Glanzgoldpeer

Vun Wikipedia
Wesseln na: Navigatschoon, Söök
Glanzgoldpeer
Metallglanzgoldpeerd (Somatochlora metallica),
Oolt Heken unnerwegens
Systematik
Ünnerstamm: Tracheendeerter (Tracheata)
Böverklass: Sessfööt (Hexapoda)
Klass: Insekten
Ünnerklass: Fleeginsekten (Pterygota)
Ornen: Goldpeer (Odonata)
Ünnerornen: Echte Goldpeer (Anisoptera)
Familie: Glanzgoldpeer (Corduliidae)
Wetenschoplich Naam
Corduliidae
W. F. Kirby, 1890

De Glanzgoldpeer (Corduliidae) sünd ene Familie mank de Echten Goldpeer (Anisoptera). Dor höört se ok to de Goldpeer (Odonata) mit.

Kennteken[ännern | Bornkood ännern]

De Glanzgoldpeer sünd middelgroot. Jem ehre neegsten Verwandten sünd de Koornsnieders (Libellulidae). De meisten Aarden hefft tämlich lange Beene un en metallgröne Farv. Wenn se öller weert, kriegt se ok en Klöör vun Bronze, de een oder annere warrt ok düster un matt. Sünnerlich de Liever vun de Metallglanzgoldpeer (Geslecht Somatochlora) sünd glimmerig Gröön. De Ogen sünd faken grall gröön farvt. De Leegbohrer (Ovopositor) vun de Seken is bloß man en eenfach Klapp. De Eier weert enkelt (Somatochlora), in lüttje Klüten (Cordulia), oder in Eiersnören (Epitheca) in dat Water afleggt. De Larven seht en beten wat dick ut. To’n Deel hefft se besunners lange Beene un sünnerliche Döörn an dat Achterlief.

Wie de Glanzgoldpeer leven doot[ännern | Bornkood ännern]

De Heken vun de Glanzgoldpeer könnt sünnerlich gau flegen. Se suust leifig hen un her un könnt lang unnerwegens ween. Man de Seken sünd schoo un versteekt sik faken achter de Planten an’t Över.

De Paarung fangt in’e Luft an, man toenne bröcht warrt se in’n Sitten. Bi dat Afleggen vun de Eier is dat heken nich mit bi. Dat Seken fliggt dune över dat Water un dükert sien Achterlief en poor Mol kort in’t Water rin. Dat gifft ok en Reeg vun Aarden, de leegt jem ehre Eier in’n Modder an’t Över af.

De Larven sünd tomeist an’n Grund vun dat Water togange. Se röögt sik nich veel. Faken sitt se ok in’n Modder. De wasst so bi twee bit dree Johr hen. Dat gifft Aarden, dor sünd twolf oder mehr Afsnitten vun dat Leven as Larve bekannt.

Glanzgoldpeer bruukt en sünnerlich spezielle Ümwelt to’n leven. En paar Aarden hefft dat up modderige Moorwater afsehn, annere möögt an’n leevsten Water mit veel Kruut un Planten, as in Bröök un Siedland.

Aarden (nich vullstännig)[ännern | Bornkood ännern]

Hoochfehnglanzgoldpeerd (Somatochlora arctica)

Literatur[ännern | Bornkood ännern]

  • Heiko Bellmann: Libellen beobachten - bestimmen. Naturbuch Verlag, Augsborg 1993, ISBN 3-89440-107-9
  • Klaus Honomichl, Heiko Bellmann: Biologie und Ökologie der Insekten. CD-Rom. Gustav Fischer Verlag, Stuttgart 1994, ISBN 3-8274-0760-5
  • Gerhard Jurzitza: Der Kosmos-Libellenführer. Franckh-Kosmos Verlags GmbH & Co., Stuttgart 2000, ISBN 3-440-08402-7