Donn Fulton Eisele

Vun Wikipedia
Offiziell NASA-Foto

Donn Fulton Eisele (* 23. Juni 1930 in Columbus, Ohio; † 2. Dezember 1987 in Tokio, Japan) weer en US-amerikaansch Astronaut.

Donn Eisele hett sien Bachelor-Afsluss vun de U.S. Naval Academy (1952) un en Master-Afsluss vun dat U.S. Air Force Instute of Technology (1960) maakt. Dornah is he to de Air Force wesselt, wo he as Testpilot insett wurr.

1963 wurr he vun de NASA för de darte Astronautengrupp utwählt. An’ 29. September 1966 wurr he as Pilot för den tweeten bemannten Apollo-Floog mit utsöcht. De beid anner Crew-Liddmaaten sullen Walter Marty Schirra as Kommandant un Ronnie Walter Cunningham ween. In' November 1966 wurr disse Floog afseggt, un de dree Astronauten wurrn de Ersatzmannschap för den eersten bemannten Apollo-Floog, Apollo 1. Bi en Test an' 27. Januar 1967 keemen aber all dree Liddmaaten vun de Hööftmannschap to Dood, un all Mannschapsindeelen weern vöreerst henfällig. An' 9. Mai 1967 wurrn Schirra, Eisele un Cunningham denn as Mannschap för den eersten bemannten Apollo-Floog bekannt geven. De Mission harr nu de Beteken Apollo 7.

Apollo 7 is an' 11. Oktober 1968 start un bleev meest 11 Daag in de Eerdumloopbahn. Ut technisch Sicht leep disse Mission hervörragend. Dat wurr en Rendezvous mit de bövere Stuuf vun de Saturn 1B-Rakete dörführt un de eerst Feernsehbiller ut en amerikaansch Ruumschipp to de Eer send. De Mission gung an’ 22. Oktober seker to Enn'. 10 Daag, 20 Stünn un 8 Minüüt weern se ünnerwegens. De Astronauten hebbt aber wiels de Mission ünner en Schnuppen leeden un dat herrsch en temelk reizt Stimmung tüschen de Floogleitzentraal un de Besatten vun dat Ruumschipp. All dree Astronauten kreegen dornah kien Insatzmögelkeiten bi de NASA mehr, ofschons Eisele noch Liddmaat vun de Ersatzmannschap vun Apollo 10 weer.

1972 hett he de NASA verlaaten.

An’ 2. Dezember 1987 is Eisele an en Hartinfarkt storven, as he sück wiels en Geschäftsreis in Japan uphollen dee. He weer verheiraadt mit Susan, mit de he twee Kinner harr. Ut en fröhere Ehe harr he noch veer wiedere Kinner.

Eisele weer Freemüerer un hörr de Luther B. Turner Lodge #732 in Columbus, Ohio, an

Weblenken[ännern | Bornkood ännern]

Donn F. Eisele. Mehr Biller, Videos oder Audiodateien to’t Thema gifft dat bi Wikimedia Commons.