Halfeiland

Vun Wikipedia
Wesseln na: Navigatschoon, Söök
Bispeel för en Halfeiland in Kroatien

En Halfeiland is en Landmasse, de to’n gröttsten Deel vun Water ümgeven is, aver an een Steed – ok bi Flood – noch op natürlichen Weg mit dat Fastland verbunnen is. Liggt dat Halfeiland in en Binnensee, snackt man ok vun en Binnenhalfeiland. Langtogen Formen vun Halfeilannen warrt faken ok as Landtung betekent. En sünneren Fall is de opspölte un sünners smalle Nehrung.

Definitschoon[ännern | Bornkood ännern]

  • En Halfeiland warrt vun dree Sieten vun Water ümgeven. Dat Water un ok de Verbinnen na dat Fastland mutt natürlich entstahn wesen. Bowarken hebbt dorop keen Influss: En künstlich anleggten Kanal, de en Halfeiland vun’t Fastland scheedt, maakt dorut keen Eiland. Un annersrüm warrt ut en Eiland, dat över en Brüch oder en künstlichen Damm duersom mit dat Fastland verbunnen is, dorüm keen Halfeiland. Somit blifft de Peloponnes en Halfeiland, ofschoonst dat dör den Kanal vun Korinth vun’t greeksche Fastland scheedt is, wieldat Sylt liekers de Verbinnen över den Hindenburgdamm en Eiland is.
  • Halfeilannen künnt mehrere Millionen Quadratilometer groot wesen, man se künnt ok so lütt wesen, dat de Läng un de (tomeist lüttere) Breed blots en poor Hunnert Meter opwiest. Wenn de Breed düütlich grötter as de Läng is, as t. B. bi Wales, seggt man dorto aver normalerwies nich mehr Halfeiland. Ok brede Vörbargens, de keen grote Läng hebbt un villicht ok blots dör Verlanden en Verbinnen billt hebbt, warrt allgemeen nich as Halfeilannen ansehn.
  • Halfeilannen kann dat ok op Eilannen sülvst geven. Bispelen dorvör sünd Grootbritannien un Irland. Un ok gröttere Halfeilannen künnt nochmol sülvst lüttere Halfeilannen hebben, de denn ok wedder Halfeilannen utbilln künnt. Dat gifft dat to’n Bispeel in Däänmark: JütlandDjurslandMols.
  • In’n Groten kann sogor en Kontinent en Halfeiland vun en gröttere Landmasse wesen, as dat bi Europa is. Dat is neemlich en Halfeiland vun Eurasien.