Eenheidsplural

Vun Wikipedia
(wiederwiest vun Eenheitsplural)
Wesseln na: Navigatschoon, Söök
Isogloss von’n Eenheidsplural
     Neddersassisch
     Nedderfranksch
     Middeldüütsch
     Veluws
Koort, wat för Formen woneem bruukt warrt

De Eenheidsplural is en Kennteken von de neddersassische Spraak.

Dat neddersassische billt de Pluralformen von dat Verb in de Nutied op -t oder -en: wi maakt/maket, ji maakt/maket, se maakt/maket (in de olen Stammrebeden von de Sassen: Holsteen, Noordneddersassen, Oostfalen, Westfalen); wi maken, ji maken, se maken (in dat Oostnedderdüütsche, in Sleswig, de Veluwe, en Deel von Noordhessen, Oostfreesland un Grünneng). Dat maakt also keen Ünnerscheed twischen de dree Personen wi, ji un se un ünnerscheedt sik dor von dat Hoochdüütsche, dat twee Formen hett, eenmaal -t un tweemaal -en: wir machen, ihr macht, sie machen. Dat Nedderlandsche harr jüstso von öllers twee Formen: wij maken, jij maakt, zij maken. Vondaag bruukt dat Nedderlandsche de Form jij maakt aver nich mehr un hett as ne’e Höflichkeitsform jullie maken inföhrt. Dorüm lett dat nu so, as wenn dat Nedderlandsche ok en Eenheidsplural harr.

Ans kummt de Eenheidsplural blots in dat Alemannsche vör.

De Isogloss löppt von dat nedderlandsche Harderwiek an de Südersee dör de Veluwe na de Ole Iessel, över de Grenz na Düütschland. Hier trennt de Lien Westfalen von’n Nedderrhien. De Isogloss warrt ok Rien-Iessel-Lien nöömt, aver de Isogloss beröhrt de Ne’e Iessel blots an een Punkt (löppt aver en ganz Stück an de Ole Iessel langs) un beröhrt den Rien narms.

Bi Olpe drippt de Isogloss op de Benrather Lien. De Eenheidsplurallien is also so temlich kumplett mit de Spraakgrenzen von dat Neddersassische övereen.