Gala (Appel)

Vun Wikipedia
Wesseln na: Navigatschoon, Söök
Appel vun de Sort Gala

Gala is en Huusappel (Malus domestica).

De Appelsort is 1934 vun H. J. Kidd in Greytown, Niegseeland, tücht worrn un keem 1960 in’n Hannelsverkehr. De Modersort is Kidds Orange, de krüüzt worrn is mit den Golden Delicious. De Frucht is teemlich lütt un fast un hett en söten Smack. Dat Fruchtfleesch geiht in’t Geel, de Schell is lüchten root. Gala tellt to’t Aaft, dat för’n Nadisch egent is („Dessertaaft“), un kann goot lagert warrn. För den Hannel in Europa warrt de Gala-Appel to’n gröttsten Deel ut Niegseeland un Chile inföhrt

Appel vun den Tyyp Gala Galaxy

Blangen den originalen Gala-Appel gifft dat vun de Sort verscheden Typen, as to’n Bispeel de beter klöörte Tenroy, Gala Royal oder ok Royal Gala, de in de Frucht noch ’n beten wat lütter is as de normale Gala. De Imperial Gala is vun de Klöör jüst so as de Royal Gala, driggt aver gröttere Frücht. De Gala Galaxy hett en noch starkere rode Klöör. Disse Tyyp weer 2005 in Europa de an fakensten plante Appel vun de Sort Gala.

De Oorn is Mitt bit Enn vun’n September. Dorna kann de Appelsort bit Dezember lagert warrn, in’t CA-Lager ok bit April. Wenn de Frucht vun Sort Gala riep is, is se ok gliek riep för den Geneet.

Gala hett keen Sortenschuul dör dat Bundssortenamt, dröff aver na § 6 Afs. 4 vun de Anbomaterialverorden in Düütschland anboot warrn.

Kiek ok[ännern | Bornkood ännern]