Girvan (Brenneree)

Girvan
Brenneree Girvan (Foto: Oliver Dixon)
Land	Schottland
Region	Lowlands
Tyyp	Grain
Status	aktiv
Besitter	William Grant & Sons
Grünnt	1963
Grünner	William Grant & Sons
Waterborn	Penwapple reservoir
Spiritstill(s)	2
Produkschoonsvolumen	15.000.000 l^[1]

Girvan is en Whisky-Brenneree in Girvan, South Ayrshire, Schottland.

Historie[ännern | Bornkood ännern]

William Grant & Sons, de Grünners vun Glenfiddich un Balvenie, hebbt nich blots Single-Malt-Whisky in jemehr Produkschoon, man produzeren ok Blended Whiskys. Man, se kregen sik mit de Distillers Company Ltd. (DCL) in de Plünnen, de en groten Andeel vun de Produkschoon vun Grain-Whiskys kuntrolleren deen, de dordör nödig weer. So weer dat Ünnernehmen dorto dwungen, sik en egene Produkschoonssteed to boen^[2]. Dat schüll denn in den lütten Küstenoort Girvan wesen, woneem en leddige Munitschoonsfabrik ut’n Tweeten Weltkrieg stünn. Op dat Land schüll nu de Grain-Brenneree inricht warrn^[3]. 1963 is de Destille grünnt worrn un siet de Tiet in Bedrief. Na egene Angaven schall dat de techniseerteste Brenneree vun Schottland wesen^[4]. Se tellt to de gröttsten Brennereen vun’t Land. In’t Johr 1966 is dorto noch de experimentelle Ladyburn–Brenneree op dat Rebeet vun de Girvan-Brenneree boet worrn, de aver al 1976 wedder Platz maken müss, as de egentliche Destille vergröttert warrn schüll. 2007 is op dat Grundstück de Brenneree Ailsa Bay dorto kamen, de för de Blended-Produkschoon Single-Malt-Whisky produzeert.

Produkschoon[ännern | Bornkood ännern]

Dat Water, dat för de Produkschoon bruukt warrt, kummt ut dat Penwapple reservoir. In de Destille gifft dat twee Brennblasen – een Coffey Still un een Continuous Still^[3]. Ut de Brenneree gifft dat en Original–Single Grain-Affüllen, de ünner den Naam Black Barrel verköfft warrt. Op’n Markt gifft dat den siet 1995. He is meist weltwiet to kriegen^[1]. De gröttste Deel vun den Whisky geiht aver in de Produkschoon vun Blend-Whiskys.