EHEC

Vun Wikipedia
Wesseln na: Navigatschoon, Söök

EHEC is de Kortform vun Enterohämorrhagische Escherichia coli. Dor hannelt sik dat um sunnerliche Stämm vun dat Darmbakterium Escherichia coli (E. coli) bi, de bi den Minschen gefährliche blöerige Schieteree utlösen könnt.

Krankmakers[ännern | Bornkood ännern]

Topographische Biller vun Kolonien vun E. coli O157:H7 (A) 43895OW un (B) 43895OR up Agar (48 h bei 28 °C)

E. coli is en gram-negativ Staff-Bakterium, dat wiethen vörkamen deit un faken de Oorsaak vun Schieteree is. Dat gifft unbannig veel verschedene Stämm, de een mit Hölpe vun de Serologie ut'neen holen kann. Se weert indeelt na de Kraft, mit de se krank maken könnt. EHEC is 1977 to'n eersten Mol beschreven wurrn.

Vunwegen en Reeg vun sunnerliche Egenschoppen könnt Enterohämorrhagische Escherichia-coli-Bakterien (EHEC) krank maken: Dör en egen Hüllenprotein (Adhäsin) könnt se sik an de Epithelzellen vun de Darmwand anbacken. Denn hefft se dör en Phageninfektschoon en Gen, wo se en Toxin (Gift) mit produzeern könnt, wat liek is mit dat Nervengift vun Shigella dysenteriae. Sien Naam is Shiga-Toxin oder ok Vero-Toxin. Amenne produzeert de EHEC-Stämm ok noch en Gift, wat dat Bloot in Dutt maakt (Hämolysin). An'n meisten kaamt de dree Serogruppen O157, O103 un O26 vör. Se maakt meist 60% vun de Krankmakers ut. De Bookstave „O“ (nich de Ziffer „Null“) steiht hier for de Lipopolysaccharide up de buterste Zellmembran vun de Bakterien.

Mehr Kranke in Düütschland 2011[ännern | Bornkood ännern]

Vun Mai 2011 af an hett dat in Düütschland mehr Lüde, as sunst geven, de an de sware EHEC-Süke krank wurrn sünd. Toeerst hannel sik dat um Noorddüütschland, later is ok vun Kranke in Süüddüütschland snackt wurrn. An’n 24. Mai hett dat Berichte over 400 Fäll geven, wo de Verdacht up EHEC bestunn. Een Minsch weer to düsse Tied an de Krankheit sturven. [1] Mehr, as 80 Lüde hefft to düsse Tied an hämolyytsch-uräämsch Syndrom (HUS) leden. In dat ganze Johr 2010 harr dat alltosamen blot 65 Lüde geven, de vun EHEC dat HUS kregen harrn. [2]As de Süke in’n Mai 2011 utbraken weer, sünd sunnerlich nich Kinner, man de Groten bedrapen wurrn, de meisten vun jem sünd Froenslüde ween. Dat Robert-Koch-Institut hett dor vun snackt, dat „dat nich normol weer, so veel sware Fäll in so korte Tied“ up en Bulten to sehn. Ok weer dat nich normol, in wat for’n Oller de Krankheit utbreken dö. In de verleden Johre harr dat noch nie nich so veel Fäll in so korte Tied mit so veel upwussene Kranke geven. Dat Robert-Koch-Institut hett bovenhen verklaart, dat weer mööglich, dat de Born vun de Infektschoon jummers noch aktiv weer. [3] An’n 26. Mai 2011 hefft Forschers um Helge Karch vun dat Uniklinikum Mönster rum den Krankmaker-Stamm HUSEC 41 nippe utfunnen. Düsse Krankmaker is mit Antibiotika nich unner to kriegen. Blot mit Carbapeneme kann he toschann maakt weern, man dat kann ut annere Grünn nich anwennt weern.[4] Toeerst weer nich klaar, wo de Süke overhoop herkamen dö, man dat Hamborgsche Institut for Hygiene un Umwelt hett an’n 26. Mai faststellt, de Born for de Infektschoon weern Gurken ut Spanien (Málaga, Almería), de over den Hamborger Grootmarkt verhökert wurrn sünd. [5]

Wie dat mit de Krankheit aflopen deit[ännern | Bornkood ännern]

Wenn een sik mit de Bakterien ansteken hett, kann dat angohn, dat nix wieter passeern deit. Sunst warrt dor na en Tied vun normolerwiese een bit dree Dage (Inkubatschoonstied), hen un wenn avers ok bit to acht Dage, en Gastroenteritis vun. Dor kann denn en enterohämorrhaagschen Colitis vun weern. De Toxine maakt dor denn de Zellen vun de Darmwand un vun de Wannen vun de Blootfatten to Dutt.

Wenn dat sunnerlich böös aflopen deit, is as Komplikatschoon ok en hämolyytsch-uräämsch Syndrom (HUS) mööglich. Dor kann dat ok noch neuroloogsche Komplikatschonen bi geven. Um un bi 85 % vun all HUS-Fäll kaamt vun en EHEC-/STEC-Infektschoon vun her. De annern Fäll sünd bi Shigellen oder annere Krankmakers mööglich. In dat Johr 64 sünd 64 Fäll vun HUS an dat Robert-Koch-Institut in Berlin mellt wurrn. In dat Johr 2002 weern dat 114, 2003 sack de Tahl denn wedder af up 81 Fäll. Achter de högere Tahl vun 2002 steek en, sunst ganz roore, „Sorbitol-fermenterende Variante“ vun EHEC O 157: H-, de al 1988 un 1996 de Süke in Bayern utlööst harr. Dormols hett dat en „Fall-Kuntrollstudie“ geven. Dor is bi rutkamen, dat enkelte Produkte en höger Risiko bedüden dö. Dor hannel sik dat dormols um sülvst maakten Appelsapp un um en Produkt mit Joghurt bi. Wat amenne würklich de Süke utlööst hett, konn denn avers nich würklich rutfunnen weern.[6]Utscheedt weert de Bakterien normolerwiese na 5- 20 Dage. Bi Kinner kann sik dat avers ok over Maande hen trecken. In düsse Tied is dat mööglich, dat annere Lüde sik ansteken doot.

Belege[ännern | Bornkood ännern]

  1. Frankfurter Allgemeine Zeitung: Erste Todesopfer nach EHEC-Infektion, 25. Mai 2011.
  2. Süddeutsche Zeitung: Wie häufig sind EHEC-Erkrankungen?, 25. Mai 2011.
  3. Informationen zum EHEC/HUS-Ausbruchsgeschehen, Stand 26.5.2011, 9.00 Uhr, Mitteilung des Robert-Koch-Instituts, afropen an’n 26. Mai 2011.
  4. http://www.deutsche-apotheker-zeitung.de/pharmazie/news/2011/05/26/ehec-typ-identifiziert-hoffen-auf-schnellere-testergebnisse.html | „Deutsche Apothekerzeitung“ an’n 25. Mai 2011: EHEC-Typ identifiziert – Hoffen auf schnellere Testergebnisse|togrepen an’n 25. Mai 2011
  5. Hamburger Abendblatt: Gurken sind Quelle, afropen an’n 26. Mai 2011
  6. RKI: Epidemiologisches Bulletin 22/2003