Ferris Bueller’s Day Off

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: Ferris Bueller’s Day Off
Düütsch Titel: Ferris macht blau
Produkschoonsland: USA
Johr vun’t Rutkamen: 1986
Läng: 103 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: John Hughes
Dreihbook: John Hughes
Produkschoon: John Hughes, Tom Jacobson
Musik: Ira Newborn
Kamera: Tak Fujimoto
Snitt: Paul Hirsch
Szenenbild: John W. Corso
Kledaasch: Marilyn Vance
Dorstellers

Ferris Bueller’s Day Off (op Platt so veel as „Ferris Bueller sien fre’en Dag“; dt. Titel: Ferris macht blau) is en Highschool-Film un Kummedie vun 1986.

Inholt[ännern | Bornkood ännern]

Ferris Bueller is ünner de Schöler geern sehn un to lieken Tiet de gröttste Feend vun de Schoolmeester. He hett sien letzt Johr op de Highschool un is en wohren Meester dorin, Krankheiten vörtotüüschen, dormit he nich na de School mutt. Ferris kennt all Kneeps, de to’n Blaumaken nödig sünd.

So beslutt he an en droomhaftigen Dag in’n Föhjohr mol wedder sien Freeheit to söken un nich na School to gahn. Sien Öllern Tom un Kate maakt he wies, dat he swor krank is un in’n Bett blieven mutt. Ofschoonst he sien Schauspeleree as nich so goot instopen deit, glöövt se em un för Ferris is de Weg na Chicago free. He kriggt sien Fründ Cameron, en Hypochonder, de bi all’ns Angst hett, wat verkehrt to maken, rüm, toeerst sien söte Deern Sloane ut de Scholl to hollen un mit em tohopen lostoföhren.

Mit dat Auto vun Camerons Vadder, en nagelniegen Ferrari 250 GT California maakt se sik op in de Stadt, wo se sik ünenr dat Volk mischt, an en Fest deelnehmt un sik dat richtig goot gahn laat, ahn ok blots to ahnen, dat de Schooldirekter Ed Rooney Ferris al lang in Verdacht hett un alles doransett em bi’n Mors to kriegen, üm een för alle molen klortostellen, dat an sien School so wat nich dörgeiht.

In Chicago beleevt de dree Schölers allerhand. Den Ferrari hebbt se twüschendör in en Parkhuus afstellt. Man so’n fein’ Auto sütt ok de Parkwachter nich all to faken, un maakt dormit eerst mol sülvst en lütte Tour mit Vullgas. Rooney geiht in de lieken Tiet op’t Ganze un fang an, bi Ferris in’t huus rümtospinoneeren. Man dor luert allerhand Fallen op em, un doröver rut ok noch de Rottweiler vun de Buellers. Und denn is dor ok noch Ferris’ Süster Jeannie, de Ferris denn free’en Dag gor nich günnt un op em al lang neetsch is. As se op Rooney dröpt, denkt se aver, dat is en Inbreker, haut em KO un röpt de Polizei.

De jungen Lüüd weet dorvun natüürlich nix. Se laat sik dat in de Stadt goot gahn. De Arger kummt, as se wedder torüch na Huus föhren wüllt, un markt, dat de Kilometerteller vun’n Ferrari na de Tour vun’n Parkwachter veel to hooch steiht. Cameron geiht de Mors op Grundies, wiel he weet, dat sien Vadder dat mitkriggt un em dat Leven to Höll maken warrt: He fallt in’n Schock, ut denn Sloane un Ferris em blots na grote Möh wedder rutkriegen künnt. Cameron is dorna wannelt un beslutt sik nu endlich tohopentorieten un sik gegenöver sien Vadder to positschoneeren.

Opletzt löpt all to en groot Finale tosamen, bi dat all verscheeden Parteien – Rooney, de Öllern, Jeannie un Ferris – in’n Huus vun de Buellers tohopendraapt. Ferris schapt mit veel Glück nich opdeckt to warrn, nich opletzt ok mit de Hülp vun sien Süster, womit he nu so gor nich rekent harr. An’n End geiht för Ferris all’ns goot ut un Rooney steiht as groten Dööspaddel dor.

Utteken[ännern | Bornkood ännern]

De Film is nich uttekend woorn, aver Matthew Broderick weer 1987 nomineert för den Golden Globe as Best Dorsteller in en Musical/Kummedie.

Anners wat[ännern | Bornkood ännern]

  • In een Szeen hollt sik Ferris un sien Frünnen in en Wulkenkratzer op un kiek sik Chicago an. Dorbi sünd in Vördergrund twee echt rhiensche Jecken to sehn, de op Köölsch över de Hööch vun amerikaansche Hoochhüüs snackt. Dat is en Kreatschoon vun de Synchroniseeren. In’n Originalfilm sünd de Jecken nich to höörn.
  • Üm den Junkie op de Polizeiwacht beter spelen to künnen, hett Charlie Sheen vörher 48 Stunnen nich slapen.
  • In de Kamer vun Ferris hangt an de Wand en Poster vun de Simple Minds un jemehr Leed Don’t you. Da is en Anspelen op den vörherigen Film vun Hughes, The Breakfast Club, wo de Song ok binnen vörkamt.
  • In den Film kommt fakener Lüüd vör, de spontan en Kampagne maakt, üm vör den kranken Ferris Help to söken. De Titel vun de Kampagne weer later vun de US-amerikaansche Ska-Grupp „Save Ferris“ opgrepen.

Feernsehserie[ännern | Bornkood ännern]

1990 is en Spin-Off-Serie mit den lieken Titel produzeert worrn, de aver vun wegen to wenig Tokiekers na dörteihn Folgen wedder afsett worrn is. Dat de Serie keen Spood harr, weer dormals dorop schaven, dat de Inholt to platt weer un to veele Saken ännert worrn sünd. T. B. is keen vun de oorsprünglich Schauspelers in de Serie dorbi wesen. Bito is to lieken Tiet en annere Serie („Parker Lewis“) rutkamen, de en liek Kunzept harr.

Weblenken[ännern | Bornkood ännern]