Hapten

Vun Wikipedia
Wesseln na: Navigatschoon, Söök

Haptenen sünd lütte orgaansche Molekülen as to’n Bispeel Atrazin oder Digoxigenin. Se warrt to de Grupp vun de Antigenen rekent, ünnerscheed sik aver vun jem dordör, dat se alleen noch keen Immunreakschoon utlösen künnt. Dorto sünd se eerst in de Laag, wenn se an en Drägerprotein anbunnen sünd, wat ok as Hapten-Dräger-Prinzip betekent warrt. Se sünd nipp un nau also gor keen Antigenen, man Immunogenen.

Haptenen hebbt en bedüdene Rull bi’t Ünnersöken vun Immmunreakschonen vun’n Lief. De Immunoloog Karl Landsteiner hett mit jemehr Help nawiesen künnt, dat Antikörper hoochselektiv wesen künnt.

De Gefährlichkeit vun de Haptenen liggt dorin, dat se dör’t Anbinnen an spezifische Zellstrukturen, en Immunreakschoon utlösen künnt, de dorto föhrt, dat en sünnere Zellpopulatschoon tonichten maakt waart. In’n normalen Fall is dat Immunsystem in de Laag, liefegene Stoffen to kennen. Dör de Haptenen warrt disse Stoffen aver so verännert, dat se de Immunafwehr as Frömd vörkamt. Krankheiten, bi de dat Immunsystem egen Zellen angrippt un tonichten maakt, warrt Autoimmunkrankheiten nöömt.