Guillaume Farel

Vun Wikipedia
Guillaume Farel

Guillaume Farel (ok Wilhelm Farel; * 1489 in Gap in de Dauphiné in Frankriek; † 13. September 1565 in Neufchâtel in de Swiez) weer en Reformator in de franzöösche Swiez un een Fründ un Mitarbeider vun Johannes Calvin.

Leben un Arbeit[ännern | Bornkood ännern]

De eersten Jahre[ännern | Bornkood ännern]

Farel hett in Paris studeert. He lehr bi den Humanisten Faber Stapulensis. Dor wurr he en övertüügten Folgsmann vun de Reformatschoon. 1521 güng he nah Meaux. De Bischop vun düsse Stadt, Guillaume Briçonnet, harr em dorhen ropen. Düsse Bischop woll den Globen in düsse Stadt mit Farel sien Hölp up bedächtige Aart reformeren. Man al 1523 möß Farel de Stadt verlaten un güng nah Straßburg, Zürich, Bern un Basel.

Reformator in de franzöösche Swiez[ännern | Bornkood ännern]

1524 hett he in Basel in en open Disputatschoon de Partei vun de Reformatschoon anföhrt. Dat güng um den Ünnerscheed twüschen de röömsch-kathoolsche un de protestantsche Karken. Dor hett he en Triumph öber siene Gegenspeelers fiert. Man dat duur nich lang, dor möß he de Stadt liekers verloten. Dor harrn siene Fienden för sorgt. Farel bröch de Reformatschoon denn nah Montbéliard (1525), Aigle (1526) un nah den ganzen Süüdwesten vun de Swiez, besunners nah Neufchâtel. Dor föhr he de Reformatschoon 1530 in.

Genf[ännern | Bornkood ännern]

Nah Genf is he 1533 kamen. Dor verdeffendeer he in een Disputatschoon öber den Globen in’n Januar 1534 de nee Lehr gegenöber de Stadt ehren Raat. He maak dat so goot, dat de Raat in’n August 1535 de Reformatschoon annehm.

Besunners wichtig för de Geschicht vun de Stadt Genf un för dat Fuddergahn vun de Reformatschoon weer dat, dat he in dat Jahr 1536 Calvin besnacken konn, dat he in Genf blieben scholl. Anunvörsik woll Calvin man bloß dör Genf dörreisen.

Neufchâtel[ännern | Bornkood ännern]

Man 1538 hett de Stadt Genf ehren Raat de beiden Mannslüe rutsmeten. He meende, dat Calvin un Farel dat mit de Reformatschoon nu doch to dull dreben. Dor hett sik Farel denn Neufchâtel utsöcht, um dor fudderhen to arbeiden. Man ok dor kenn he nix, wenn dat um siene Saak güng. Un so hett dat allerhand Unroh geben. As olen Mann hett Farel noch mol een ganz junge Deern heiraat. Döröber hett he sik mit Calvin vertöörnt, de meen, dat konn ja woll nich angohn. Later hefft se sik denn ober wedder verdragen.

Farel is faken nah Frankriek reist, üm dor wat för de Reformatschoon to doon. Tofredenheit un Roh kenn he nich. He weer een unruhigen Geist.

Wat he schreben hett, keem meist ut den Ogenblick un hett för de Theologie keenen besunnern Weert. Wat he över de Maten goot konn, dat weer snacken un predigen vun Gott sien Woort. Dor dreev em de glönige Iever.


William Farel. Mehr Biller, Videos oder Audiodateien to’t Thema gifft dat bi Wikimedia Commons.