Heinbockel

Vun Wikipedia
Wapen/Flagg Koort

Wapen vun Heinbockel

Heinbockel
Laag vun Heinbockel in Düütschland
Basisdaten
Bundsland: Neddersassen
Landkreis: Stood
Samtgemeen: Olendörp-Himmelpoorten
Gemeen: Heinbockel
Inwahners: 758 (2013-01-011. Januar 2013)
Postleettall: 21726
Vörwahl: 04144
Geograafsche Laag:
Koordinaten:53° 34′ N, 9° 20′ O
53° 34′ N, 9° 20′ O

Karte

Heinbockel (hoochdüütsch Heinbockel) is en Dörp in de Gemeen Heinbockel (Samtgemeen Olendörp-Himmelpoorten) in’n Landkreis Stood, Neddersassen.

Geografie[ännern | Bornkood ännern]

De Naveröörd sünd Himmelpoorten in’n Noorden, Düünbeudel in’n Noordoosten, Wittenmoor in’n Oosten, Swing mit Swingerboom in’n Süüdoosten, Hogenoh in’n Süden, Willah in’n Süüdwesten, Siedlung Olendörp, Timmerlood un Sunn in’n Westen un Olendörp un Kuhla in’n Noordwesten.

Historie[ännern | Bornkood ännern]

In de Franzosentied von 1810 bet 1814 hett de Oort to de Mairie Olendörp in’n Kanton Himmelpoorten höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to dat Amt Himmelpoorten tohöört. Na 1885 weer dat in’n Kreis Stood un na 1932 denn Deel von’n ne’en grötteren Landkreis Stood.

De Oort is an’n 1. Juli 1972 tohoop mit Hogenoh Deel von de ne’e Gemeen Heinbockel worrn. Dorbi is denn de Samtgemeen Olendörp grünnt worrn, to de Heinbockel tohöört hett. Disse Samtgemeen harr Bestand bet to’n 1. Januar 2014, as de Samtgemeen Olendörp mit de Samtgemeen Himmelpoorten to de Samtgemeen Olendörp-Himmelpoorten tohoopgahn is.

In’n Eersten Weltkrieg sünd 19 Soldaten ut Heinbockel fullen oder vermisst un in’n Tweten Weltkrieg 28[1]. De Briten hebbt Heinbockel in’n März 1945 besett.

Inwahnertall[ännern | Bornkood ännern]

Johr Inwahners
1824-00-001824[2] 34 Füürsteden
1848-00-001848[3] 249 Lüüd, 50 Hüüs
1871-12-011. Dezember 1871[4] 326 Lüüd, 63 Hüüs
1910-12-011. Dezember 1910[5] 281
1925-00-001925[6] 304
1933-00-001933[6] 361
1939-00-001939[6] 350

Religion[ännern | Bornkood ännern]

Heinbockel is evangeelsch-luthersch präägt un höört to dat Kaspel von de Martinskark in Olendörp.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

Wapen[ännern | Bornkood ännern]

Dat Wapen för de fröhere Gemeen is 1948 von’n Gemeenraat beslaten un an’n 2. Februar 1949 vun’n neddersassischen Binnenminister goodkennt worrn.

Dat Oortswapen wiest in den böversten Deel en swatt Hünengraff in en gollen Schild. Dorto is en gollen Urn in’n grönen Schildfoot stellt.

De Gemeen hett dat Steenkamergraff, wat noch good bi de Reeg is, in ehr Wapen nahmen. De Urn wiest up Funnen ut de fröhere Historie un op de olen Öörd in düt Rebeet.

Düt Wapen hett de ne’e Gemeen Heinbockel 1972 ok övernahmen.

Kultur[ännern | Bornkood ännern]

En Denkmaal för de Fullenen ut de twee Weltkrieg’ steiht in Heinbockel op’n Karkhoff. Blangen de Fullenen ut Heinbockel sülvs is dat Denkmaal ok för ölven Lüüd dor, de ut de Oostrebeden kemen un de-ehr Familien na’n Tweten Weltkrieg as Verdrevene in Heinbockel ünnerkamen sünd.

Verenen[ännern | Bornkood ännern]

Heinbockel hett en egene freewillige Füürwehr. De eerste freewillige Füürwehr is an’n 20. Oktober 1901 grünnt worrn. De Wehr hett sik 1932 in’n Stried mit de Gemeen aver wedder oplööst. Dat hett denn kort en Plichtfüürwehr geven, bet 1933 en ne’e freewillige Füürwehr grünnt worrn is. 1946 hett de Füürwehr en Motorsprütt TS 8 köfft. En Sireen op dat Dack von de School hett de Oort 1951 kregen un 1963 en Löschfohrtüüg von VW.

Heinbockel hett mit’n SuSV Heinbockel ok en kombineerten Sport- un Schüttenvereen.

Weertschop un Infrastruktur[ännern | Bornkood ännern]

In’n Oosten von dat Dörp is 2001 dat Waterwark Heinbockel von’n Drinkwaterverband Stoder Land boot worrn.

De Naam Heinbockel is in de Ümgegend vör allen ok verbunnen mit den Musikladen Heinbockel, de in’n August 1974 apenmaakt hett un as Diskothek veel junge Lüüd ut de Öörd ümto antreckt.

Verkehr[ännern | Bornkood ännern]

De Kreisstraat 57 verbinnt den Oort mit de Bundsstraat 73 bi Düünbeudel in’n Noorden un mit de Bundsstraat 74 bi Hogenoh in’n Süden. De beiden Bundsstraten loopt bi Stood tosamen un de Bundsstraat 73 föhrt wieder na Hamborg. De Kreisstraat 72 geiht in’n Westen över Sunn un Timmerlood na Olendörp.

De nächste Autobahn is de Autobahn 26 (Afsnidd StoodHamborg). De Anfang von disse Autobahn in Stood (Opfohrt 2 Stood-Süüd) liggt so 14 Kilometer in’n Oosten von Heinbockel. De Opfohrt 47 Zittens op de Autobahn 1 (Afsnidd HamborgBremen) liggt 41 Kilometer in’n Süüdoosten.

De nächste Bahnhoff is in Hammah an de Nedderelvbahn von Cuxhoben na Hamborg, wat so bi söss Kilometer weg is.

Scholen[ännern | Bornkood ännern]

Heinbockel hett keen egen School mehr. De ole Volksschool hett 1975 dichtmaakt. Op Grund-, Haupt- un Realschool gaht de Kinner na dat Schoolzentrum Olendörp, op Gymnasium na de Vincent-Lübeck-School in Stood.

Infrastruktur[ännern | Bornkood ännern]

Dat Afwater warrt in dat Klärwark Olendörp klärt.[7]

Literatur[ännern | Bornkood ännern]

  • Bernhard Hellweeg, Friedrich Holst: Hügelgräber, Dörfer und Höfe. Die Geschichte der Dörfer Heinbockel und Hagenah. Dammann, Bliersdörp 1989

Footnoten[ännern | Bornkood ännern]

  1. http://www.denkmalprojekt.org/dkm_deutschland/heinbockel_wk1u2_ns.htm
  2. C. H. Jansen: Statistisches Handbuch des Königreichs Hannover. 1824, Sied 262: http://books.google.de/books?id=tG0AAAAAcAAJ&pg=PA262
  3. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 134: http://books.google.de/books?id=eOI-AAAAcAAJ&pg=PA134
  4. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 142: https://books.google.de/books?id=qTZDAQAAMAAJ&pg=RA2-PA142
  5. http://www.gemeindeverzeichnis.de/gem1900/gem1900.htm?hannover/stade.htm
  6. a b c http://www.verwaltungsgeschichte.de/stade.html
  7. http://www.twv-staderland.de/de/aeo/gebiet.html

Weblenken[ännern | Bornkood ännern]