Firestorm (1998)
| Filmdaten | |
|---|---|
| Plattdüütsch Titel: | — |
| Originaltitel: | Firestorm |
| Düütsch Titel: | Firestorm – Brennendes Inferno |
| Produkschoonsland: | USA |
| Johr vun’t Rutkamen: | 1998 |
| Läng: | 89 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Dean Semler |
| Dreihbook: | Chris Soth |
| Produkschoon: | Thomas M. Hammel Jeph Loeb Matthew Weisman |
| Musik: | J. Peter Robinson |
| Kamera: | Stephen F. Windon |
| Snitt: | Jack Hofstra |
| Szenenbild: | Linda Del Rosario Richard Paris |
| Kledaasch: | Bruce Finlayson Carla Hetland |
| Dorstellers | |
| |
Firestorm (op plattdüütsch so veel as „Füürstorm“; dt. Titel: Firestorm – Brennendes Inferno) is de Titel vun en US-amerikaanschen Actionfilm ut dat Johr 1998, de bi 20th Century Fox entstahn is. Speelbaas weer Dean Semler. De Film harr sien Weltpremier an’n 7. Januar 1998 in Westwood, Kalifornien. In Düütschland weer he an’n 28. Mai 1998 to’n eersten mol to sehn.[1]
Inholt[ännern | Bornkood ännern]
Jesse höört to en Eenheit vun de so nöömten Füürspringers („Smokejumpers“), de in Wyoming in’n Fall vun’n Wooldbrand mit’n Fallschirm in Wooldrebeden afspringen doot, wo Fohrtüüch nich henkamt. Dor leegt se denn en Gegenfüür oder slaht en Brandsnees.
Een Dag brickt en Wooldbrand ut, de vun Boddentruppen löscht warrn schall. Dorto warrt Fangene vun en Gefängnis dicht bi insett. Dat Füür hett de gewetenlose Shaye leggen laten. De hett sik en gresigen Plaan utdacht, üm bi de Gelegenheit uttobreken. Hülp kriggt he dorbi vun sien korrupten Afkaat un en poor annere Fangene, de he veel Geld anboden hett. Wiel de Löscharbeiten bringt se jümmer Oppassers üm de Eck un laat de annern Fangenen un Füürwehrlüüd in dat Transportfohrtüüch insparrt torüch. Se sülvst tarnt sik as Füürwehrlüüd un riet ut, wiel sik dat Füür nu ahn Hinnern utbreden kann.
In den Woold warrt ok de Bioloogsche Jennifer vun’t Füür överrascht, de dor Vagels beobacht hett. As se utneihn will, lööpt se direkt in de Arms vun Shaye un sien Lüüd, de ehr – ahn dat se dat weet – as Börg mitnehmt. Intwüschen lett sik Jesse na den Woold flegen, üm dor en Gegenfüür to leggen. Op’n Torüchweg sütt he de Grupp üm Shaye. He springt mit’n Fallschrim af, üm jem to hülpen. Ok dat Lager vun de Füürspringers is intwüschen achtsom worrn, vunwegen dat de Boddentruppen op jemehr Funkspröken nich reageert. De olle Chief Wynt maakt sik gau op’n Weg un kann de Fangenen in’n letzten Oogenblick redden.
De Grupp üm Shaye un Jesse kamt denn an en Forsthütt an. Dor lett Shaye sien Tarnung fallen. He gifft Order Jesse ümtobringen, nütt de Situatschoon togliek aver, üm ok een vun sien Mitweters an de Siet to maken. Man Jesse kann mit en Motorrad jüst noch ut dat brennen Huus rutkamen un kort later Jennifer freekriegen. Nu gifft dat aver blots een Mööglichkeit vör de beiden Parteien, woans se vör dat Füür wegtolopen künnt. Op’n Weg maakt Shaye ok sien annern beiden Mackers noch an de Siet – he harr neemlich gor nich vör dat versprokene Geld mit jem to delen. Wedder kummt dat to en Openannerdrapen, un nochmol kummt Jennifer dorbi in de Hannen vun Shaye.
In dat Füürspringer-Lager tekent sik intwüschen af, dat en gresiger Füürstorm an’t Enstahn is, un Jesse sik nipp un nau dorop to bewegt. Chief Wynt kriggt en slecht Geweten un lett sik mit’n Heevschruver dorhen bringen. An en See dröpt he Jesse, de em eerstmol kloor maakt, dat he em in’n Verdacht hett, dat he dat Füür leggt hett. Wohrhaftig gifft Wynt to, dat he dat Geld bruukt hett. Tohopen versöökt se Jennifer ut Shaye sien Gewalt to redden, jüst as de Füürstorm losbreken deit. In’n Showdown blievt Wynt un Shaye beide dood. Jesse un Jennifer överleevt de Katastrooph mit letzte Kräft.
Kritik[ännern | Bornkood ännern]
- Thomas Poß meen op zelluloid.de, dat de Film nich dör innovativen Inholt övertüüg, man dat de Flammenhöll woll fein antosehn weer un de Film ok de hele Tiet Spannung levert.[2]
- Richard Oehmann schreev op artechock.de, dat de Verbekers, dat Füer un nich mol de olle Scott Glenn mitrieten, man tosamen den Indruck vun en övermatige Lassie-Episood maken deen. Howie Long beteken he as den langwieligsten Hööftdorsteller vun’t Johrhunnert.[3]
Weblenken[ännern | Bornkood ännern]
- Firestorm in de Internet Movie Database (engelsch)
- Kritiekn to’n Film op Rotten Tomatoes
Borns[ännern | Bornkood ännern]
- ↑ Releasinfo op IMDb afropen an’n 20. Mai 2012
- ↑ Kritik vun Thomas Poß op www.zelluloid.de afropen an’n 20. Mai 2012
- ↑ Kritik vun Richard Oehmann op www.artechock.de afropen an’n 20. Mai 2012