Hera (Mythologie)

Vun Wikipedia
Wesseln na: Navigatschoon, Söök
Barbarini sien Juno in den Vatikan (Hera)
Kopp vun Hera
Kopp vun Hera

Hera (up Latiensch Juno) is en Göddin in de Greeksche Mythologie de Ehfroo vun Zeus. Hera is de Feminin-Form vun „Heros“ (Herr). Se paßt up de Ehn up un schützt de Froonslüde, de Kinner kriegt. Se is een vun de twolf Olympiers.

Vunwegen datt ehr Ehmann Zeus mit allerhand anner Wiefsbiller togange is, mutt sik Hera mit Ieversucht rümplagen. Faken gifft dat Theater twuschen ehr un ehren Mann wegen düsse Saken.

Hera in de Billerkunst[ännern | Bornkood ännern]

In Standbiller vun Hera, de wi ut de gullen Tiet vun dat ole Grekenland bloß man wenig hefft, sütt Hera tomeist just so ut, as Homer ehr beschreben hett: Grode, runne Ogen, de open staht („boopsis“= mit Kinnerogen). Se kickt streng, as een Königin. Dat Kinn steiht vör (dat bedutt, datt se weet, wat se will). Ehr Lief is de Lief vun een Froo, de al Kinner kregen hett, se driggt anstännig Kledaasch. Ehr Chiton is upstufft, bloß Hals un Arms sünd naakt. Een Kranz driggt se up’n Kopp („stephane“) oder ok een Sleier.

In ehr Hand driggt se den Granatappel. Dat is dat Teken vun een fruchtbar Eh’. Butendem gifft dat noch : Den Staff in ehr Hand as Teken vun’t Regeern, de „Patera“ (de Opperschaal) in’e Hand, de Pageluun ehr to Föten, de Kuukuuk, Blomen un Blöder.

Beröhmt weer de grode Statue ut Gold un Ivoor vun Polykleitos in ehren Tempel in Argos. Dor gifft dat hüde noch Biller up röömsche Münten vun. Hera seet dor up een Throon mit allerhand Smuck, dreeg een lüttje Kroon, wo de Chariten un de Horen up to sehn weern. In de een Hand höll se een Granatappel, in de annern den Staff, wo de Kuukuuk up sitten dö.


Weblinks[ännern | Bornkood ännern]

Commons-logo.svg Hera. Mehr Biller, Videos oder Audiodateien to’t Thema gifft dat bi Wikimedia Commons.