Familien-Duell

Vun Wikipedia
Produktionsdaten
Düütsche Titel: familien duell
Originaltitel: Family Feud
Produkschoonsland: Düütschland
Produkschoonsjohr(en): 1992-2003
Produkschoons-
ünnernehmen:
Grundy Light Entertainment
Duer: ruchweg 30 Minuuten
utstrahlt: alldaags
Episodentall: 2275
Titelleed: "Familienduell" von Alan Gruner
Genre: Speelshow
Düütsche
Eerstutsstrahlen:
26. Januar 1992
op RTL plus
Moderatschoon:

Werner Schulze-Erdel

Länner, de en egen Faten vun’t Familien-Duell sennen doot

familien duell (so de offizielle Schrievwies na de Produkschoonsfirma GRUNDY LE) weer en Speelshow, de vun 1992 bit 2003 produzeert worrn is.

De Moderater vun de Show weer Werner Schulze-Erdel, de vörher al Ruck Zuck op Tele 5 modereert harr. De Sennen weer an’n 26. Januar 1992 to’n eersten mol op RTL plus utstrahlt, de letzte Utgaav is an’n 10. Oktober 2003 bi RTL to sehn.

Vun dat Speelkunzept is en Remake ünner den Titel 5 gegen 5 maakt worrn, dat siet den 29. März 2005 vun den Swiezer Senner SF1 utstrahlt warrt. 2006 is de Show ok in Düütschland wedder op RTL 2 sennt worrn, weer aver no 69 Folgen wedder ut dat Programm nahmen. De Originalsennen is ut de USA un harr den Titel Family Feud (1976–1985, 1988–1995, siet 1999) un warrt to Tiet vun Steve Harvey modereert. In Grootbritannien löpt de Show ünner den Titel Family Fortunes (1980–2002, siet 2006) un in Frankriek as Une famille en or (1990–1999, siet 2007).

Speelafloop[ännern | Bornkood ännern]

Allgemeen[ännern | Bornkood ännern]

In de Show hebbt jümmer twee Familien mit fief Personen gegenenanner speelt. Dat Speel güng över veer Runnen, woran sik noch en Endrunn ansluten de. To Anfang vun en Runn keem ut jede Familie een Person na vörn. De Moderater stell denn een Fraag, bi de dat dorüm güng, de Antwoort to finnen, de de meisten vun eenhunnert fraagte Lüüd seggt harrn, de so nöömte „Top-Antwoort“. Wokeen toeerst op en Buzzer haut hett, dröff de Antwoort geven. Harr de de Antwoort richtig, hett de Familie, wo he tohöört, de Runn speelt. Wenn nich, dröff de annere Person antern, un de ehr Familie dröff de Runn spelen, wenn de Antwoort beter weer. Wenn keen vun de beiden en richtige Antwoort geven harr, güng de Fraag wieter an de nächste Person ut de Familie vun de gauere Person und so wieter.

In’n wieteren Verloop vun de Runn güng dat dorüm ok noch de annern Antwoorten to finnen. Dorbi güng de Fraag de Reeg na an de Familien-Liddmaten wieter, wobi sik de Lüüd ünnerenanner nich afsnacken dröfen. Geev en Familie mehr as dree verkehrte Antwoorten, kreeg de annere Familie de Mööglichkeit, mit blots een richtige Antwoort, all Punkten to klauen, de bit dorhen in de Runn tosamenspeelt weern. Dorto dröff jeed Familien-Liddmaat en Antwoort vörslahn, man de Teambaas geev opletzt de Antwoort, de tellt hett. Dorbi weer he nich beschränkt op de Antwoorten, de vörslahn worrn sünd. In disse Phaas vun’t Speel dröff sik de Familie ok adfsnacken – normalerwies, wenn de annere Familie de tweete verklehrte Antwoort seggt harr.

De Runnen[ännern | Bornkood ännern]

  • Runn 1: Hier weern de söss fakensten Antwoorten to seggen. Speelt weer üm de eenfacken Punkten (neemlich, wo veel Prozent vun de fraagten Personen dat seggt harrn).
  • Runn 2: Hier weern de fief fakensten Antwoorten to seggen un dat güng nochmol üm de eenfacken Punkten.
  • Runn 3: Hier weer de veer fakensten Antwoorten to raden, de Punkten weern nu dubbelt tellt.
  • Runn 4: Nu weern de dree fakensten Antwoorten to finnen, wobiu de Punkten dreefackt tellt weern. Sünnerheit in disse Runn: Bi’t klauen vun de Punkten weern ok de Punkten vun de Antwoort tellt, de jüst raat weer.

Dör de dreefacken Punkten in de letzten Runn bleev dat Speel bit to Enn apen. De Vördeel dör de dreefacken Punkten weer aver en beten minnert, vunwegen dat blots noch dree Antwoorten tellt hebbt. Dat keem nich faken vör, dat de Familie, de de veerte Runn wunnen hett, denn nich in de Endrunn kamen is. Dorbi is to bedenken, dat de Punkten, de man in een Runn maken künn ok duorvun afhangen de, woveel Antwoorten tosamen vun de fraagten Lüüd seggt weern. Bi eenige Fragen geev dat mehr Antwoorten as in’t Speel to raden weern. In den Fall fülln de Punkten vun de annern Antwoorten weg.

Endrunn[ännern | Bornkood ännern]

De Familie, de na de veer Runnen de meisten Punkten harr, dröff de Ennrunn spelen, de annere weer utscheedt. In dat Finale hebbt twee Personen achterenanner speelt, wobi de tweete solang in en schalldichte Kabien sitten müss, bit de eerste fardig weer. De eerste kreeg fief Fragen in twintig Minuuten, wobi dat wedder dorüm güng, de fakensten Antwoorten to finnen. De tweete Person kreeg dornba de glieken Fragen stellt, dröff dorbi aver nich de glieken Antwoorten seggen. De tweete harr dorüm fief Sekunnen mehr Tiet to’n Antern. De Tiet tell in den MOment rünner, wenn de eerste Fraag to Enn vörleest weer. Hebbt beide tosamen mehr as 200 Punkten tosamenbröcht, denn hett de Familie wunnen un kreeg orför 5.000 Euro. De Familie weer op jeden Fall as Titelverteidiger in de nächste Folg wedder dorbi, egal wat se de Endrunn wunnen harr oder nich. Dorbi künn en Famlie höchstens fief Folgen lang mitspelen. In jemehr letzte Endrunn güng dat för jem denn aver üm 50.000 Euro (toeerst weern de Priesen 10.000 un 100.000 Düütsche MarkDM). Wenn se de föffte Endrunn wohrhaftiog wunnen harrn, sünd de Priesgeller ut de eersten veer Runnen aver verfallen.

Neeanfang as „5 gegen 5“[ännern | Bornkood ännern]

Eenige Johren later is dat Format ünner den Titel „5 gegen 5“ in’n düütschsprakigen Ruum wedder nee inföhrt worrn. De Regeln weern de glieken, ditmol künnen aver nich blots Familien tosamen spelen, man ok fief Lüüd de sik eenfack so ünnerenanner kennen. Ok de Priesgeller weern anners.

Düütschland[ännern | Bornkood ännern]

Dat geev blots een Team, dat in all Staffeln nich slahn worrn is. Na dree Sennen, in de de Hööftpries wunnen weer, is de Sennen aver afsett worrn. Dat geev ok blots een Team, dat fiefmol in de Endrunn weer un de 30.000 Euro wunnen hett.

Dat Speelkunzept weer an’n 26. Februar 2007 un an’n 12. März 2007 noch mol ias Element in de Pro 7-Sennen Gameshow-Marathon to sehn.

Swiez[ännern | Bornkood ännern]

Anner as in Düütschland warrt dat Format in de Swiez jümmer noch geern in’t Vöravendprogramm ankeken. Wegen de vergliekswies sieten Produkschoonskosten is de Show bi de teemlich groten Tokieker-Tallen ok för den Senner jümmer noch intressant.

Kritik[ännern | Bornkood ännern]

De Kandidaten mööt jemehr Antwoorten sülvst formuleeren. Dat liggt dorüm bi’n Schiedsrichter, de Antwoorten in Klassen intodeelen un dorna to seggen, wat de Antwoort richtig oder verkehrt is. So lett de Schiedsrichter to’n Bispeel de Antwoort „stolpern“ gelln, wenn egentlich „henfallen“ söcht weer.

Faken geev dat Diskusschonen, wenn dat üm allgemeen un sünnere Antwoorten güng: Weer to’n Bispeel de Begreep „Boom“ söcht, denn hett de Schiesrichter dörgahn laten, wenn en sünnern Boom as „Eken“ oder „Linn“ nöömt weer, vun wegen dat beids en sünnere Oort vun Boom weer. Man, annersrüm müss de Antwoort akkrat wesen, wenn „Eken“ söcht weer. In den Fall weer de Antwoort „Boom“ nich tellt, vunwegen dat dat to allgemeen weer.

Dat de Schiedsrichter dat in wenige Sekunnen seggen mutt, weer aver keen Problem. Speelshows vun disse Oort warrt nich live sennt, man in grote Tall vörproduzeert. Wenn man sik mit de Antwoort nich recht eenig weer, künn de Opteken ünnerbroken warrn bit kloor weer, wat en Antwoort gellen de oder nich.

Kritik geev dat ok doran, dat hunnert fraagte Personen op keen Fall statistisch repräsentativ sünd. De richtige Antwoort hangt also nich dorvun af, wo goot een Minschen afschätzen kann, man veel ok vun Glück. De Antwoorten, de afgeven weern müssen dorbi ok nich richtig wesen. Dat güng blots dorüm, wat de Lüüd seggt harrn. Kritiseert weer wieter ok, dat in de veerten Runn üm de dreefacken Punkten speelt warrt. So kann en Team, dat bit dorhen noch keen Punkten maakt hett, mit de veerten Runn noch allens rümrieten un in de Endrunn kamen. Dormit warrt de annern Vörrunden tonichten maakt. Man, beide Kritikpunkten sünd Deel vun dat Speelkunzept.

Borns[ännern | Bornkood ännern]

Weblenken[ännern | Bornkood ännern]