Daniel von Arentsschild

Vun Wikipedia

Daniel von Arentsschild (* 1611; † 1670) weer en düütschen Beamten in de Swedentied. He weer Kriegs- un Landraad för de Sweden.

Von Arentsschild is 1611 as Söhn von Katharina, borene Steinwats, un den arzbischöplich-breemschen Stallmeester Georg Arentsen boren.[1][2] Arentsschild harr von 1642 af an sien Sitt in Olendörp un weer mit den Hoff in Sunn belehnt. He weer Oberst un is an’n 19. Juli 1651 von Christina von Sweden adelt worrn un hett denn von Arentsen heten. An’n 30. Mai 1663 hett he von Karl XI. den Naam von Arentsschild tokennt kregen. He weer na de Säkularisation von dat Klooster Himmelpoorten as Propst von dat Klooster Himmelpoorten de eerste Verwalter von dat Amt Himmelpoorten. Toletzt harr he in’t sweedsche Militär den Rang von en Generalleutnant.

He weer in eerste Eh mit Susanne Grantzin verheiraadt (1. Januar 1611–5. Januar 1665) un in twete Eh mit Hedwig Ilse von Kuhla (15. August 1642–16. April 1712), mit de he de Söhns Carl (10. Dezember 1669–20. Mai 1670) un Christoph Daniel (1667–14. Oktober 1721) harr.[3] Dat Epitaph von Arentsschild un sien twete Fro un de Gruftplaat von sien eerste Fro sünd vondaag noch in de Martinskark in Olendörp to finnen, för de Arentsschild ok den Altor stift hett.

In Olendörp is vondaag de Von-Arentsschild-Straat na em nöömt.

Wapen[ännern | Bornkood ännern]

Arentsschild sien Wapen wiest na’n Adelsbreev von 1651 baven vörn op roden Grund halv en Aadler mit twee Köpp, baven achtern op gollen Grund en rood Hart mit dree Koornohren, de dor baven rutkiekt, un ünnen op blauen Grund en Rüter in Harnsch, de op en bruun Peerd sitt. Baven op dat Wapen sitt en Turnierhelm mit Kroon mit en gollen Lööw, de dor halv achter rutkickt. Buten rüm söss Fahnen, von de de bütersten gollen, de in’e Midd rood un de binnersten blau sünd. De Helmdeken sünd blau, rood un gollen.[4]

Mit’n tweten Adelsbreev von 1663 wiest sien Wapen baven vörn un ünnen achtern op swarten Grund halv en gollen Lööw un baven achtern un ünnen vörn op gollen Grund halv en swarten Aadler mit utreckt Flünk. Baven op dat Wapen en Lööw mit Kroon, de in beide Klauen twee swarte Aadlerflünk höllt. De Helmdeken sünd swart un witt.[4]

De Aadler un Lööw ut Arentsschild sien Wapen sünd vondaag ok in dat Wapen von Olendörp to finnen.

Footnoten[ännern | Bornkood ännern]

  1. http://compactgen.com/cg/a/r/arents.htm#S39436
  2. Ernst Heinrich Kneschke: Neues allgemeines deutsches Adels-Lexicon. Georg Olms Verlag, 1859, Sied 103
  3. http://gw.geneanet.org/cvpolier?lang=en;p=christoph+daniel;n=von+arentschild
  4. a b Christian Friedrich August von Meding: Nachrichten von adelichen Wapen. Band 2, Sied 20, http://books.google.de/books?id=n6xAAAAAcAAJ&pg=PA20