Don Carlos (Spanien)

Vun Wikipedia
Wesseln na: Navigatschoon, Söök

Don Carlos (* 8. Juli 1545; † 24. Juli 1568 in Madrid) weer de Söhn vun König Philipp II. vun Spanien un siene eerste Fro, Prinzess Maria vun Portugal.

Leven[ännern | Bornkood ännern]

Don Carlos

De Mudder is storven, as Don Carlos boren weer. Na de Geboort weer en poor Daag lang allerhand scheef gahn. As öllsten legitimen Söhn weer he de Thronarv (Infant) vun Spanien. He hett en Puckel harrt un weer geistig torüchbleven. Ünner Ümstänn hung dat tosamen mit de neege Verwandtschop vun siene Öllern. Carlos weer baven de Maten swack. Eerst mit dree Johren lehr he Lopen. In de veerte Generatschoon vun siene Vöröllern geev dat bloß sess Vöröllern un nich, as normolerwiese, 16 Vöröllern. Siene Groot-Grootmudder weer Johanna vun Kastilien mit den Ökelnaam „Johanna, de Verrückte“. As ehr Mann mit 28 Johren storven weer, is se tietleevs in de Borg vun Tordesillas achter Trallen holen wurrn.

In dat Johr 1560 hett de Adel vun Spanien Carlos as Infanten gellen laten. Sien Vadder hett avers nich to veel vun em holen. As de Achtigjöhrige Krieg mit de Nedderlannen losgüng, hett de König nich sien Söhn, man Fernando Álvarez de Toledo as Feldherr dor henstüürt. Dat weer de drüdde Hartog vun Alba. Dor stell sik Carlos gegen sien Vadder. Ut schiere Vergrelltheit hett he en List tohopenstellt mit de Lüde, de he afsluuts nich utstahn konn. An de eerste Steed stunn dor sien Vadder. In dat sülbige Johr hett he sien Vadder sien leefst Peerd doot maakt. Al ehrder weer upfullen, dat he en gruligen, venienschen Keerl weer. Al Densten, de nu mol üm em to ween mössen, leven gefährlich. Jummers weer dat mööglich, dat he jem angriepen un slahn dö. Ok Deerter hett he geern quäält.

Vunwegen dat he sien Söhn begööschen wull, hett Philipp em to'n Minister in'n Staatsraat maakt. Toeerst is dat ok ganz goot gahn. Man denn hett he wedder afsunnerliche Saken maakt. Dor hett sien Vadder em de Upgave wedder wegnahmen. Denn wull he utkniepen na de Nedderlannen, man sien Vadder hett em in't Kaschott bringen laten. Dor weer dat unbannig heet un de Infant hett den Updrag geven, de Steenbodden schull bit an dat Knee unner Water sett weern. Dor lä he denn stunnenlang in un hett unbannige Massen vun scharpe Pasteten dalslaken. Dor hett he denn noch Liters vun ieskoolt Water to drunken. As he mitkreeg, dat de Dood nich mehr wiet weg weer, wull he sien Vadder noch mol sehn, man de kreeg dat nich över't Hart. Dor is he denn storven, ehr he vör Gericht kamen is.

Dat Philipp sien Söhn an'e Siet hett maken laten, hett sik nie nich bewiesen laten. Dat lett avers wohrschienlich, dat de Prinz sik dootfreten un -sapen hett. He harr al ehrder versöcht, sik süms ümtobringen. Dor harr he Demantringen üm dalslaken un nix to sik nahmen.

In de Literatur[ännern | Bornkood ännern]

Beröhmt wurrn is besunners Friedrich Schiller sien Theaterstuck Don Carlos vun 1787. Up den sien Grundlaag hett Giuseppe Verdi later siene Oper Don Carlos schreven. Dat Don Carlos wat mit siene Steefmudder Elisabeth vun Valois harrt hebben schall, is bloß Snackeree.