De Blaue Engel

Vun Wikipedia
Wesseln na: Navigatschoon, Söök

De Blaue Engel is en plattdüütsch Theaterstück na Heinrich Mann sien hoochdüütschen Roman Professor Unrat.

Mann hett den Professor Unrat 1904 schreven un een Johr later is dat Book in’n Verlag Albert Langen rutkamen. De Theaterversion vun dat Book, de Frank Grupe in’t Plattdüütsche översett hett, hett an’n 5. Oktober 2008 sien Premier an’t Ohnsorg-Theater hatt. Beröhmt is ok de Film Der blaue Engel vun 1930 mit Marlene Dietrich.

Wo dat üm geiht[ännern | Bornkood ännern]

Dat hannelt vun’n Persepter Raat. Raat is en temlichen Tyrann, in’e School un ok buten de School. He hett dat besünners dor op afsehn, Schölers faat to kriegen, de mit sien Naam Spaaß drievt un „Unrat“ to em seggt. Ganz besünners hett he dat op Lohmann afsehn. Ok em will he faatkriegen. In een vun Lohmann sien Heften finnt Raat en Gedicht, dat Rosa Fröhlich todacht is. He will rutfinnen, wat dat mit disse Rosa op sik hett un wat he Lohmann so nich kriegen kann. Raat kriggt rut, dat Rosa in’n Havenkroog De blaue Engel ünner den Naam Lola optreden deit. He besöcht den Kroog un lehrt Rosa kennen. Aver Raat warrt ehr geern hebben. Jümmer wedder kummt he in’n Blauen Engel un jümmer mehr geiht he in de Leevd to Rosa un in sien Rull as Tyrann op. Toletzt smitt em dat Gymnasium rut. Raat deit nu Rosa heiraden un maakt in sien Huus en Lokal apen, dat sik gau to en Dreeppunkt vun de Sellschop in de lüttje Stadt musert. De Lüüd wüllt sik amüseren un ok de smucke Rosa doot ehrn Deel dor an, dat de Lüüd dor all henkaamt. Liekers hebbt de beiden Schullen. Aver as Raat sien olen Schöler Lohmann bi’t Schäkern mit sien Fro süht, do warrt he dull. He versöcht Rosa to erwürgen. Lohmann harr Rosa Geld anbaden. De Kniep liggt noch dor. In sien Brass nimmt Raat Lohmann sien Kniep an sik. Lohmann röppt de Schendarmen un de nehmt Raat mit. De Stadt is nu free vun’n Tyrann Professor Unrat.