Evangelist (Nee Testament)

Vun Wikipedia
Wesseln na: Navigatschoon, Söök
Bookmaleree ut de Tied vun de Karolingers ut Aken, 820. Dee veer Evangelisten mit ehre veer Symbole ut Johannes siene Apenbarung

De Begreep Evangelist meent sunnerlich de Schrievers vun de veer Evangelienböker over Jesus sien Leven in dat Nee Testament. As Naams vun de veer Evangelisten sünd Matthäus, Markus, Lukas un Johannes up us tokamen, man dor hefft sik de Forschers noch nich over eenigt, of dat würklich de Naams vun de Schrievers ween sünd. In de Wetenschop vun de Theologie warrt hüdigendags meist annahmen, düsse Naams weern eerst later to de Texte toschreven wurrn. Na de christliche Tradition weert Matthäus un Johannes overeen sett mit de Apostels mit densülvigen Naam.

Dat Book in de Liturgie vun den christlichen Goddesdeenst, wo blot man de veer Evangelien in staht, warrt Evangeliar nömmt. So'n liturgische Böker sünd in de lutherschen un reformeerten Karken nich begäng. Bi de Lutherschen staht de Evangelientexte for de Sönndage in dat so nömmte Lektionar mit in, bi de Reformeerten weert de Texte direktemang ut de Bibel vorlesen.

Kunst un Ikonographie[ännern | Bornkood ännern]

Vun dat 6. Johrhunnert af an sünd de veer Evangelisten in de christliche Bookmaleree faken dorstellt wurrn, wie se an en Pult ehr Evangelium schrievt. In de christliche Ikonographie weert de veer Evangelisten mit veer unnerscheedliche Symbole utdrückt: Dat Teken för Matthäus is en Minsch oder Engel, dat Symbol for Markus is de Lööw, Lukas warrt dör en Bullen afbillt un for Johannes steiht en Adler. Düsse Ikonographie geiht torüch up en Vision vun den Profeten Johannes in Johannes siene Apenbarung. Dor steiht to lesen, wat he in'n Himmel to sehn kregen harr:

„Un in de Midden an'n Throon un um den Throon rüm weern veer himmelsche Gestalten, vull mit Ogen, vörn un achtern. Un de eerste Gestalt weer liek as en Lööw, un de annere weer liek as en Bull, un de drudde Gestalt harr en Anlaat, liek as en Minsch, un de veerte Gestalt weer just as en Adler, de flegen deit.“ (Apenb.4,6f)

Kiek ok[ännern | Bornkood ännern]

Literatur[ännern | Bornkood ännern]

  • Hiltgart L. Keller: Reclams Lexikon der Heiligen und der biblischen Gestalten. Legende und Darstellung in der bildenden Kunst. Stuttgart 1968, Neuauflage Stuttgart, 1979, Philipp Reclam Jun. ISBN 3-15-010154-9