Emil Beyer

Vun Wikipedia

Emil Beyer (* 15. Juli 1883 in Lübeck; † 1971) weer en düütschen Verwaltungsbeamten.

Beyer is 1883 in Lübeck boren. He weer 1900 bet 1907 Beroopssoldaat un denn Anstellten bi de Düütsche Levensversekerungsbank.[1] He weer siet 1908 Beamten in’n Polizeideenst bi de Stadt Stood un dor toletzt Baas von de Schutzpolizei. Na de Machtergreifung von de NSDAP 1933 is he an’n 25. März 1933 afsett worrn. Eerst an’n 17. Juli 1933 dröff he denn wedder arbeiden, nu as Magistratsobersekretär bi de Stadt Stood.[1]

Nadem Stood in’n Mai 1945 an’t Enn von’n Tweten Weltkrieg von de Briten innahmen worrn is, hebbt se den NSDAP-Börgermeester Eduard Großheim afsett un interneert. Beyer weer to disse Tied Registrater bi de Stadt Stood. De britsche Militärregerung hett Beyer denn an’n 4. Mai 1945 as ne’en Börgermeester insett. He hett düt Amt bet to’n 17. Januar 1946 behollen.[1] Nadem de von Beyer insett Biraad Nicolaus von Borstel as Börgermeester wählt hett, is Beyer sülvs an’n 18. Februar 1946 Standsbeamten worrn.[1] An’n 31. Juli 1948 is he denn in Rohstand gahn.[1]

Footnoten[ännern | Bornkood ännern]

  1. a b c d e Hartmut Lohmann: Der Landkreis Stade in der Zeit des Nationalsozialismus: „Hier war doch alles nicht so schlimm“. Band 1, Sied 405ff