Every Thing You Always Wanted to Know About Sex * But Were Afraid to Ask

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: Every Thing You Always Wanted to Know About Sex * But Were Afraid to Ask
Düütsch Titel: Was Sie schon immer über Sex wissen wollten, aber bisher nicht zu fragen wagten
Produkschoonsland: USA
Johr vun’t Rutkamen: 1972
Läng: 85 Minuten
Originalspraak: Engelsch
Öllersfreegaav in Düütschland: FSK 18 (Kino)/16 (VHS)
Filmkru
Speelbaas: Woody Allen
Dreihbook: Woody Allen na David Reuben
Produkschoon: Jack Brodsky
Charles H. Joffe
Jack Rollins
Musik: Mundell Lowe
Kamera: David M. Walsh
Snitt: Eric Albertson
Dorstellers

Every Thing You Always Wanted to Know About Sex * But Were Afraid to Ask (op Platt so veel as „Wat du al jümmer över Sex weten wullst, man to’n Fragen to bang weerst“; dt. Titel: Was Sie schon immer über Sex wissen wollten, aber bisher nicht zu fragen wagten) is de Titel vun en Episodenfilm vun Woddy Allen ut dat Johr 1972. Dorbi hannelt sik dat üm en satirische Verfilmen vun dat Sexualkunn-Book mit den glieken Naam vun Davdi Reuben. In de Söven Episoden vun den Film versöcht Allen de in dat Book formuleerten Fragen to antern. In Düütschland is de Film an’n 31. Januar 1973 anlopen. De Produkschoon hett ruchweg 2 Millionen US-Dollar, in de USA hett he üm un bi 18 Millionen US-Dollar inspeelt.[1].

Inholt[ännern | Bornkood ännern]

Wirkt Aphrodisiaka?[ännern | Bornkood ännern]

En Hoffnarr is nich in de Laag, den König to belustigen. Nu mutt he bang wesen, dat he en Kopp körter kummt. As he jüst över sien Tokumst nadenkt, dröpt he op den Geist vun sien Vadder, de em vertellt, de he keen Roh finnen kann, vördem he nich mit de Königsche in’t Bett weer. He jubelt ehr en Aphrodisiakum ünner, üm ehr rümrokriegen. Wohrhaftig deit dat Middel sien Wirken. Man de Hoffnarr hett nich mit den Küüschheitsgördel rekent, denn he üm’t Verrecken nich nich apen kriegen kann. As he sik de Hand in’n Gördel inklemmen deit, warrt he opletzt vun’n König opdeckt un henricht.

Wat is Sodomie?[ännern | Bornkood ännern]

De Dokter Dokter Doug Ross kriggt en Dag Besöök vun den armenischen Schaapharder Milos Stavros, de em vertellt, dat he sik in dat Schaap Daisy verkeken un ok mit ehr Sex hett. Man, nu wies Daisy em keen Leev mehr un de Dokter schall ehr goot tosnacken. Toeerst meent Dr. Ross, dat dat allns Fantasie weer un in’t Rebeet vun de Psychiatrie höört, man denn kriggt he dat Deert to sehn un verkiekt sik sülvst in Daisy. He nimmt sik en Ruum in en Hotel un hollt sien Affäär mit Daisy gegenöver sien Fro geheem. De Saak kummt aver rut un he warrt wegen Ehbreken un Betütern vun Minnerjohrige (Daisy weer noch nich vulljohrig). He verlütt sien Approbatschoon. Also tütt he mit Daiy in en annere Stadt un warrt Kellner. Man, Stavros finnt em un bringt Daisy torüch na Armenien. Dat is toveel för Doug un he söcht Troost in’n Geneet vun Wullwaschmiddel.

Worüm hebbt eenige Fornslüüd Lasten, to’n Orgasmus to kamen?[ännern | Bornkood ännern]

De Italiener Fabrizio is frisch verheiraat un markt in de Hochtietsnacht, dat sien Fro Gina apensichtlich frigid is. De Lasten duert an, wat he ok versöcht, dat helpt allens nich. He wennt sik dorophen an verschedene Frünnen, de aber ok all nich helpen künnt. Ok de Pastoor weet keen Raat. Dat Problem löst sik een Dag vun sülvst, as Gina markt, dat se in en Kunstgalerie nich mehr to hollen is un Lust kriggt. Fabrizio troot sik eerst nich, gifft aver gau op as em kloor warrt, dat sien Fro jüst op den Reiz anspringt, sehn to warrn. Vun doran hebbt de beiden an all möögliche Steden in de Apentlichkeit Sex, jümmer mit den Reiz dorbi opdeckt to warrn.

Sünd Transvestiten homosexuell?[ännern | Bornkood ännern]

Sam un Tess sünd en Ehpoor. Se sünd bi de tokamen Swiegeröllern vun jemehr Dochter einlaadt. Sam gifft vör, op’t Klo to möten, geiht in Wohrheit aver in de Slaapkamer un tütt sik de Saken vun de Fro vun’t Huus an. Em gefallt dat, Fronskledaasch antotehn. As de Huusherr neger kummt, klassert he ut dat Finster, dat he em nich sütt. Man vör’t Huus kummt warrt em de Handtasch klaut. Sam versöcht sien wohr Geslecht geheem to hollen un hollt sik en Taschendook vör sien Snurrboort. As aver de Polizei indrapen deit, un sik ok de Gastgevers un sien Fro för den Schandaal op de Straat to intresseeren anfangt, flüggt he op. Avends in’t Ehbett seggt Tess, dat se em versteiht un em jümmer noch geern hett, man se beklaagt sik, dat he ehr nix vun sien „Krankheit“ seggt hett.

Wat is Perversion?[ännern | Bornkood ännern]

De Tokieker sütt en Warfspot, in den en homosexuell Poor Warf för en Hoorpleegmiddel för Mannslüüd maakt. De Hersteller is butendem Sponser vun en Quizsennen mit den Titel Wat vun Perversen bün ik?, bi de en Panel ut veer Prominente raden mööt, wat en Gast sexuell sünners geern hett. De eerste Gast is Bernhard Jaffe, de sik geern in de U-Bahn nackig maakt. De Prominenten raat dat nich.

In’n tweeten Deel hett de Winnern vun en Tokiekerspeel de Mööglichkeit, sien Perversion vör de Kamera uttoleven. Dat is in de hüütige Sennen de Rabbi Chaim Baumel, det dat geern hett, wenn man em anbinnen deit. En Fro ut dat Panel binnt em an un en Helpersche sleiht em mit en Pietsch, wiel de Ehfor för sien Ogen Swienfleesch eten deit.

Sünd de Resultaten vun de Dokters un Kliniken, de Sexualforschung bedrievt, nipp un nau?[ännern | Bornkood ännern]

De junge Wetenschoppler Viktor Shakapopulis un de Journalistin Helen sünd opVn Weg na den Sexualforscher Dr. Bernardo. Viktor schall sien neven Helpsmann warrn, Helen will en Interview vun em. As se ankamt, warrt jem vun den buckligen Dener Igor apenmaakt, de sien Missgestalt vun Experimenten her hett, bi dem em de Dokter en veerstünnigen Orgasmus beschert hett. Gau kummt rut, dat de Dokter nich bi sik is un jem för sien gresigen Experimenten bruken will. As se utneihn künnt, gaht eenige Apparaten twei, wodör en Fatt mit Silikon överlöpt, dat för utermatige Bostvergröttern dacht weer.

Victor un Helen künnt utrieten un de Vilal vun Dr. Bernardo geiht in Flammen op. Man en enkelte Resenbost ut Silikon kann ok utneihn, de de beiden nalöpt. Eenige Lüüd biet in’t Gras, as se vun de Bost dooddrückt warrt oder in ehr Melk afsuupt. Tosamen mit den öörtlichen Sheriff kann Victor de Resenbost mit en överdimensioneerten BH infangen.

Wat passeert bi en Ejakulatschoon?[ännern | Bornkood ännern]

In de letzten Episood warrt de Funkschoon vun binnen den Lief vun en Mann bekeken, de bi en romantisch Dinnern sitt. In sien Bregen warrt de Aflööp koordineert. De Arbeiters in’n Magen warrt to’n Verdauen anhollen, wiel Ogen un Ohren Order de Order kriegt, Kuntakt optonehmen. Dat fangt an hektisch to warrn, as sik Sex ankünnigen deit. As dat Lustzentrum nich noog arbeiten deit, gifft dat Maleschen, so dat de Arbeiter in’t Schaamrebeet keen ordige Erekschoon henkriegt. In de TWüschentiet töövt de Spermien mit Anspannen op den Hööchpunkt vun jemehr Utbilln. Blots een Sperlium, dat en swarte Hoornbrill op hett is bang tomoot un fraagt sik, wat paseeren warrt. Sien Kollegen wiest em op sien Eed hen un he föögt sik in sien Schicksal. Opletzt geiht dat denn to Saak. De Spermien springt af un in’t Lustzentrum in’n Bregen laat de Technikers as den Sekt knallen, as sik aftekent, dat en tweeten Dörgang bevörsteiht.

Anners wat[ännern | Bornkood ännern]

De Film parodeert dat Sexualkunnbook ut dat Johr 1969 vun den US-amerikaanschen Dokter David Reuben, dat to de Tiet bannig populär weer. Dat Book hett düchtig inwirkt op de sexuellen Sieten vun de Optucht in de USA, ofschoonst Reuben in sien Book teemlich konservative Ansichten vertreden hett. To’n Bispeel beteken he Homosexualität as en Krankheit. Liekers is dat Book in 54 Spraken översett worrn un weer in 52 Länner mit en Samtoplaag vun mehr as 150 Millionen verköfft.

Bito stellt Allen sien Film ok en Sammeln vun Zitaten un Hommagen an fröhere Filmen un annere Speelbasen dor. To’n Bispeel is de drüdde Episood kumplett op italieensch un weer för’t Kino ok nich ünnertitelt. Se stellt en Hommage dor an de Filmen vun Michelangelo Antonioni. De Episood üm den verrückten Wetenschoppler is en Parodie op den Horrorfilm un de Science-Fiction-B-Movies ut de 1950er Johren. De Episood üm de Perversion is in swart-witt dreiht. Se is en Parodie op de Feernsehsennen What’s my Line? de lange tiet bannig populär weer. De Sennen weer dat Vörbild för de Sennen Was bin ich? mit Robert Lemke.

Egentlich schüll de Film en achte Episood hebben mit den Titel Wat maakt en Mann homosexuell?. Allen speel dorin en Spinn, de vun Louise Lasser as Swarte Weetfro na’n Sex opfreten warrt. Se Sequenz is aver streken worrn, vun wegen dat Allen keen akkerat Enn för de Episood finnt künn.

In de düütschen Kinofaten weer Woody Allen vun Harald Juhnke synchroniseert. För de Feernsehutstrahlen in’t ZDF 1987 is en ne’e Synchronisatschoon maakt worrn, in de Allen wedder vun sien Faststimm Wolfgang Draeger snackt worrn is.

Kritiken[ännern | Bornkood ännern]

Lexikon vun’n internatschonalen Film: Teils grelle, teils hintergründige parodistische Filmsatire auf die Sexwelle der frühen 70er Jahre. In sieben 'Kapiteln' voll beißenden Spotts entlarvt der Regisseur die damals modischen Themen und Komplexe durch Übersteigerung bis ins Monströse, die mit rücksichtsloser Konsequenz durchgehalten wird. Die populärwissenschaftlichen Banalitäten der Aufklärungswelle werden dabei lustvoll karikiert; zugleich ergeben sich amüsante Genrepersiflagen.[2]

Moviemaze.de: Woody Allens Parodie auf die Aufklärungswelle der 70er Jahre ist auch nach etwa 40 Jahren noch unterhaltsam und trotz einiger Albernheiten streckenweise saukomisch. Die Episoden machen allesamt durchgehend Spaß und überzeugen durch originelle Ideen und liebevoll gestaltete Charaktere. Absolut sehenswert, besonders für alle, die sich schon immer merkwürdig zu Schafen hingezogen fühlten oder unbedingt wissen wollten, was denn nun wirklich bei Spermien vor sich geht, wenn Sie gebraucht werden. [3]

Literatur[ännern | Bornkood ännern]

  • David Reuben: Was sie schon immer über Sex wissen wollten. Aber bisher nicht zu fragen wagten. München: Droemer Knaur 1982. ISBN 3-426-04524-9 (dt.)

Borns[ännern | Bornkood ännern]

  1. Every Thing You Always Wanted to Know About Sex * But Were Afraid to Ask, Innahmen
  2. Lexikon des Internationalen Films, Reinbek bei Hamburg: Rowohlt 1995, Bd. V - Z, S. 6317.
  3. MovieMaze.de: Filmkritik von Was sie schon immer über Sex wissen wollten, aber bisher nicht zu fragen wagten

Weblenken[ännern | Bornkood ännern]