Düütsche Volksunion

Vun Wikipedia
Wesseln na: Navigatschoon, Söök
Logo vun de DVU

De Düütsche Volksunion (afkört DVU) is en düütsche politische Lüttpartei, de an’n 5. März 1987 in München grünnt worrn is un en indragen Vereen, den dat al siet den 18. Januar 1971 gifft. Dat Bundsamt för Verfatenschuul hett de Partei as rechtsextrem instoopt. De Vörsitter vun de DVU weer vun ehr Grünnen 1971 bit 2009 de Verlegger Gerhard Frey, de in de Partei in disse Tiet de Figur in de Partei weer, de dat Seggen harr.

Struktur[ännern | Bornkood ännern]

Verbännen un Parteistruktur[ännern | Bornkood ännern]

De DVU hett ehrn Sitt in München in’n Stadtdeel Pasing[1]. De hüütige Vörsitter is de Koopmann Matthias Faust, de den Parteigrünner Gerhard Frey in’n Februar 2009 aflöst hett. Sien Viezen sünd Ingmar Knop, Thomas Mehnert, Hans Weidenbach. In’n Gegensatz to annere Partei wiest se keen grote Organistaschoonsstruktur op, un se hett ok keen Jöödg- oder annere Ünnerorganisatschonen as Arbeitskreisen[2]. In all düütsche Bundslänner gifft dat Landsverbännen vun de DVU as ok ’n ganze Reeg vun Kreisverbännen, de aver deelwies nich aktiv sünd. De Landsverbännen mit de meisten Liddmaten sünd Nordrhien-Westfalen (1.200 Liddmaten)[3], Baden-Württemberg, Berlin, Brannenborg, Bayern, Neddersassen un Hessen. Tosamen hett de Partei üm un bi 7.000 Liddmaten (Stand 2007). Jüst so as bi annere Parteien gifft dat in de DVU verschedene Akschoonsgemeenschoppen, in de sik Liddmaten mit en sünnert Thema uteneenseet. To’n Bispeel gifft dat de Volksbewegen för Generalamnestie (VOGA), de Initiative för Utlännerbegrenzen (I. f A.), de Akschoon Oder-Neiße den Ehrenbund Rudel (Gemeenschop to’n Schuul vun de Frontsoldaten)[2].

Anners wat[ännern | Bornkood ännern]

De DVU is vun ehrn ehmoligen Parteivörsitter Gerhard Frey autoritär föhrt un to’n wesentlichen Deel ok mitfinanzeert. Se weer dorüm jümmer wedder ok as „Frey-Partei“ betekent. He hett in de Saak- un Personalpolitik vun de Partei en düchtig Woort hatt as ok bi de Utwahl vun de Kandidaten vun de DVU bi Parlamentswahlen. Bi Afstimmen binnen de Partei kreeg he för sien parteipolitischen Ansichten meist jümmer de Aflsuute Mehrheit.

De Liddmaten vun de Partei sünd to’n gröttsten Deel in en middler’t oder höger’t Öller, junge Lüüd sünd in de Minnerheit. De Tall vun de Liddmaten blifft siet Anfang vun de 1990er Johren ruchweg op’n glieken Stand oder sünd tomeist torüchlöpig. Dat Anwarven vun Liddmaten löpt vör allen över de vun Frey rutgeven National-Zeitung. Wählt warrt de DVU veel vun de so nöömten Protest-Wählers, de mit de Regerensparteien un jemehr Politik nich tofreden sünd. De Stammwählerschop vun de DVU is dorgegen lütt, as bi vele annere Lüttparteien ok.

As gröttste Geldgever vun de Partei hett de Wekenblatt-Rutgever Frey bit nu hoge Krediten an de Partei geven. De Partei is somit in finanzielle Sicht vun em afsluut afhangig. Dorto hett he 1997 seggt: „Ich bin tatsächlich der einzige Parteivorsitzende seit Gründung der Bundesrepublik, der seine Partei finanziert.[4]“ Dör disse Afhangigkeit is en politischen Pluralismus oder politische Insaag binnen de DVU kuum mööglich. Dat Druckwark National-Zeitung kann as inoffiziell Presseorgan vun de Partei ansehn warrn. En klore Scheden twüschen Partei, Wekenblatt un Verlag gifft dat vun wegen de Konstellatschoon nich.

Inholtlich Profil[ännern | Bornkood ännern]

De DVU warrt vun’n Verfatenschull vun’n Bund un vun de Länner beobacht un in de Verfatenschulberichten as rechtsextrem ansehn. Disse Inorden warrt vun de Partei sülvst bestreden.

Grundinstellen[ännern | Bornkood ännern]

Kritikers vun de Partei sünd de Ansicht, dat dat Parteiprogramm vun de DVU den Sinn hett, mit de Grundinstellen vun de Partei achtern Barg to hollen, vun wegen dat dat bewusst moderat verfaat is. In de Präambel steith t.nbsp;B.: Die DEUTSCHE VOLKSUNION (DVU) bekennt sich vollinhaltlich und ohne jeden Vorbehalt zur freiheitlich-demokratischen Grundordnung, wie sie im Grundgesetz für die Bundesrepublik Deutschland verfaßt ist. un Die Verwirklichung der vom Grundgesetz vorgeschriebenen Verfassungsziele ist für die DVU oberstes Gebot. Was die DEUTSCHE VOLKSUNION (DVU) durchsetzen will, ergibt sich aus dem alle Politiker verpflichtenden Amtseid, wie er im Artikel 56 des Grundgesetzes für die Bundesrepublik Deutschland steht: „Ich schwöre, daß ich meine Kraft dem Wohle des deutschen Volkes widmen, seinen Nutzen mehren, Schaden von ihm wenden, das Grundgesetz und die Gesetze des Bundes wahren und verteidigen, meine Pflichten gewissenhaft erfüllen und Gerechtigkeit gegen jedermann üben werde. So wahr mir Gott helfe. Daß deutsche Politik in Deutschland endlich wieder gemäß dieser Vorschrift des Grundgesetzes betrieben wird, ist das Hauptziel unserer Partei.

Wat de Utlännerpolitik angeiht, foddert de Partei na jemehr Programm, dat de Utlännerandeel begrenzt, de tonehmen Utlännerstroom afbroken un Asylverfohren un dat Utwiesen vun kriminelle Utlänner gauer maakt warrn schöllt. Wietere Telen vun de Partei sünd de Schuul vun nich-boren Leven un de Revision vun de Oder-Neiße-Lien. Butendem bargt dat Programm jümmer wedder afmillern Utsagen,t. B. dat na jemehr Opfaten vun Minschenwürde, wohrlich politisch Verfolgte schuult warrn mööt, se dat kommunistische un natschonalsozialistische Unrecht beduert un dorför sorgen wüllt, dat so wat nich noch mol passeert, oder ok, dat se dorför sünd, de Nehrmiddel, de in de Europääschen Gemeenschop över sünd, to’n Minnern vun Hunger in de Drüdden Welt bruukt warrt.

In de National-Zeitung kamt de Ansichten un Opfaten vun de Düütschen Volksunion aver veel düütlicher an’n Dag as in’t Programm.

Instellen to’n Natschonalsozialismus[ännern | Bornkood ännern]

De Verbreken vun’n Natschonalsozialismus warrt vun de Partei nich bestreden, man dat warrt versöcht, disse Verbreken gegen de Verbreken vun annere Völker un Länner optoreken. In den Tosamenhang klaagt de Partei över en na ehr Menen bannig eensietigen Oparbeiten vun de verleden Tiet. Histoorsche Begeevnissen as dat Bombadeeren vun Dresden, de meist vullstännige Utrotten vun de Indianers in Amerika, de millionenfacken Moorden vun Stalin oder de Verdrieven na’n Tweeten Weltkrieg warrt ok as „Holocaust“ betekent, wodör versöcht warrt, den Völkermoord an de Jöden as en Begeevnis ünner vele dortostellen un dordör aftominnern.

In’t Programm steiht in’n Afsnitt Gliekberechtigen för Düütschland, dat de Partei doran denken helpt, dat ok vun de Winnermächt swore Kriegsverbreken maakt worrn sünd un dat de Plicht to de Wohrheit verbeden deit, dat Lieden vun de Düütschen to verschwiegen. Bito warrt en beter’t Achten vun de düütschen Soldaten foddert, vun wegen dat dat en Versünnigen an’t Andenken vun de Doden un en Besehren vun’t de Würde vun de Soldaten, de den Krieg överleevt hebbt, weer, wenn ean dat Lieden un de Leistungen vun de Frontgeneratschoon nich achten deit.

In dissen Tosamenhang wiest sik de DVU as Gegner vun noch mehr Holocaust-Denkmolen un foddert, dat an de Steed Mahnmolen för de Kriegsopper vun’t egen Volk opstellt warrn schülln. In de parteineegen National-Zeitung warrt jümmer wedder Themen ut de Nazi-Tiet opgrepen as to’n Bispeel „Ewig för Hitler böten?“. Dat Wekenblatt versteiht sik dormit as Gegenstimm to de „linken Press“, de na Opfaten vun de Partei en Kollektivschuld vun de Düütschen tosnackt.

Instellen gegenöver annere Organisatschonen[ännern | Bornkood ännern]

Anfang vun de 1990er Johren hett de DVU en Besluss to’n Afgrenzen vun Neonazistische Partei un Vereenigen, as Fre’e Kameradschoppen slaten. Vun wegen dat de DVU aver faken mit de NPD un annere rechstsextremistische Kräft tosamenarbeit, gifft dat vun vele Sieten Twievel doran, dat de Beluss ok in Wohrheit verbindlich is. De Woortluud vun’n Unvereenborkeitsbesluss vun’n Bundsvörstand un de Landsvörsitters, de an’n 22. November 1992 vun Bundsparteidag bestätigt worrn is, seggt:

  • En Liddmaatschop in de DVU is nich vereenbor mit de Liddmaatschop bi Organisatschonen, de dat Grundgesett bekämpt oder nich acht, oder de hüütige Rechtsorden schuldhaft besehrt.
  • En Liddmaatschop in de DVU is nich vereenbor mit de gliektietige Liddmaatschopsünners in de nafolgen politischen Parteien: FAP, Natschonaal List, …, Natschonaal Front, … as ok bi Nafolgorganisatschonen un Grupperen ü.a. üm de Personen Röder, Busse, Reitz, Pape, Althans, Worch.
  • En Liddmaatschop in de DVU is nich vereenbor mit de gliektietigen Tohörigkeit to Grupperen vun de Skinheads.
  • En Liddmaatschop in de DVU is nich vereenbor mit dat Warven un Ünnerstütten för Publikatschonen, de gegen dat Grundgesett oder de Rechtsorden, sünners gegen Straafbestimmen, richt sünd.

In’n Gegendeel dorto hett de DVU aver af 2004 en Bündnis mit de NPD slaten. Butendem weer 2005 de Liddmaatschop vun den Söhn vun de brannenborgschen DVU-Frakschoonsvörsittersche Liane Hesselbarth in de verboiden Neonazi-Kameraadschop ANSDAPO allgemeen bekannt.

Finanzen[ännern | Bornkood ännern]

Geldströöm[ännern | Bornkood ännern]

Na de Bundsdrucksaak 16/5230 harr de DVU in’t Johr 2005 Innahmen vun ruchweg 1 Million Euro, wovun 112.000 Euro Bidrääg un 420.000 Euro ut Spennen un Mandatsdrägerbidrääg kamen sünd. Ruchweg 245.000 Euro sünd ut staatliche Geller. In’t Johr 2007 hett de Partei Toschüss in Hööch vun 225.763,75 Euro betogen[5].

De Partei hett 2005 ’n Överschuss vun üm un bi 500.000 Euro maakt. In dat Johr hett de Partei en Grootspennen över 19.000 Euro vun den bekannten Rechtsextremisten Adolf Wührmann ut Bremen kregen. Ut dat Arv vun den bekannten Rechtsextremen Günter Ritgen sünd de Partei 125.000 Euro tokamen, ut en wieter’t Arv kemen 16.500 Euro.

Reinvermögen[ännern | Bornkood ännern]

Dat Reinvermögen vun de Düütschen Volksunion is ünner Null. Vun wegen de hogen Schullen vun de Partei bi ehrn fröheren Vörsitter Gerhard Frey bedriggt dat ruchweg -1,2 Millionen Euro.

Immobilien un Andelen an Ünnernehmen[ännern | Bornkood ännern]

De Partei hollt Andelen an en Immobilienfond, de se na egen Angaven as „weertlos“ betekent. Bito hett se Grundbesitt in Form vun Ackerland op dat Eiland Usedom. Twüschen de Partei un den Verlag vun de National-Zeitung gifft dat en drange Verbinnen. De höört aver Gerhard Frey to un is nich Deel vun’t Parteivermögen.

Politische Arbeit[ännern | Bornkood ännern]

Parlamentaarsche Arbeit allgemeen[ännern | Bornkood ännern]

De DVU weer unis in verscheden Landsparlamenten in de Oppositschoon. Se kandideert blots dor bi Wahlen, woneem se en wirkliche Mööglichkeit hett, in’t Parlament rintokamen. Intressant is in den Tosamenhang de Paragraaf söss vun de Satzung, wona en Liddmaat, dat ahn schriftlich Tostimmen vun’n Bundsvörstand an een Wahl deelnimmt, sien Liddmaatschop verlütt.

De DVU-Afordenten stellt faken woortglieke Andrääg in de Parlamenten, so dat al fakener vermoodt worrn is, dat se in jemehr Menen nich free sünd, man vun de Partei vun München ut stüert warrt. In’n Landdag vun Brannenborg hett de DVU siet 1999 fief, siet 2004 söss Sitten. In de Börgerschap vun Bremen seet se bit Juli 2007 mit een Afordenten. In Bremen weer se blots wegenen Sünnerheit vun’t Bremer Wahlgesett vertreden: De Partei hett de 5 % blots in de Stadt Bremerhoben överwunnen un künn dorüm al in de Börgerschop. Bi de parlamentaarsche Arbeit wiesen de Afordenten faken, dat se nich nau Bescheed wüssen. To’n Bispeel is vun de brannenborgschen DVU-Frakschoon de Andrag inbröcht worrn, dat „brannenborgsche Landsamt för Verfatenschuul“ optolösen – dorbi geev dat so en Amt in Brannenborg gor nicht.

De DVU harr en korte Periood, in de se Spood harr, is aver in de Länner, woneem se in de Landsparlamenten kamen is, as politische Kraft tomeist ahn Bedüden.

Kommunale parlamentaarsche Arbeit[ännern | Bornkood ännern]

In kreisfre’e Städer un Landkreisen hett de DVU na de letzten Kommunalwahl to’n Dezember 2007 sössteihn Sitten. In Bremerhoben, woneem de Partei siet 1987 ahn Ünnerbreken in de Stadtverordentenversammeln sitt, hett se na Striet binnen de Partei blots noch een Stadtverordenten, as twee Stadtverordente ut de DVU-Frakschoon rutgahn sünd. In Dortmund un Potsdam is de DVU mit beidemol dree Sitten vertreden un negen Sitten verdeelt sik op mehrere Landkreisen in Brannenborg.

Ok in de kommunalen Parlamenten teht de DVU-Afordenten jümmer wedder Acht op sik. So hett en DVU-Börgerschopsafordente in Bremen, de butendem siet 1991 in de Bremerhobener Stadtverordentenversammeln sitt, op en Beleidigen vun en SPD-Afordenten, de em as „Nazi“ beschimpen de, dordör reageert, dat he de SPD mit kommunistische Diktaters as Stalin in Verbinnen bröch un in jemehr Traditschoon stellen de. De SPD hett em dorophen wegen Volksverhetzen anzeigt, man dat weer afwiest, vun wegen dat nümms persönlich beleidigt worrn weer. In Dortmund stünn en DVU-Stadtraat Anfang 2004 in de „linken Medien“ in Blickfeld, as he vun de „mootigen Daden“ vun de Wehrmacht in’n Tweeten Weltkrieg snackt hett.

Butenparlamentarische Saken[ännern | Bornkood ännern]

Dat Leven binnen de Partei is tomeist op Parteidaag un Stammdischrunnen beschränkt. Vun wegen de Sekerheit, so seggt de Partei, warrt de Parteidaag nich apentlich ankünnigt. Bit 2001 geev dat jeed Johr en Grootverkünnen vun de Partei in de Nibelungenhall in Passau wogegen sik de Stadt in mehr as föfftig Gerichtsverfohren ahn Spood to wehren versöcht hett[6]. De Hööftsnacker weer jümmer Gerhard Frey.

Bi de Wahlkämp sett de DVU vör allen op Stimmen vun Minschen, de finanziell nich so goot stellt sünd. Een vun jemehr wichtigsten Themen is de starke Andeel vun Utlänners un dat wietere Totehn vun noch mehr dorvun[7]. Slagwöör as „Snut vull?“[8], „Swieneree Hartz IV – Wehrt jo“[9] oder „Ditmol Protest wählen![10]“ versöcht de DVU de Stimmen vun de Wählers to kriegen. Personell Uteneensetten mit de Minschen geiht de Partei bi’n Wahlkamp tomeist vullstännig ut’n Weg. De Partei begrünnt dat dormit, dat se in de verleden Tiet vun jemehr politische Gegners vör all Lüdd beschimpt un physisch angrepen worrn sünd.

Historie[ännern | Bornkood ännern]

Gerhard Frey, Grünner vun de DVU un Bundsvörsitter bit 2009

De DVU as Vereen (1971 bit 1987)[ännern | Bornkood ännern]

An’n 18. Januar 1971 hebbt de Verlegger Gerhard Frey un de Vörsitter vun de Akschoon Oder-Neiße, Erwin Alt, in’t Münchener Hotel Deutscher Kaiser de Düütsche Volksunion e.V. (DVU) grünnt. Annere bekannte Mit-Grünner weern Walter Brandner un de (sudetendüütsche) Schriever Wilhelm Pleyer. Frey is to’n Vörsitter vun den ne’en Vereen wählt worrn un is dat dorna ok bleven.[11]

De as Vereen grünnte DVU weer dacht as’n Opfangbecken för daalslahn NPD-Liddmaten, as de NPD na den Wahlspoood in de 1960er Johren jümmer mehr an Stimmen verloren hett. An de Vereensgrünnen weern butendem ok en poor CDU-Liddmaten bedeeligt. De Vereen hett sik anfangs vör allen gegen de Oostpolitik vun Willy Brandt richt. Sünners de CDU un de CSU schülln in jemehr Oppositschoon to disse Politik ünnerstütt warrn.[11]

In de Johren dorna hett Frey mehrere Akschoonsgemeenschoppen grünnt, de in de Johren 1979 un 1980 to reine rekrutiseerensorganisatschonen ümbillt worrn sünd. Liddmaten in een Akschoonsgemeenschop weern dormit also denn ok gliek Liddmaten in de DVU.

Frey weer denn aver nich tofreden mit de Regeeren ünner Helmut Kohl, de 1982 an de Macht kamen weer. Sünners dat Wietermaken mit de sozialliberalen Oostpolitik un de Binnenpolitik weern nich na sien Mütz, un so keem he op den Gedanken den Vereen in en Partei ümtowanneln. Ut organisatoorsche Grünnen hett he dorto en Kooperatschoon mit de NPD utmaakt.[12]

Parteigrünnen un de Johren dorna (1987-1994)[ännern | Bornkood ännern]

De DVU is an’n 5. März 1987 ünner den Naam „Düütsche Volksunion – List D“ (DVU-Liste D) as Partei grünnt worrn. Den Vereen DVU e.V. gifft dat siet de Tiet blangento . De Tosamenarbeit mit de NPD weer dorop anleggt, bi de Wahlen nich Konkurrenz gegenenanner to maken un Liddmaten vun de annern Partei kandideeren to laten. Al gliek in’t Johr vun’t Grünnen künn de DVU in dat Landsparlament vun Bremen intehn. Bi de Europawahl 1989 kreeg se blots 1,6 %, liekers dat se Wahlkamp mit groten finanziellen Opwand dreven harrn. Dorbi is de Partei düchtig in de Schullen kamen, de na de Angaav vun Beobachters bit hüüt noch nich wedder utgleken sünd.

In’n Februar 1991 hett de Partei den Naamstosatz „List D“ streken un nööm sik vun nu an blots noch Düütsche Volksunion (DVU). In dat sülve Johr keem se mit 6,2 % in de Bremer Börgerschop, dat weern söss Afordente, wovun twee vun de NPD weern. Bit 1993 sünd dree Afordente ut de DVU rutgahn un hebbt de so nöömte Natschonal-Konservative Grupp (NK) grünnt, vun de ut ’n ne’e Parteigrünnen utgahn schüll. Anfang 1992 is de DVU bi de Landdagswahlen in Sleswig-Holsteen mit 6,3 % drüttstarkste Partei worrn. Vun wegen de grote Acht vun de Medien un de apentlichen Anfeenden, wo noch personellen Arger un Striet mit de Bundspartei mit to keem, is de Landdagsfrakschoon al na een johr wedder tweigahn. In beide Landsparlamenten hett se in’n Verloop vu de Legislaturperiood den Frakschoonsstatur verloren. To de sülven Tiet füll ok de Afmaken mit de NPD uteneen, ünner annern, as in de NPD de persönliche Wedderstand gegen Frey tonahmen harr. In de Johren 1992 un 1993 harr de DVU mit üm un bi 26.000 ehr bit hüüt hööchste Tall vun Liddmaten. Bi de Börgerschopswahl in Hamborg kreeg se 1993 2,8 % vun de Stimmen.

1994 hett de DVU versöcht gegen de Beteken „rechtsextrem“ vör Gericht to gahn. Man, dat Gericht keen to den Sluss, dat dat rechtens is, de Partei un den Vörsitter vörtohollen, „in’n Grundsatz gegen Utlänner instellt to wesen“ un dat se Parolen as „Utläner rut“ bruken. In’n August 1994 hett sik Frey mit den Bundsvörsitter vun de REPs, Franz Schönhuber, drapen. De beiden hebb afmaakt, jemehr Parteien de Tosamenarbeit bi Wahlen antoraden. Aver ok disse Allianz weer nich vun Duer, vun wegen dat Schönhuber dormit in sien Partei Insaag kreeg un dorophen as Vörsitter vun sien Partei stört worrn is.

Wahlspood in Sassen-Aholt un Brannenborg (1995-2001)[ännern | Bornkood ännern]

As de Landdagsfrankschonen in Bremen un Sleswig-Holsteen verfallen weern, hett de Partei bi de Wahlen 1995 un 1996 in beide Länner verpasst, wedder in de Parlamenten rintokamen. 1997 is se bi de Hamborger Börgerschopswahl mit 4,98 % bannig knapp an de 5-Prozent-Hinnern hangen bleven, dat se laterhen en Manipulatschoon vun de Wahl vermoden deen.

Na en teemlich intensiven un opwännigen Wahlkamp künn de DVU 1998 in Sassen-Anholt 12,9 % vun de Stimmen kriegen un somit 16 Sitten in’t Parlament. In de Twüschentiet weer de Tall vun de Liddmaten op 15.000 rünner gahn, steeg na dissen Spood aver för korte Tiet wedder op 18.000 an. Bi de Bundsdagswahl 1998, de en half Johr later weer, keem de Partei aver nich över 1,2 % rut. Enn vun 1998 hett Frey sik mit Rolf Schlierer drapen, de siet 1994 Bundsvörsitter vun de REPs weer. De beiden hebbt afmaakt, dat jemehr Parteini n de nächsten Johren nich gegenenanner anpedden schülln.

Vun disse Afmaken mit de Republiekaners hett de DVU 1999 tweemol profiteert: An’n 6. Juni künn se in Bremen wedder mit een Afordenten in de Börgerschop torüch un in Brannenborg kreeg se bi de Landdagswahl an’n 5. September 5,3 % vun de Stimmen un töög mit fief Afordenten in den Landdag in. In Döringen bleev se ’n Week later aver ünner de 5 Prozent. Enn vun 1999 geev dat Schandal binnen de Partei, vun wegen dat Frey gegen den Willen vun de Parteibasis beslaten harr, dat sie Partei an’n 27. Februar 2000 bi de Landdagswahl vun Sleswig-Holsteen nich deelnehmen schüll.

Al Anfang 1999 keem dat bi de Frakschoon in Sassen-Anholt to eerste Teken vun Verfall, as mehrere Afordente de Frakschoon verlaten hebbt. Eenige sünd utpeddt, de för de DVU nich to hollen weern. 2000 hett sik de Frakschoon opletzt opsplitt. De ne’e Frankschoonsvörsittersche Claudia Wiechmann grünn tosamen mit acht annere DVU-Afordente de Freeheitliche Düütsche Volkspartei (FDVP), naden en Störten vun Frey op’n Bundsparteidag 2000 nich klappt hett. De ne’en Liddmaaten vun de FDVP hebbt vör allen kritiseert, dat se dör de Parteizentrale in München – also dör Frey – allens seggt un vörschreven kregen. De ne’e Partei schüll en Gegenstück to de öösterriekschen Freeheitliche Partei vun Öösterriek (FPÖ) vun Jörg Haider wesen[13].

In’n Vörfeld to de Börgerschopswahl in Hamborg 2001 geev dat en Rechtsstriet mit de Hip-Hop-Band Die Fantastischen Vier, vun wegen dat de Partei mit jemehr Parolen op de Grupp un jemehr Leed „Die da“ ut dat Johr 1992 anspelen deen. Bi de Wahl sülvst kregen se blots 0,7 %, as se bannig Konkurrenz kregen harrn dör de in’t Johr 2000 grünnte Partei Rechtsstaatlicher Offensive („Schill-Partei“).

Konsolideeren un Düütschlandpakt mit de NPD (2002-2009)[ännern | Bornkood ännern]

Bi de Landdagswahl in Sassen-Anholt 2002 hett sik de Partei nich wedder opstellt vun wegen dat klöterige Bild, wat de Afordenten dor afgeven harrn. Ok an de Bundsdagswahl hebbt se nich deelnahmen.

Bi de Landdagswahlen vun Sassen un Branneborg in’t Johr 2004, de beide an’n 19. September weern, hett sik de DVU to’n eersten mol siet över teihn Johren wedder mit de NPD afsnackt. Utmaakt weer, dat de DVU blots in Brannenborg un de NPD blots in Sassen kandideeren wull, üm sik nich gegensietig de Stimmen wegtonehmen.

Frey (achtere Reeg 2. v.l.) op’n NPD-Bundsparteidag 2006

In’n Wahlkamp to de brannenborgschen Landdagswahl güng de DVU dör de Medien, vun wegen dat se in en Feernseh-Warffilm mit’n Bild vun de ehmoligen brannenborgschen Sozialministersche Regine Hildebrandt, de dood bleven weer, warven deen un dorin seggen deen, dat se „hüüt Protest wählen“ de. Op Verlangen vun ehrn Weetmann Jörg Hildebrand is dat gerichtlich verboden worrn. In Brannenborg künn de DVU ehrn Stimmandeel op 6,1 % utboen un kreeg söss Mandaten. De Landdagwsfrakschoon in Brannenborg is bit hüüt de eenzige vun de DVU, de nich uteneenfallen is.

Bito hebbt beide Partei en nee Bündnis slaten, den so nöömten Düütschlandpakt. Dorin weer inslaten, dat sik de beiden Partei in tokamen Tieten bi Wahlen keen Konkurrenz mehr maken wüllt. Vun dat Afkamen hett de DVU aver in’n Gegensatz to de NPD bit nüüt kuum en Vördeel hatt. Ofschoonst de NPD in Sassen-Anholt 2006 in antreden is, kreeg de DVU blots 3,0 % un in Hamborg blots 0,8 % un bleev dormit wiet ünner de fief Prozent. De Düütschlandpakt warrt dorüm sünners vun de NPD-Liddmaten faken in Fraag stellt, un dat is antonehmen, dat de Pakt 2009 nich verlängert warrt.

Bi de bremischen Börgerschopswahlen 2003 un 2007 künn de Afordente Siegfried Tittmann wedder in’t Parlament intehn. In’n Juli 2007 is he aver ut de Partei utpeddt, as de DVU doröver nadacht harr, 2011 mit’n ne’en Spitzenkandidaten in de Wahl to gahn. De DVU is dormit also faktisch nich mehr in de Börgerschop.

Torüchtehn vun Frey un de Tiet dorna (af 2009)[ännern | Bornkood ännern]

In’n Vörfeld to den Bundsparteidag in’n Januar 2009 hett de NPD-Blog bericht, dat Gerhard Frey nich wedder för den DVU-Vörsitt kandideeren un sik ut dat politische Gewarf torüchtehn wull. To’n ne’en Bundsvörsitter is de vörherige Bundsorganisatschoonsleider Matthias Faust wählt worrn[14].

Vörher al geev dat Berichten in de Medien, dat de Düütschlandpakt mit de NPD an’n Verfalln weer. Nadräglich is to’n Bispeel afmaakt worrn, dat bi de Döringer Landdagswahl 2009 – anners, as dat toeerst plaant weer – de NPD un nich de DVU anpedden schall, vun wegen, dat de NPD in dat Bundsland de betere Grundlaag hett.

Resultaten vun de DVU bi Landdagswahlen[ännern | Bornkood ännern]

BW BY BE BR HB HH HE MV NI NW RP SL SN ST SH TH
1987 3,4% n.a. n.a. n.a. n.a.
1988 n.a. n.a.
1989 n.a.
1990 n.a. n.a. n.a. n.a. n.a. n.a. n.a. n.a. n.a.
1991 6,2% n.a. n.a. n.a.
1992 n.a. 6,3%
1993 2,8%
1994 n.a. n.a. n.a. n.a. n.a. n.a. n.a. n.a.
1995 n.a. 2,5% n.a. n.a.
1996 n.a. n.a. 4,3%
1997 5,0%
1998 n.a. 2,9% n.a. 12,9%
1999 n.a. 5,3% 3,0% n.a. n.a. n.a. 3,1%
2000 n.a. n.a.
2001 n.a. n.a. 0,7% n.a.
2002 n.a. n.a.
2003 n.a. 2,3% n.a. n.a.
2004 6,1% n.a. n.a. n.a. n.a.
2005 n.a. n.a.
2006 n.a. n.a. n.a. n.a. 3,0%
2007 2,7%
2008 n.a. 0,8% n.a. n.a.
2009 1,2 % n.a. n.a. n.a. n.a.
2010 n.a.
  • n.a. – nich anpeddt
  • De fettdruckten Resultaten weern mit’n Intog in’t Landsparlament verbunnen
  • De Intog in de Bremer Börgerschop kummt vun en Sünnerregel in’t Bremer Wahlrecht. Dor steiht, dat de Överwinnen vun de 5-Prozent-Hinnern in Bremen oder Bremerhoben reckt.

Borns[ännern | Bornkood ännern]

  1. DIE ZEIT, "Ein bißchen Volksverhetzung", 38/1998
  2. 2,0 2,1 school-scout.de
  3. Verfassungsschuulbericht vun’t Land Nordrhien-Westfalen över’t Johr 2007 (PDF).
  4. verfassungsschutz.thueringen.de
  5. bundestag.de: Fastsetten vun de staatlichen Deelfinanzeeren för’t Jahr 2007 na §§ 18 ff. PartG
  6. Nürnberger Nachrichten, 11.02.2003
  7. gruene-jugend.de
  8. inforiot.de
  9. Hamborger Avendblatt, 14. August 2004
  10. wsws.org
  11. 11,0 11,1 Studie vun de SPD Brannenborg to de DVU
  12. Annette Linke: Der Multimillionär Frey und die DVU
  13. Verfatenschuulbericht vun’t Land Sassen-Anholt 2001: Siet 55 (PDF-Dokument).
  14. NPD-Blog: „Frey zieht sich zurück: DVU bald unter neuer Führung“

Literatur[ännern | Bornkood ännern]

  • Jürgen Elsässer: Braunbuch DVU. Eine deutsche Arbeiterpartei und ihre Freunde. Hamborg 1998.
  • Jörg Fischer: Ganz rechts. Mein Leben in der DVU. Rowohlt 1999. ISBN 3-49922-597-2
  • Jürgen Hoffmann: Die DVU im Landtag von Sachsen-Anhalt. In: Uwe Backes, Eckhard Jesse (Rtg.): Jahrbuch Extremismus & Demokratie, 12. Jg., Baden-Baden 2000, S. 240-252.
  • Everhard Holtmann: Die angepassten Provokateure. Aufstieg und Niedergang der rechtsextremen DVU als Protestpartei im polarisierten Parteiensystem Sachsen-Anhalts. Opladen 2001.
  • Annette Linke: Der Multimillionär Frey und die DVU. Daten, Fakten, Hintergründe. Essen 1994. ISBN 3-88474-207-8

Weblenken[ännern | Bornkood ännern]