Hollveen

Vun Wikipedia
Wesseln na: Navigatschoon, Söök

De Hollvenen sünd twee grote Venen, de dat suerstoffarme Blood ut den Lief torüch na den rechten Hartvörhoff transporteert.

Vena cava inferior (blau)
(Gray's Anatomy of the Human Body 1918)

Disse beiden Venen sünd:

  • Bövere Hollveen (Vena cava superior), de dat Blood vun överall baven dat Dweerfell sammelt. Bi Deerten warrt se as vördere Hollveen (Vena cava cranialis) betekent.
  • Ünnere Hollveen (Vena cava inferior), de dat Blood vun överall ünner dat Dweerfell sammelt. Bi Deerten warrt denn vun de achteren Hollveen (Vena cava caudalis) snackt.

De Hollvenen hebbt bi’n Minschen en wesselnden Dweersnitt, jüst na de Laag vun’n Lief un dat intravasale Fletigkeitsvolumen, vun üm un bi 2 cm. De venöse Blooddruck binnen de Hollvenen liggt bi ruchweg 0 bit 15 mm Hg. Mehr dorto steiht ünner Zentral Venendruck.

De Hollveen entsteiht dör Versmölten vun de poorwies (links un rechts vun’t Rückgrat) anleggten Subkardinalvenen. Dorna sünd Normvarianten möglich. De fakenste form is de linkssietige Vena cava inferior, de faken in de Vena hemiazygos inmünnt. Agenesien oder deelwiese Agenesien sünd bi de Vena cava inferior roor un kommt tohopen mit en högere Neegen to Beenvenenthrombosen vör.

De Hollvenen laat sik goot mit Katheters sondeeren. Bito künt se ok mit ünnerscheedlichen Bildverfohren as Ultraschall, Phlebographie oder Reeknertomographie dorstellt un ünnersocht warrn.

De Hollvenen künnt dör Thrombosen oder Tumoren verslaten wesen. Se künnt ok vun buten komprimeert warrn.