Emil Theil

Vun Wikipedia

Emil Theil (* 23. Juli 1892 in Leipzig, † 27. Dezember 1968 in Bremen) weer en Politiker un Senator in Bremen.

Leven[ännern | Bornkood ännern]

Na siene Schooltiet hett Theil eerst mol Iesendreiher lehrt. Al as Lehrling hett he sik de sozialistische Bewegen anslaten. Vun 1911 bit 1913 weer he Schriftleiter in Kiel. Na den Eersten Weltkrieg is he Stadtverordenten in Kiel wurrn. 1920 keem he as Geschäftsföhrer vun den Metallarbeiderverband na Bremen. Vun 1921 bit 1933 weer he för de SPD in de Bremer Börgerschup, vun 1922 af an as Vörsitter vun de SPD-Fraktschoon. Bavenhen weer he vun 1927 bit 1933 ok noch Vörsitter vun de KonsumgenotenschupVorwärts“ (Vörut) in Bremen.

In de Tiet vun den Natschonalsozialismus hett he eerst mol keen Arbeit harrt. De Nazis sünd achter em herween un hefft em för 3 1/2 Johr achter Trallen un in dat KZ bröcht. Toeerst seet he in Bremen in dat KZ Mißler in de vörmoligen Mißlerhallen. Denn hett dat en Prozess geven un 1935 keem he denn för twee Johr in de KZs Sachsenhausen un Dachau. Na den Anslag vun'n 20. Juli 1944 keem he noch mol in't Kaschott. Twuschendör hett he bit 1944 bi de AG Werser arbeit.

Na den Tweeten Weltkrieg hett Emil Theil as lesten Vörsitter vun de SPD-Fraktschoon verklaart, de SPD möss bi en tokünftige Regeern in Bremen mit bi ween. Dat duer bloß en poor Weken, denn is mit de Amerikaners snackt wurrn un an'n 6. Juni 1945 hett de Militärregeern den Bremer Senat insett. Emil Theil is to'n Senator för dat Bowesen maakt wurrn. Dat bleev he bit 1955. Folgen dö em in düt Amt Senator Alfred Balcke. Theil weer dor för tostännig, dat de Stadt Bremen na'n Krieg wedder upboot wurrn is. Vun 1955 bit 1967 weer he denn wedder Liddmaat vun de Bremer Börgerschup. As de Bremerhobener Afordenten in Bundsdag, Philipp Wehr 1960 storven weer, hett he an siene Steed bit 1961 in Bundsdag seten. Bavenhen weer he bi en ganze Reeg vun Sellschoppen un Organisatschonen mit bi, de sik för dat Mit'nanner insetten döen.

De Senator-Theil-Straat in Habenhusen in'n Bremer Stadtdeel Övervieland hett sien Naam kregen.

Kiek ok bi[ännern | Bornkood ännern]

Literatur[ännern | Bornkood ännern]