Helmuth Andreas Koch

Vun Wikipedia

Andreas Carl Hermann Koch (Helmuth Koch nöömt; * 17. September 1889 in Bremerhoben; † 2. Juli 1963 in Ilten) weer en düütschen Verwaltungsbeamten un Politiker von de DNVP, later CDU.

Koch is 1889 as Söhn von en Schippsinschenör in Bremerhoben boren. He weer op dat Gymnasium in Bremerhoben un hett denn an de Universitäten Freiburg, Leipzig un Wien Juristeree studeert. He weer Soldaat in’n Eersten Weltkrieg un is en poor Maal verwunnt worrn. 1920 hett he sien Dr. iur. maakt un 1921 dat 2. Staatsexamen. 1922 is he in’n breemschen Staatsdeenst gahn. He hett bi dat Amt Bremerhoben anfungen un weer dor Hülpsarbeider. In de Tied von de Weimarer Republik weer Koch in de DNVP. 1923 hett he den Amtshauptmann vertreden, hett dat Amt 1925 kommissarsch övernahmen un is 1927 richtigen Amtshauptmann worrn. 1937 müss he ut polietsche Grünn sien Amt afgeven. In’n Tweten Weltkrieg weer he Beamten in Gotenhafen (Gdingen). Na’n Krieg is he an’n 24. Mai 1945 von de US-amerikaansche Militärregerung as Böverbörgermeester von Wersermünn un as Baas von de Verwaltung von’n Landkreis Wersermünn insett worrn. Dat is he bleven, bet em an’n 2. Juli 1946 Gerhard van Heukelum as Böverbörgermeester aflööst hett. 1946 is he in de Verwaltung von dat Land Neddersassen anfungen un is dor 1948 Präsident von dat Landsernährungsamt worrn. Von 1950 bet 1954 weer he Regerungspräsident von’n Regerungsbezirk Lümborg. Koch weer nu in de CDU ringahn un hett von’n 6. Mai 1955 bet 5. Mai 1959 (drüdde Wahlperiood) as Afornten för den Wahlkreis Lümbog-Stadt in’n Landdag von Neddersassen seten. He weer in disse Tied von’n 26. Mai 1955 af an neddersassischen Finanzminister in dat Kabinett Hellweeg I. He is bet to’n 18. November 1957 Minister bleven, as em in dat Kabinett Hellweeg II August Wegmann as Minister aflööst hett. 1957 hett Koch dat Amt as Präsident von dat Bundsoberseeamt övernahmen.

Warken[ännern | Bornkood ännern]

  • Zwiespalt zwischen Wille und Erklärung bei der Aktienzeichnung. Dokterarbeid, Universität Griepswoold 1920