Firewall (Film)
| Filmdaten | |
|---|---|
| Plattdüütsch Titel: | — |
| Originaltitel: | Firewall |
| Düütsch Titel: | Firewall |
| Produkschoonsland: | USA |
| Johr vun’t Rutkamen: | 2006 |
| Läng: | 105 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Richard Loncraine |
| Dreihbook: | Joe Forte |
| Produkschoon: | Armyan Bernstein Basil Iwanyk Jonathan Shestack |
| Musik: | Alexandre Desplat |
| Kamera: | Marco Pontecorvo |
| Snitt: | Jim Page |
| Szenenbild: | Brian Morris |
| Kledaasch: | Shuna Harwood |
| Dorstellers | |
| |
Firewall (op plattdüütsch so veel as „Füürwand“) is de Titel vun en US-amerikaanschen Thriller ut dat Johr 2006 mit Harrison Ford in de Hööftrull. Dat Dreihbook hett Joe Forte schreven, Speelbaas weer Richard Loncraine.
Inholt[ännern | Bornkood ännern]
Jack Stanfield föhrt en tofreden Leven mit sien Fro und twee Kinner un sien Arbeit as Systemadministrater un Baas vun’t IT-Afdeel vun en regionale Bankkeed in Seattle. Een Avend hett he en Drapen mit den Ünnernehmer Bill Cox, wat sik an’t Enn as en Vörwand rutstellt. In de Twüschentiet neemlich heebt Cox sien Lüüd de Familie vun Jack ünner jemehr Gewalt bröcht un dat Huus mit Kameras un allerhand Technik inricht. Cox un sien Bande hebbt den Plaan vun de rieksten Kunnen vun de Bank je 10.000 US-Dollar op en Konto op de Kaiman-Eilannen to överwiesen. Jack schall jüm den nödigen Togang to dat Reekner inrichten.
Mit sien Familie as Börgen schall he den annern Dag wedder in’t Büro gahn un arbeiten. Üm to hinnern, dat he heemlich üm Hülp nafraagt warrt he mit Mikrofonen un Kameras utrüst. Liekers kann jack dör en Trick den Kugelschriever mit de Mini-Kamera an sien Sekretärsche wietergeven, ahn dat de Macker, de op en oppassen schall dorvun wat markt. Lang duert dat aver nich, bit he dormit opflüggt. To Straaf schütt Cox den Macker, de nich oppasst hett, vör de Ogen vun Jack un sien Fro doot. Dormit will Cox kloorstellen, dat em dat eernst is mit sien Drauhn. In de Nacht versöcht Jack noch mol sien Familie in Sekerheit to bringen un jem en Flucht mööglich to maken. Ok dat geiht scheef un Cox gifft Jack sien Söhn dorophen en Keks mit Ültjes, ofschoonst he weet, de de Jung en Allergie hett. Gau fallt de Jung in en anaphylaktischen Schock. Den Adrenalin-Stift, ahn den de Jung nich överleven kann, kriggt Jack eerst, as he verspreken deit, dat he allns maken deit, warrt Cox em opdriggt.
Den annern Dag mutt Jack sien Sekretärsche rutsmieten un de 100 Millionen Dollars vun de Kunnen överwiesen. Cox kiekt em dorbi op de Fingers. Man Cox markt nich, dat he en Deel vun de Transakschonen mit dat Handy vun en Mitarbeiter vun’n Monitor affotograferen kann. De Videobänner warrt löscht. Liekers gifft de Bande de Familie von Jack noch nicht wedder free. As Jack na Huus kummt, man nümms dor is warrt he achterbang. He kann sien Opwasser Liam an de Siet maken un wennt sik dorna an Harry, den Sekerheitsbaas vun de Firma. Man, Cox hett vörsorgt un Harry mit Jack sien Wapen ümbröcht. Togliek hett he en verkehrte Naricht in Ümloop bröcht, de dat so utsehn lett, as harrn Harry un Jack sien Fro wat mit’nanner.
In sien Noot wennt sik Jack an sien Sekretäärsche, de he kort vörher noch rutsmeten müsst hett. Mit ehr Hülp kriggt he Togang to dat Konto vun Cox un löscht na un na sien Vermögen. He versöcht Kuntakt optonehmen un gegen dat Geld sien Familie freetopressen. Över dat Halsband vun jemehrn Hund, dat mit en GPS-Senner utrüst is, finnt he dat Versteek vun de Bande an en eensomen See.
As Cox vörhett Jack sien Dochter ümtobringen, kriggt dat een vun sien Lüüd denn aver doch mit dat Geweten un stellt sik dortwüschen. Cox maakt em an de Siet, man de Dochter kann in dat Chaos utneihn. Jack sütt dat. Foorts gifft he Gas un fohrt den Macker daal, de achter sien Dochter her is. In’n Showdown kummt dat to Tweekamp twüschen Jack un Cox. Opletzt behollt Jack de Böverhand un bringt em mit en Spitzhack üm.
Kritik[ännern | Bornkood ännern]
- James Berardinelli kritiseer op ReelViews, dat de Rull vun Jack Stanfiels apensichtlich för en Mann schreven weer, de teihn bit twintig Johr jünger weer as Harrison Ford mit sien 62 Johren. Den Film beteken he as harmlos Ünnerhollen, de tofreden stellen de.
- Roger Ebert schreev in de Chicago Sun-Times vun’n 10. Februar 2006, dat de Film en olle Geschicht kumpetent wedderverwennen de. He loov de Leistung vun de Dorstellers un polemiseer in sien Kriitk mit de Ansichten, de Rull vun Jack Stanfield schüll en jungen Schauspeler spelen, de in go’e physische Form weer.
Utteken[ännern | Bornkood ännern]
De Film is in’t Johr 2007 för twee Filmpriesen nomineert wesen, hett aver keen dorvun wunnen. Vörslahn weer Jimmy Bennett för den Young Artist Award as ok de Stuntmen Jason Calder un Mike Carpenter för den Taurus Award in de Kategorie Best Kamp.
Produkschoon[ännern | Bornkood ännern]
De Film is ünner den Arbeitstitel The Wrong Element dreiht worrn. As de Produkschoonsfirma över en Mangel vun Logik bi den egentlichen Roov in de eersten Dreihbookfaten klaagt hett, is de Produkschoon ophollen worrn. Op persönliche Initiative vun Ford, de ok sülvst en poor Infäll bistüert hett, is de Produkschoon denn wedder opnahmen worrn. Speelbaas Loncraine keem dorbi eerst kort vör’n Anfang vun’n Dreih in de Kru ahn veel Insichten in dat Genre to hebben.
Köst hett de Produkschoon ruchweg 60 Millionen US-Dollar, inspeelt hett he dorgegen weltwiet 85 Millionen US-Dollar.
Weblenken[ännern | Bornkood ännern]
- Firewall in de Internet Movie Database (engelsch)
- Kritiken to’n Film op Rotten Tomatoes
- Sammelte Kritiken op Metacritic.com
- Vergliek vun de Snittfaten Alternativfaten – Kinofaten vun Firewall op Schnittberichte.com