Gravensteener

Vun Wikipedia
Wesseln na: Navigatschoon, Söök
Gravensteener Appels

De Gravensteener is en root-gelen kräftigen August-Appel.

De Sort weer 1669 as Tofallssamling opdeckt un stammt vermodtlich ut Gråsten (Gravensteen) an de Flensborger Föörd in’t däänsche Süüdjütland (Noordsleswig).

De Gravensteener is een vun de kostborsten Appelsorten in Europa. De Schaal is fien wassgeel mit karmesinrode Tippens un Streken, man dat gifft ok en Afoort, de roder is. Disse Rode Gravensteener is en Knospenmutatschoon. Dat Fruchtfleesch is saftig, fien würzt un hellgeel.

De Boom fallt dör en stark Wassdom op. Dat Holt is bruunroot, de Blööd sünd groot un glannig düstergröön. To’n Wassen bruukt de Gravensteener en bannig fuchtigen Bodden, de ok in’n Sommer nich dröög warrt. An’n leevsten wasst he in de Neeg vun Waterlööp un Diekränner. An’n besten weer för den Boom en milden, fuchtigen Lehmbodden. Mit to hooch Grundwater kann de Gravensteener aver nich good üm, un he bruukt en Laag, de gegen Wind schulen deit.

In Öösterriek, un sünners in de süüdlichen Steiermark, warrt disse Appelsort geern för de Produkschoon vun hoochweertige reinsortige Destillaten (Obstler) nahmen.

In Däänmark is de Gravensteener an’n 18. November 2005 dör den Minister för Nohren, Hans Christian Schmidt to’n „Natschonalappel“ maakt worrn, ofschoonst sien Marktandeel gegenöver annere Appel ut Översee düüdlich torüch gahn is.