors Guild Award vörslahn, un Winona Ryder un Dermot Mulroney weern nomineert för den MTV Movie Award in de Kategorie Best Söten.

Borns[ännern | Bornkood ännern]

  1. Kritik vun James Berardinelli
  2. Kritik vun Roger Ebert

Weblenken[ännern | Bornkood ännern]