Epitop

Vun Wikipedia
Schema vun’t Epitop

En Epitop oder ok en antigene Determinante is en lütt Rebeet (Molekülafsnitt) vun en Antigen, wo dat Immunsystem vun’n Lief Antikörper gegen billt. De Rezepters op de Böverflach vun B-Zellen künnt neemlich sülvst keen heel Antigen binnen, un jüst sowenig künnt dat de Antikörpers sülvst. In de Natur sünd Epitopen Proteinen oder Proteiden. Man, Antikörper künnt ok gegen annere cheemsche Strukturen (t. B Hormonen) billt warrn. Disse Anitkörper warrt ü.a. in de Immunanalytik bruukt.

En enkelt Antigen, as to’n Bispeel en Böverflachenprotein vun en Zell oder vun en Bakterium, driggt verschedene rüümliche Epitopen. Gegen elk vun disse Epitopen kann en spezifisch Antikörper billt warrn, de över en Binnensteed, de as Paratop betekent warrt, sünners gegen dit Antigen richt is. Epitopen künnt oort- oder individualspezifisch wesen.

Normalerwies hebbt Epitope, de an MHC-Klass-I Molekülen bunnen sünd, en Läng vun 8 bit 11 Aminosüren, MHC-Klass-II Epitopen wiest dorgegen längere Peptidkeden op.

Man ünnerscheedt twüschen ünnerbroken un unünnerbroken Epitopen. Proteinen bestaht ut Aminosüürkeden un sünd tomeist dreedimensional falt. Op disse Wies künnt Epitopen ut verscheden in’n Ruum dicht bi’nanner liggen Aminosüürresten bestahn, de aver in de Aminosüürsequenz an sik wiet vunenanner weg leegt. Disse epitopen warrt as ünnerbroekn betekent, vun wegen dat se blots in’n nativen Tostand vun’t Protein vörhannen sünd. Bi en SDS-Gelelektrophorees oder en Western Blot warrt de Aminosüürkeden to’n Bispeel opfalt (denatureert) un de Antikörper finnt sien Epitop nich mehr. Epitopen, de ok na en Denatureeren noch Bestand hebbt, vun wegen dat se ut Aminosüürresten Ttosammensett sünd, de in de Sequenz openanner folgt, warrt unünnerbroken nöömt.

Na de Phagozytoos vun de Antigenen wiest de Antigenwiesen Zellen disse Epitopen op jemehr Böverflach. Dorna warrt de (spezifische) Immunantwoort wietermaakt.

In de Gentechnologie warrt Epitopen-Tags anwennt, üm Proteinen spezifisch to markeeren. Dorto warrt in den sülven "open reading frame" as dat to ünnersöken Protein dat Gen vun en Epitop inboet. Man, dorför mutt dat Stop Codon vun’t Protein wegmaakt warrn. De warrt denn tosamen exprimeert. Gegen dat inhangt Epitop kann n uen Antikörper to’n Detekteeren insett warrn. Dat glieke Epitop kann in verscheden Versöken jümmer wedder an ne’e Proteinen anhangt warrn, so dat ok jümmer de glieke Antikörper bruukt warrn kann. Dat bedüüt en bannig Insparen vun Opwand un Kosten.

Weblenken[ännern | Bornkood ännern]