Henry Campbell-Bannerman

Vun Wikipedia
Wesseln na: Navigatschoon, Söök
Sir Henry Campbell-Bannerman

Sir Henry Campbell-Bannerman (* 7. September 1836 in Glasgow; † 22. April 1908 in London) weer en britisch Politiker un Premierminister van 5. Februar 1906 bit 3. April 1908.

Campbell-Bannerman wurr 1836 als Henry Campbell in Glasgow (Schottland) boren. Sien Vader weer Sir James Campbell, Lord Provost (etwa: Börgermeester) vun Glasgow, sien Moder weer Janet Bannerman. He hett de Glasgow High School, denn de Universität Glasgow un dornah dat Trinity College in Cambridge besöcht..

1868 wurr he as liberal Afgeordneter in’t Ünnerhuus wählt. 1884 is he in de Regeeren vun Gladstones as Minister för Irland in dat tweete Kabinett intreden. In Gladstones darde (1886) un veert (1892-1894) Kabinett un ok in Roseberys Regeeren (1894-1895) deen he as Kriegsminister. Sien gröttst Spood in disse Tiet weer, dat he de Hartog vun Cambridge, en Cousin vun Königin Victoria un Böverbefehlshaber vun de Truppen, to’n Rücktree bewegen kunn. Dordör wurr de Weg free för dringend notwennig Reformen vun de Armee free un Campbell-Bannerman wurr to’n Ridder slahn.

1898 wurr Sir Henry Nahfolger vun Sir William Vernon Harcourt as Föhrer vun de Liberalen in’ Ünnerhuus. Campbell-Bannerman harr de stuur Upgaav, de Partei, tosommen to hollen. Nah de Rücktree vun de konservativ Regeeren Balfour in’ Dezember 1905 wurr Campbell-Bannerman mit dat Upstellen vun en nee Regeeren beupdraagt. Lüüd vun de rechte Flögel vun sein Partei hebbt noch versöcht, hüm in’ Toog vun de so nömmt Relugas Compact in’t Böverhuus "aftoschuven", dat klapp aver nich. Stattdessen nehm Campbell-Bannerman en bannig starke Positschoon as Föhrer vun dat Ünnerhuus in, de noch starker wurr, as se bi de Wahl in Januar 1906 noch mehr Mandate dorto kreegen.

De Arbeid weer allerdings bannig stuur, wiels de konservativ Loord in’t Böverhuus de meest Reformvörhaben vun de Liberalen blockeert hebbt. He hett dat denn aber doch henkreegen, tosommen mit sien Butenminister Sir Edward Grey 1907 en Bündnis mit Russland to maken. in dat sülvig Johr wurr Campbell-Bannerman to’n Father of the House (Afgeordneter mit de längste nich ünnerbrooken Mandatstiet). Bit vandaag is he de eenzigst Premierminister, de disse Rull harr.

Kört Tiet later wurr he aver krank un is an 3. April 1908 vun sien Amt torüchtreden. Storven is he an 22. April 1908 in Downing Street No. 10. Sien Nahfolger as Premierminister wurr sien Schatzkanzler Herbert Henry Asquith.

Literatur[ännern | Bornkood ännern]

  • John A. Spender: "The Life of the Righ Hon. Sir Henry Campbell-Bannerman", New York 1969.