Holsteener Cox

Vun Wikipedia
Holsteener Cox

De Holsteener Cox (ok Vahldiek sien Samling 3, Geel Holsteener Cox) is en Sort vun’n Huusappel (Malus domestica).

Historie[ännern | Bornkood ännern]

De Holsteener Cox tellt to de ollen Appelsorten. He weer üm 1900 vun Johannes Vahldiek in Eutin, Sleswig-Holsteen as Samling vun’n Cox Orange togen. As Vahldiek doodbleven weer, sünd all tüchten, de in sien Goorn anfunnen weern, ünnersöcht worrn un weern na em nöömt un dörtellt. De Holsteener Cox hett dorbi de Beteken Vahldiek sien Samling 3 kregen.

Dör den Eutiner Goornbovereen is de Sort öörtlich verbreedt worrn un weer geern eten. Na’n Tweeten Weltkrieg hett de Landweertschopskamer Sleswig-Holsteen de öörtlichen Sorten nakeken, vun wegen wat se vun Gööd harrn un wo goot se to bruken weern. Vahldiek sien Samling 3 is to’n Vermehren un Utproven in’n Goorn- un Gewarfsanbo utwählt worrn, vun wegen dat sien Egenschoppen beter weern as de vun’n Cox Orange. In de 1950er Johren weer de Sort as Gelen Holsteener Cox in Sleswig-Holsteen verbreedt un weer op de Bundsgoornschau 1959 in Dortmund as „överragen“ beweert.

Egenorden[ännern | Bornkood ännern]

De Frucht hett en Dörmeter vun bit to 15 cm un wiest en gröön-gele bit rode Klöör op. Dat Fruchtfleesch is süerlich bit aromaatsch-smackhaft, wobi dat Aroma an den Cox Orange rankummt.

De Holsteener Cox is en Harvstappel. Enn vun’n Spetember is he riep to’n Plücken un tomeist af Oktober riep to’n Geneet. He kann bit Dezember lagert worrn, oder ok düütlich länger, wenn he goot lagert is. In’n Noorden vun Düütschland is de Sort wiet verbreedt un is een vun de Hööftsorten in’n Sleswig-Holsteenschen Appelanbo. De Boom is an’t fuchtig-kole Klima vun Noorddütschland anpasst, wiest sik robust un is mit en middlere Boddengööd tofreden.

Borns[ännern | Bornkood ännern]

  • Walter Hartmann: Farbatlas Alte Obstsorten. Eugen Ulmer, Stuttgart 2003.
  • Gustav Peters: Vahldieks Sämling ausgezeichnet in: Blätter für Heimatkunde - Eutin (Bilaag vun’n Ostholsteiner Anzeiger); Eutin 1959.