Deserto de Viana

Vun Wikipedia
De Deserto de Viana in’n Noordwesten vun Boa Vista

De Deserto de Viana is en Sandwööst (Erg) op dat Eiland Boa Vista in de Republiek Kap Verde.

De Wööst liggt in’n Noordwesten vun’t Eiland un wiest sik op Luft- un Satellitenbiller as en hellen Striepen in de normalerwies mehr röötlich-düsteren Landschopp vun Boa Vista, de sünst to meist 70 % ut Steenwööst (Hammada) besteiht. De Sandwööst hett ruchweg en Läng vun 15 km vun Noord na Süüd un en Breed vun 10 km. Dor binnen gifft dat nich een Wahnsteed.

De Wööst besteiht ut fienen, hellen Quarzsand, de sik dör de Inwirken vun’n Wind to Dünen foormt hett. De Deserto de Viana tellt to de Steden, de geern vun Touristen besöcht warrt, vun wegen dat de Wööst sik vun den Rest vun de Landschop teemlich dull ünnerscheedt. Wat sünner’s is de Deserto de Viana ok in’n geoloogschen Sinn. De Quarzsand kann nicht op dat Eiland sülvst tostannen kamen wesen, vun wegen dat Boa Vista vör allen ut Basalt un Kalksteen besteiht. Man mutt dorvun utgahn, dat de fiene Sand mit den Wind vun’t afrikaansche Fastland transporteert worrn is un ut de Sahara stammt.