Horborg-Willemsborg

Vun Wikipedia

Horborg-Willemsborg weer en Stadt in’n Regerungsbezirk Lümborg von de prüüßsche Provinz Hannover, de in disse Form von 1927 bet 1937 bestahn hett.

Historie[ännern | Bornkood ännern]

De Stadt Hamborg, de an’t Noordöver von de Elv leeg un en egen Stadtstaadt billt, is in dat 19. Johrhunnert und to Anfang dat 20. Johrhunnert düchtig wussen. Op Eilannen in de Elv leeg Willemsborg, dat eerst 1925 de Stadtrechten kregen harr, un op dat Süüdöver de Stadt Horborg, de all beid to dat Königriek Hannover un siet 1867 to Prüßen höört hebbt. Horborg is vörher al grötter worrn, as 1888 de Gemenen Heimfeld un Wilsdörp, an’n 1. April 1906 Lauenbrook un an’n 1. April 1910 Eißendörp Deel von de Stadt worrn sünd.

Üm gegen de Weertschopskraft von Hamborg wat gegentosetten, wull Prüßen en grote Stadt an de Süderelv. Dorüm sünd to’n 1. Juli 1927 dör dat Ünnerelvgesett Horborg un Willemsborg to een Stadt tohoopleggt worrn. Tohoop harrn de beiden Öörd üm un bi 110.000 Inwahners un hebbt so en Grootstadt billt.

Horborg-Willemsborg is de Seet von de Kreisverwaltung von’n Kreis Horborg bleven, ofschoonst de Stadt nu en egen Stadtkreis billen dee un nich mehr Deel von’n Kreis Horborg weer.

Dör dat Groot-Hamborg-Gesett is Horborg-Willemsborg to’n 1. April 1937 Deel von Hamborg worrn. Dat weer toeerst noch en egen Gemeen op dat Rebeed von dat Land Hamborg, to’n 1. April 1938 is dat denn aver kumplett Deel von de Gemeen Hamborg worrn un hett dor den Bezirk Horborg billt.

De Kreisverwaltung von’n Kreis Horborg is noch bet 1944 in Horborg bleven. As de Verwaltung utbummt worrn is, hebbt se den Seet na Winsen leggt. Dor is he denn ok op Duur bleven.

Börgermeesters[ännern | Bornkood ännern]

Dat Amt as Börgermeester hett 1927 de vörherige Börgermeester von Horborg, Walter Dudek von de SPD, övernahmen. He hett dit Amt bet 1933 behollen, as na de Machtergreifung de Natschonalsozialisten an’n 11. März 1933 Dudek afsett hebbt. As kommissarschen Nafolger is Edzard Dyes insett worrn, de dat Amt bet Juni 1933 harr, as Ludwig Bartels von de NSDAP dat övernahmen hett. Bartels is bet 1937 Börgermeester bleven.

Wapen[ännern | Bornkood ännern]

Wapen von Horborg-Willemsborg

Dat Wapen von Horborg-Willemsborg wiest op sülvern Grund en rood Stadtdoor mit dree Toorns op. De Toorn in de Midd hett en blau Dack. Links un rechts blangen em staht twee blaue Lelen. De Müür hett en gollen Door, in dat en blau Lööw mit rode Tung steiht.

De Lööw steiht för de Hertög von Bruunswiek-Lümborg. Lööw un Door sünd ut dat Wapen von Horborg, de Lelen ut dat Wapen von Willemsborg.

De Bezirk Horborg hett dit Wapen 1938 denn övernahmen.

Ehrenbörgers[ännern | Bornkood ännern]

Blangen de Ehrenbörgers, de de Stadt 1927 von Horborg (kiek dor) övernahmen hett, sünd 1934 noch twee Lüüd Ehrenbörgers von Horborg-Willemsborg worrn: de Kommerzienraad Wilhelm Weber un de NSDAP-Gauleiter Otto Telschow. De Ehrenbörgerschop von Telschow is in’n Oktober 1945 wedder aferkannt worrn.