Die Sturmflut

Vun Wikipedia
Filmdaten
Plattdüütsch Titel:
Originaltitel: Die Sturmflut
Düütsch Titel: Die Sturmflut
Produkschoonsland: Düütschland
Johr vun’t Rutkamen: 2006
Läng: 182 Minuten
Originalspraak: Düütsch
Öllersfreegaav in Düütschland: FSK 12
Filmkru
Speelbaas: Jorgo Papavassiliou
Dreihbook: Holger Karsten Schmidt
Produkschoon: Nico Hofmann
Sascha Schwingel
Barbara Thielen
Musik: Harald Kloser
Kamera: Yvonne Tratz
Snitt: Ollie Lanvermann
Dietrich Toellner
Szenenbild: Josef Sanktjohanser
Thomas Stammer
Kledaasch: Anja Niehaus
Dorstellers

Die Sturmflut (op plattdüütsch so veel as „De Stormfloot“) is de Titel vun en düütschen Feernsehfilm, de in’n Opdrag vun den Privatsenner RTL vun teamWorx Television & Film GmbH produzeert worrn is. Speelbaas weer Jorgo Papavassiliou. Ünner de Schauspelers weern vele naamhafte Lüüd as Götz George, Jan Josef Liefers, Benno Fürmann, Heiner Lauterbach, Nadja Uhl un vele mehr. To’n eersten mol weer de Film as Tweedeler an’n 19. un 20. Februar 2006 in’t Feernsehn utstrahlt un weer vun mehr as ölven Millionen Tokiekers verfolgt. De Film dreiht sik üm de Hamborger Stormfloot vun’n 16. Februar 1962.

Inholt[ännern | Bornkood ännern]

Al an’n 14. Februar 1962 loopt in’t Seewederamt Hamborg Informatschonen op, de op en Storm hendüüt. De Meteoroloogsche Susanne Lenz seggt ehrn Baas Friedrich Pröscher dorophen un gifft Wohrschau vunwegen, dat en Stormfloot draut. Pröscher will dorvun aver nix weten.

De 15. Februar: de Familie vun Katje Döbbelin maakt sik för ehr Hochtiet mit den Dokter Markus Abt praat. Ofschoonst intwüschen ok eerste Henwiesen op de Gefohr vun en Stormfloot in’t Radio kamt, maakt sik in Hamborg noch nümms Gedanken doröver. In’t Huus vun Familie Abt leegt de Sorgen woanners: Karl Abt vertellt sien Söhn düütlich, dat Katja nich vun Stand is, un he de Hochtiet mit Katja nich gootheten will. Markus warrt jüst so düütlich, as he em vertellt, dat he Katja leev hett un gor nich doran denkt, de Hochtiet aftoseggen.

An’n 16. Februar maakt sik Susanne Lenz mit’n Heevschruever op’n Weg na de Bohrinsel „Frieda I“, woneem ok en Wederstatschoon ünnerbröcht is. Se snackt mit Claussen, den Baas vun de Bohrinsel, as en Blitzslag de Bohrinsel dröpt. De Vörarbeiter Bernd Riemann kriggt dorbi swoor wat af. Butendem fallt de Funk ut. De Bohrinsel kriggt Slaggsiet un draut ünnertogahn.

In Hamborg leggt intwüschen de Matroos Jürgen Urban an, de hier Statschoon maakt. He will sien Vadder besöken, de in’t Krankenhuus liggt. Dorbi warrt he wies, dat Katja – sien grote Leev ut sien Jöögd – heiraten will. He söcht ehr op un fraagt na, worüm se nie op sien Breven antert hett. Se hett aver sien Breven nienich kregen, vunwegen dat ehr Mudder se affungen hett. Eerst later warrt se dat wies. Jürgen beslutt, nich wedder in See to steken un blifft in Hamborg. Intwüschen kriegt de eersten Dieken Löcker.

An’n Avend finnt de Polteravend vun Katja un Markus statt. De Fier is in Hamborg-Willemsborg. Man, dat löpt allns nich as dat schall: Markus mutt en Bereitschopsdeenst övernahmen, Katja ehr Broder Stefan hett de Mööglichkeit mit sien Musikgrupp in en Club to spelen un Katja sülvst is vun Jürgen dör’nanner. De hett sik en Kamer in en Pension nahmen un beslutt op de Polterhochtiet kloortostellen wat he föhlt. Markus is natürlich böös doröver un dat gifft Striet. De Polteravend is dormit in’t Water fallen, vör allen as Markus denn ok noch wohrhaftig to en Nootfall in’t Krankenhuus ropen warrt.

Op de „Frieda I“ hett intwüschen een den Funk wedder repareeren künnt un sett en Nootroop af. So gaht endlich ok Informatschonen över dat Utmaat vun den Storm in Hamborg in. Man, de Bohrinsel hett wieter grote Lasten. Claussen un Lenz versöökt, en utfallen Maschien wedder ingang to setten, üm de Plattform stabil to kriegen. Dat kriegt se ok hen, mööt denn aver üm jemehr Leven bang wesen, vunwegen dat Water över jem inbroken is. Se mööt den Ruum vulllopen laten, üm dat se de Luuk na baven apenmaken künnt un dör dat Water opduken. Jüst so even kamt se wedder rut ut jemehr Laag. An’n Morgen kann de Bohrinsel evakueert warrn, man de Vörarbeiter blifft ünnerwegens dood.

Intwüschen warrt Karl Abt in’t Laagzentrum wies, dat Willemsborg ünner Water steiht, vunwegen dat mehrere Dieken broken sünd. Jüst dor woneem de Polteravend weer. De letzten Lüüd vun de Hochtiets-Sellschop töövt jüst op en Taxi, as de Flootbülg ankummt. Bi den Versöök Katja ehrn Söhn Philip to redden kummt de Trotüüg üm. Jürgen, Katja un Philip slaht sik afsneden vun all annern na en Kark dör. Intwüschen warrt ok Markus gewohr dat Willemsborg ünner Water steiht. He kann aver nich weg, vunwegen dat he in’t Krankenhuus bruukt warrt.

Fröh an’n Morgen dröpt de Binnensenater Helmut Schmidt in’t Laagzentrum. Na en Bericht över de Situatschoon övernimmt dat Regeer. He deit allns, wat he för nödig hollt, üm de Minschen to redden – ok wenn dorför unkonventschonelle Saken nödig sünd. Ünnern annern röpt he en Genral in’t Hööftquarteer vun de NATO an un fraagt em üm Hülp, de he ok kriegen deit. Karl Abt leggt sik in’t Laagzentrum mit Schmidt an, den he för dat Överpedden vun sien Kumpetenzen verantwoortlich maken will. Schmidt lett sik vun Abt aver nich bang maken. Vun de Bundswehr ut fleegt intwüschen de eersten Heevschruvers los, üm en Överblick över de Laag in Hamborg to kriegen.

As Jürgen Katja in de Kark in Sekerheit weet, maakt he sik op’n Weg na’t Krankenhuus, üm na sien Vadder to kieken. Vun em höört he, dat Philip in Wohrheit sien Söhn is. Markus dorgegen warrt vun Jürgen wies, woneem sien Leevste is un lett sik mit’n Heevschruver na de Kark flegen.

Jürgen un Markus breekt tosamen na en Aftheek op, üm dor na wichtige Heelmiddels to kieken. Dör Gas, dat ut en Leitung utströömt, kummt dat dorbi to en Explosion. Toeerst sütt dat ut, as wenn blots Markus överleevt hett. Man, ok Jürgen kummt wedder togang, is aver inklemmt. Markus kriggt dat woill mit, lett Jürgen aver alleen torüch un vertellt Katja, dat he nich överleevt hett. Katja glöövt em dat aver nich un söcht nu sülvst na Jürgen. Se finnt em ok, kriggt em alleen aver noch free. Ofschoonst dat Huus intostörten draut, blifft se bi em. Opletzt kummt Markus un hülpt ehr doch noch, Jürgen to redden. Kort dorna stört dat Huus in.

To’n Enn warrt en Anspraak vun den Binnensenater Schmidt wiest, de sik be de velen Hülpers, bi de Bundswehr un bi de NATO för jemehr Hülp bedankt. Wiel de Reed sütt man Biller vun dat överswemmte Hamborg un de Lüüd. Jürgen, Katja un jemehr Söhn Philip teht opletzt op den Hoff vun sien Vadder. Markus nimmt en Steed in Berlin an. Bi en Drapen snackt sik de beiden en letzt mol ut.

Kritik[ännern | Bornkood ännern]

  • Der Spiegel weer mit den Film nicht tofreden un kritiseer, dat dat en packen Filmdrama warrn künnt harr, man RTL de Geschicht mit to veel Leevkitsch verwatert harr. Tiethistoorsche Richtigkeit fehl den Film, un dat weer dör en Övermaat vun plastisch Nabilln to kumpenseren versöcht.[1]
  • Op Kino.de weer de Film as perfekt op den Senner RTL tosneden beschreven. De Leistungen vun de Schauspeler weer loovt as ok de Ümstand, dat en lange Reeg vun naamhafte düütsche Schauspelers mitspelen doot. De Film weer natürlich nix för Puristen, mann pass wunnerbor för de Tokiekers vun RTL.[2]

Utteken[ännern | Bornkood ännern]

De Feernsehprodukschoon weer för tosamen veer Priesen vörslahn, dorünner tweemol för de Goldene Kamera för Nadja Uhl un Christian Berkel, beid as beste Dorstellers. Uttekent weer de Film tweemol:

  • 2006: mit den Sünnerpries vun den Bayerischen Feernsehpries för Nico Hofmann
  • 2007: mit den Romy in de Kategorie Best Produzent för Nico Hofmann

Achtergrund[ännern | Bornkood ännern]

Dat Filmdrama baseert op de Begeevnissen vun de Stormfloot vun’n 16./17. Februar 1962 in Hamborg. Bi disse Naturkatastrooph sünd in de Stadt 315 Minschen doodbleven. Alltosamen hett de Floot üm un bi 6000 Hüüs toschannen maakt De dormolige Binnsenator vun Hamborg, de latere Bundskanzler Helmut Schmidt warrt in dissen Film vun Christian Berkel speelt.

De Produskschoons hett ruchweg acht Millionen Euro köst. Finanzeert weer de Film ünner annern ok vun de FFF Bayern, vun de Filmstiftung NRW, de Nordmedia un de Filmföderung Hamburg. De Dreiharbeiten hebbt 70 Daag anduert un weern ünner annern in’n Hamborger Haven, Loonborg un Essen.

Filmfehlers[ännern | Bornkood ännern]

Veel Kritik weer an den Film öövt vunwegen de tallrieken histoorschen Fehlers un de överdreven Dorstellen vun de egentlichen Stormfloot.

En barschen Fehler is to’n Bispeel de Speeloort vun de Bohrinsel „Frieda I“. De is nich mööglich, vunwegen dat de Eerdöölfeller in de Noordsee erst 1969 opdeckt weern – eerst ruchweg söven Johr na de Floot. Ok de Henwiesschiller op de Füerlöschers op de Bohrinsel geev dat noch nich. Se weern eerst in de 1990er Johren inföhrt (EU-Norm).

Ok nich in de Tiet höört dat havereerte Containerschipp. Dat eerste Schipp vun disse Oort hett eerst 1966 Europa anlopen. Un ok een vun de Rettungscheep is to modern, vunwegen den Wulstboog, de eerst Johren later inföhrt worrn is. Dat glieke gellt ok för eenige Rangafteken bi de Bundswehr-Soldaten, de Deels eerst Enn vun de 1970er Johren inföhrt worrn sünd.

Ok kulturell weern eenige Saken verkehrt: Dat Leed, dat Katja ehr Broder op den Polteravend speelt is vun’n Stil her en Grunge-Ballaad, de to keen vun de Stilrichten passen deit, de dormols opkamen sünd. Ok weer an de Frisuren, de vun eenige Dorstellers dragen warrt, to de Tiet vun de 1960er Johren sellschopplich afsluut nich to denken. Dat gellt ok för eenige Ümgangsformen as Gespreken twüschen Vadder un Söhn oder dat „Du“ ünner afsluut frömme Lüüd.

En Flootbülg, as in’n Film wiest, hett dat in Hamborg ok nich geven. Dat Water keem langsom un is jümmer mehr anstegen. Dat weer ok de Grund, worüm so veel Minschen in’n Slaap överrascht warrn künnen. Ok is kuum antonehmen, dat en eenfachen Striepen Kleevband Philip un Jürgen as’n Oort Rettungslien hollen kann, ofschoonst de Bülgen so stark sünd, dat an de glieken Steed sogors ein Auto vun dat Water wegspöölt warrt.

To de Tiet vun de Explosion in de Aftheek, an’n Dag na de Floot, weer dat Gas al in de helen Stadt afstellt. Bito weer dat dormols ok noch Kokeree-Gas, dat een foorts reken künn. Een Dag later weer ok de Stroom afstellt. Radio weer blots noch mit Batterie to höörn.

Verkehrt weer ok Helmut Schmidt sien Rang wiel den Tweeten Weltkrieg. He weer dormols Böverleutnant un nicht Leutnant, as he in’n Film vertellt. Butendem warrt in en Behöörd en Bild vun Theodor Heuss an de Wand wiest. De weer aver al siet 1959 nich mehr Bundspräsident. An sien Steed harr dor en Porträtfoto vun Heinrich Lübke hangen müsst.

Publikatschonen[ännern | Bornkood ännern]

De Film is al an’n 24. Februar 2006 as Dubbel-DVD op’n Markt kamen. Blangen den Feernsehfilm bargt de DVD ünner annern Videoreportagen to de Dreiharbeiten un en Videodaagbook vun den Dorsteller Jan Josef Liefers.

Butendem is dat Filmdrama ok as Höörbook produzeert worrn, dat ut dree CDs mit en Samtspeelduer vun ruchweg 160 Minuuten besteiht. Dorop sünd de Originalstimmen vun all Schauspelers ut’n Film to höörn.

Literatur[ännern | Bornkood ännern]

Borns[ännern | Bornkood ännern]

  1. Filmkritik in Der Spiegel vun’n 19. Februar 2006 afropen an’n 24. November 2012
  2. Filmkritik op Kino.de afropen an’n 24. November 2012

Weblenken[ännern | Bornkood ännern]