Golden Delicious

Vun Wikipedia
Wesseln na: Navigatschoon, Söök
Golden Delicious Appel.

Golden Delicious is en Tafelaaftsort vun den Huusappel, de vundaag in'n gewarflichen Anbo in Europa en grote Rull speelt. De Sort is al üm 1890 rüm as Tofallssamling in West Virgina, USA, opdeckt worrn. De Golden Delicious is en Winterappel, de in'n Oktober oornt warrn kann un af Dezember riep is för'n Geneet. Köhlt kann de Frucht bit in'n Juli lagert warrn.

De Boom wasst an'n Besten op matig fuchtig Boddens un bruukt an'n leefsten warm Klima mit veel Sünnschien. Ünner diss Ümstännen bringt de Boom veel Büt. Vun wegen sien Anfalligkeit för Schorf is he för'n privaten Goorn nich antoraaten.

De Golden Delicious warrt geern eten un is dorüm en Produkt vun'n Massenanbo – ok in Rebeden, de för den Boom nich so egent sünd. Dat hett sien Roop schaadt un hett em to en Synonym för slechte Appelqualität maakt („Geel Wörger“). De meisten Appel, de vun disse Sort in'n Hannel to köpen sünd, warrt vun vele Lüüd as to sööt un to wenig aromaatsch ansehn. Bito warrt he em to Unrecht naseggt, dat he blots wenig Nehrstoffen bargen deit. De Golden Delicious is butendem nich sünners saftig.

In egent Redeben, as t. B. in de Hanglagen vun Süüdtirol oder an de Bargstraat kann de Golden Delicious aver woll en smackhaften Appel warrn. Ok dor warrt he teemlich sööt, entwickelt bi utreckend kole Nachten aver ok Süür un dat typpsch Aroma, dat en beten parfümeert wirken deit. So'n Appel wiest goldgele bit licht rosaklöörte Backen op. Dat disse Apple ok Aroma hebben kann, wiest sik ok dordör, dat in de nöömten Anborebeden en Aaftbrand ut de Sort maakt warrt, de jüst so as de Williams-Christ-Brand en unverkennbor Aroma hett.

De grote, wenn ok afnehmend Bedüden vun den olden Delicious för den Hannel kummt dorvun, dat de – afsehn vun de Schorfanfalligkeit – en licht to produzeerende Sort is mit grote Büüt. In disse Egenschoppen is de Appel lange Tiet vun keen annere Sort slaan worrn. Butendem lett sik de Golden Delicious teemlich goot lagern un is ok för den Anbo in en Plantaasch op swackwassig Ünnerlagen goot egent. Allens tohopen heet dat, dat he günstig produzeert warrn kann. Dorgegen müssen Sorten as de Berlepsch dubbelt oder gor dreemol so düer verköfft warrn, wenn man dormit in de Hoochtieten vun'n Golden-Delicious-Anbo den lieken finanziellen Winn maken wull.

De ünner'n Streek goden Egenschoppen vun den Golden Delicious schient ok wedder in sien zentral Bedüden för de Tucht, as de Appel Öllernsort vun de Appelsorten Elstar, Jonagold, Gala, Rubinette un vele annere weniger bekannte Sorten is.

kiek ok[ännern | Bornkood ännern]